უძრავი ქონების ბაზარზე პიკური პერიოდი გავლილია და სექტორი თანდათან ჩვეულ რიტმს უბრუნდება. მართალია, რეზლიზაცია აქტიური აღარ არის და კლების ტენდენციაც აშკარაა, მაგრამ ფასების კუთხით ცვლილება ბაზარს ჯერჯერობით არ ეტყობა. სამომავლოდ კი გამორიცხული არ არის, ბაზარზე ახალი მოთხოვნები გაჩნდეს, რაც სავარაუდოდ, ფასზეც აისახება - ძველ ნიშნულს არ დაუბრუნდება,  მაგრამ შესაძლოა, გასრკვეული კლებაგანიცადოს.

მიმდინარე წლის ნოემბერში უძრავი ქონების ბაზარზე დიდი კლება დაფიქსირდა. 2023 წლის ნოემბერში თბილისში საცხოვრებელი ბინების ტრანზაქციების რაოდენობამ 3390 ერთეული შეადგინა და წინა წლის ნოემბერთან შედარებით 16%-ით შემცირდა. "ქოლიერს ჯორჯიას" ინფორმაციით, ბაზრის ზომა 7%-ით - 215 მილიონ აშშ დოლარამდეა შემცირებული. 

2023 წლის ნოემბერში თბილისში ახალ პროექტებში ტრანზაქციების 10%-იანი კლებაა, ძველ პროექტებში კი, მაჩვენებელი 27%-ით შემცირდა.

2023 წლის ნოემბერში ბათუმში საცხოვრებელი ბინების ტრანზაქციების რაოდენობამ 993 ერთეული შეადგინა და წინა წლის ნოემბერთან შედარებით 41%-ით იკლო. ბაზრის ზომა 43%-ით - 43 მილიონ აშშ დოლარამდეა შემცირებული. 

2023 წლის ნოემბერში ბათუმში ახალ პროექტებში ტრანზაქციების 44%-იანი კლება იყო, ძველ პროექტებში კი - 24%-იანი.

ამდენად, უძრავი ქონების ბაზარზე ტენდენცია უცვლელია იმ კუთხით, რომ მოთხოვნა, ძირითადად, დიდ ქალაქებზეა - თბილისსა და ბათუმზე. არ არის გამორიცხული, რომ 2024 წელს მოთხოვნა-მიწოდების ბალანსი კიდევ უფრო შეიცვლება, რადგან რუსების მიერ შეძენილი უძრავი ქონება უკვე აქტიურად გამოდის ბაზარზე გასაყიდად.

მიმდინარე ტენდენციებთან დაკავშირებით "რეზონანსთან" საქართველოს უძრავი ქონების ეროვნული ასოციაციის ხელმძღვანელმა ვაჟა მებაღიშვილი ისაუბრა.

,,რუსეთის მოქალაქეების ის ნაწილი, რომლებიც ომის შემდეგ საქართველოში შემოვიდნენ და უძრავი ქონება შეიძინეს, იმდენად ადაპტირდნენ ქართულ გარემოსთან, რომ სექტორში უკვე დომინანტი გახდნენ. განსაკუთრებით ეს ეხება აჭარის რეგიონს, სადაც რუსული სააგენტოები მომრავლდნენ. ისინი ბინების ყიდვა-გაყიდვის პროცესში აქტიურად არიან ჩართული. ძირითადად იმ ბინების რეალიზაცია ხდება, რომელიც რუსებმა 2021 და 2022 წლებში შეიძინეს და ახლა ბაზარზე  გასაყიდად გამოაქვთ. ერთი შეხედვით, საცხოვრებლად შეიძინეს ბინები, მაგრამ ისე მოხდა, რომ ბიზნესად აქციეს. 

ყველაზე სარფიანი არის უძრავი ქონების შეძენა, გარემონტება და შემდეგ რეალიზაცია. ეს მიმართულება უკვე კარგად აითვისეს. ყიდიან, ძირითადად, რუსებსა და უცხოელებზე, ყველაზე ნაკლებად - ქართველებზე. განსაკუთრებით შემაშფოთებელია, რომ აჭარის რეგიონში უძრავი ქონების დიდი წილი დაიკავეს“, - აღნიშნა ვაჟა მებაღიშვილმა ,,რეზონანსთან" საუბრისას.

მისი შეფასებით, თუ ქვეყანაში ეკონომიკური სტაბილურობა შენარჩუნდა, უძრავი ქონების ბაზარზეც ვითარება არ შეიცვლება.

