როგორია ვაზისუბანში დაჭრილი 28 წლის ქალის ჯანმრთელობის მდგომარეობა? -  საუნივერსიტეტო კლინიკაში ამბობენ, რომ პაციენტის მდგომარეობა ამჟამად სტაბილურია. 

დაშავებული კონტაქტური და ადეკვატურია, თუმცა კვლავ საჭიროებს მედიკოსების დაკვირვებას. 

კლინიკაში შეყვანისას ქალს მთელ სხეულზე ათეულობით ჭრილობა და მოტეხილობა აღენიშნებოდა. 

"ქალა-სახის მოტეხილობა იყო, ნეკნების მრავლობითი მოტეხილობა, მხრის - სახსრის მოტეხილობა, მუხლის სახსრის, მაჯის და მტევნის მოტეხილობა. სასწრაფო დახმარების ბრიგადის გადმოცემით, ჭრილობები მიყენებულია ცივი იარაღით"- ამბობს მედიკოსი. 

28 წლის ქალის მკვლელობის მცდელობისთვის  დაკავებულს  15 წლით პატიმრობა ემუქრება -  უმძიმეს დანაშაულში ბრალდებულ ბიჭიკო ბაჩილავას პროკურატურამ ბრალი გადაუკვალიფიცირდა და მუხლი დაუმძიმა. 

41 წლის კაცს  ახლა  მეზობლის მკვლელობის მცდელობას  ედავებიან - საქმეზე კვალიფიკაცია ქალის  სხეულზე აღმოჩენილი უმძიმესი  დაზიანებების გამო შეიცვალა  - 28 წლის ქალს სახე დასერილი აქვს, ნეკნები ჩატეხილი, სხეულზე კი ათობით ჭრილობა აქვს მიყენებული. 

ცნობისთვის, თბილისში, ვაზისუბანში 30 წლამდე ქალი  24 მარტს დაჭრეს.