„რეგიონში მიმდინარე პროცესების ფონზე საქართველო სტაბილურობას მაინც ინარჩუნებს და საინვესტიციოდ მიმზიდველი ქვეყანაა. შესაბამისად, ქვეყნის მიმართ არის გარკვეული ინტერესი და  ვითარდება ინფრასტრუქტურა. ეკონომიკური მდგომარეობა მეტ-ნაკლებად სტაბილურია და ეფექტებიც შესაბამისად დადებითია", - დასძინა მებაღიშვილმა.

ამდენად, როგორ განვითარდება პროცესები და რა ტენდენციურ ხასიათს შეიძენს ბაზარი, 2024 წელს უფრო გამოჩნდება. არ არის გამორიცხული ფასებმბა მცირე კლება განიცადოს, ძირითადად, ძველ აშენებულ კორპუსებში, დეველოპერები ახალი მშენებლობების მიმართ მოთხოვნის ზრდას პროგნოზირებენ.

კომპანია „არსის“ გენერალური დირექტორის ბესო ორთოიძის თქმით, კლების ნეგატიური ტენდენცია შეიცვლება და უკვე მომავალი წლიდან მოსალოდნელია მოთხოვნის ზრდა.

„უძრავი ქონების ბაზარი რეალურად ძალიან გაიზარდა, პანდემიური პერიოდების გამოწვევა მაქსიმალურად არის დაძლეული, თუკი ნოემბერში გარკვეული კლებაა, შესაძლოა ეს იმის ხარჯზე, რომ წინა წლის ანალოგიურ პერიოდში რუსი მიგრანტები აქტიურად ყიდულობდნენ ყველაფერს და ფასიც ძალიან მაღალი იყო. ამან ერთგვარი ბუშტისებრი ეფექტი შეიძინა.

წელს პიკი ჩაცხრა, თუმცა მთელი წლის განმავლობაში შენარჩუნებული იყო სტაბილურობა. კლებას ნამდვილად არ ველოდები, იქიდან გამომდინარე, რომ გაზრდილია სამშენებლო ნებართვების რაოდენობა. შესაბამისად, მოლოდინია, რომ გაისად მოთხოვნა მოიმატებს, არ გამოვრიცხავ მიწოდებას გადააჭარბოს. ამ მხრივ გარკვეულ გავლენას მოახდენს ევროკავშირის კანდიდატის სტატუსის პერსპექტივა, რაც ქვეყნის საინვესტიციო ბაზარს უფრო მიმზიდველად წარმოაჩენს და მეტი სტიმული გაჩნდება.

უფრო მაინც ახალაშენებულ კორპოუსებზეა მოთხოვნა და ეს ტენდენცია გაგრძელდება მომავალშიც. ამ სეგმენტში ფასების კლება მოსალოდნელი არ არის, თუმცა გაძვირებით არ გაძვირდება. მეორად ბაზარზე კი უფრო სხვა სიტუაციაა და მცირე კორექტირება კლების კუთხით შესაძლებელია", - აღნიშნა ბესო ორთოიძემ ,,რეზონანსთან" საუბრისას.

რამდენიმე დღის წინ საქართველოში მშენებლობასთან დაკავშირებით მორიგი სტატისტიკური მაჩვენებლები გამოქვეყნდა, რომლის მიხედვითაც, 2023 წლის ოქტომბერში მშენებლობის ღირებულების ინდექსი წინა თვესთან შედარებით, 0.2%-ით შემცირდა.

აღნიშნული ცვლილება, ძირითადად, განპირობებული იყო მშენებლობის დარგში დაქირავებით დასაქმებულთა საშუალო თვიური ნომინალური ხელფასის 4.5%-იანი შემცირებით, რამაც ჯამური ინდექსის ცვლილებაში -1.17 პროცენტული პუნქტი შეიტანა, ამასთან, 2022 წლის თებერვალთან შედარებით მშენებლობის ღირებულების ინდექსი 12.4%-ით გაიზარდა. ინდექსის ზრდა, უმეტესწილად, გამოწვეული იყო მშენებლობის დარგში დაქირავებით დასაქმებულთა საშუალო თვიური ნომინალური ხელფასის 26.2%-იანი ზრდით და სამშენებლო მასალების 7.4%-იანი გაძვირებით, რამაც, ჯამური ინდექსის ცვლილებაში შესაბამისად, 5.91 და 4.19 პროცენტული პუნქტი შეიტანა.