უნდა აიღონ თუ არა პოლიტიკურმა პარტიებმა და ლიდერებმა პროტესტის სადავეები ხელში და რას გამოიწვევს ქაოსური, დაუგეგმავი აქციები? ოპოზიციის ნაწილი მიიჩნევს, რომ პოლიტიკოსების გარეშე ამ აქციების გამართვას შედეგი არ ექნება. მმართველ გუნდში კი ფიქრობენ, რომ ოპოზიციაში აქციების სადავეების ხელში ჩაგდების გამო დაპირისპირება უკვე დაიწყო. მათი აზრით, ოპოზიციასა და მესამე სექტორს შორის აქციების გამართვის დროს და გეგმებზე უკვე უთანხმოებაა.    

„არანაირი გამართლება არა აქვს უკვე სახლში მიმავალი დემონსტრანტების დევნას ვიწრო ქუჩებში და იმ სისასტიკეს, რომელზეც დაკავებული ადამიანები საუბრობდნენ,“ - ეს განცხადება „ლელოს“ წევრმა ანა ნაცვლიშვილმა პარლამენტის სხდომაზე გააკეთა, სადაც ინტერპელაციის წესით შინაგან საქმეთა მინისტრს უსმენდნენ.

მისივე თქმით, არ აქვს გამართლება იმას, რომ ქვეყანა საბჭოთა კავშირში დაწერილი ადმინისტრაციული სამართალდარღვევათა კოდექსით ხელმძღვანელობს.

„არანაირი გამართლება არა აქვს იმას, რომ 21-ე საუკუნის ქვეყანაში, რომელიც, ჯერ კიდევ, კონსტიტუციის დონეზე, აცხადებს რომ მას უნდა ცივილიზებული ევროპული მომავალი, დემონსტრანტების დაკავების დროს ხელმძღვანელობს საბჭოთა ქვეყანაში დაწერილი ადმინისტრაციული სამართალდარღვევათა კოდექსით,“ - განაცხადა ანა ნაცვლიშვილმა.

„არანაირ ძალადობას არ ვახალისებ, მაგრამ ვერცერთ ფაქტს ვერ მოიყვანთ, რომ მოქალაქეები იდგნენ მშვიდობით, თავის პროტესტს გამოხატავდნენ და პოლიცია მივარდა, დაარბია, დააკავა ან იძალადა,“ - პასუხობს ბრალდებას შინაგან საქმეთა მინისტრი, ვახტანგ გომელაური.

მისი თქმით, ათი წლის განმავლობაში ასეთი ერთი ფაქტიც კი არ ყოფილა.

„მარტო გუშინდელზე და ბოლო სამ დღეზე არ ვსაუბრობ, წინა წლებზეც ვამბობ. ათი წლის განმავლობაში, ერთი ფაქტიც არ ყოფილა. არავის უნდა ჭიდაობა, ძალადობა, ეს არც პოლიციას უნდა და არც აქციის ნორმალურ მონაწილეს, თუმცა არიან გარკვეული დესტრუქციული ძალები. ყველამ კარგად დავინახეთ, იყო ათკაციანი, ოცკაციანი ჯგუფები, რომლებსაც მართავდნენ, ანუ სხვა ხელმძღვანელები ჰყავდათ.

„ახალგაზრდებს, ჩემი შვილის ტოლებს უშვებდნენ წინ, ისინი კი შემდეგ ქრებოდნენ, ადგილზე აღარ იყო არავინ. მოვუწოდებ ამ ახალგაზრდებს - ჩემი შვილის ტოლები არიან - თავს გაუფრთხილდნენ, თავს ნუ ჩაიგდებენ ცუდ ვითარებაში ვიღაც სხვის კეთილდღეობის გამო. თითოეული ახალგაზრდა არის ძვირფასი, ყველას პატივი უნდა ვცეთ, ყველას უნდა გავუფრთხილდეთ,“ - განაცხადა ვახტანგ გომელაურმა.   

ანალიტიკოსი ვახტანგ ძაბირაძე „რეზონანსთან“ მიიჩნევს, რომ სწორია ოპოზიციის გადაწყვეტილება, აქციები „გავლენების კანონის“ მეორე მოსმენის დროს გამართონ,  რადგან ამ ეტაპზე თბილისში აქციების გამართვის რესურსი ამოწურულია. მისი თქმით, გასაგებია, რომ ახალგზარდები იკრიბებიან, მაგრამ მერე რა, ორთქლს გამოუშვებენ და ისევ დაიშლებიან. 

„ვფიქრობ,  რომ აქციები  ამ ეტაპზე უნდა შეწყდეს  და უნდა გაგრძელდეს მაშინ, როდესაც მმართველი გუნდი მის მეორე მოსმენაზე შემოტანას დაიწყებს. აქცია მიდის კარგად, ხალხის რაოდენობა იზრდება, პოლიტიკოსებს თუ რამე აქვთ სათქმელი და მედია უნდათ  გამოყენონ, არ არის ამის პრობლემა. სანამ აქცია იქნება საზოგდოებრივი, ის წარმატებული იქნება, როგორც კი მის სათავეში პოლიტიკოსები მოექცევიან, ხელისუფლებას მიეცემა საშუალება ილაპარაკოს, რომ ეს არის პოლიტკური აქცია. 

„ამასთანავე, არასამთავრობო ორგანიზაციებმა საორგანიზაციო ჯგუფები უნდა შექმნან და ყოველ დღე აქციებზე რაღაცა აზრიანი უნდა თქვან. ასევე იმ შუალედში, რომელიც ახლა მეორე მოსმენამდე დრო აქვთ, დიდ ქალაქებში უნდა გავიდნენ. თუნდაც ეს იქნება ქუთაისი, ბათუმი, ზუგდიდი, თელავი, ახალციხე, გურჯაანი, გორი და სხვა. მთელი საქრთველო უნდა მოიცვან იმისთვის, რომ საქართველოს მოსახლეობის ინფორმირება მოახდინონ. იმისთვის, რომ აქცია არის მრავალი ხასიათის და როცა ეს კანონი მეორედ მოსმენაზე გავა, რაოდენობა გაცილებით მეტი უნდა იყოს და არა პირიქით, მუხტი არ უნდა შესუსტდეს“, - ამბობს ძაბირაძე. 

რაც შეეხება კითხვას, ვინ შეიძლება ამ აქციებს გაუძღვეს მაშინ და რამდენად არსებობენ ჩვენს მოსახლეობაში ის ავტორიტეტები, თუნდაც მესამე სექტორში, რომლებიც რეგიონებში ხალხის გამოყავნას შეძლებენ? ძაბირაძე ამბობს, რომ როგორც კი პოლიტიკოსები აქციების სათავეში მოხვდებიან, ეს ხელისუფლების წისქვილზე წყლის დასხმა იქნება. 

„პარალამენტზე ალყის დარტყმას და ჯაჭვი შემორტყმას რა აზრი აქვს? რას ნიშნავს, კობახიძეს თვალებში უნდა ჩავხედო? ასეთ შეცდომას ხელისუფლება იყენებს. მსგავსი ფუჭი საუბარი, ულტიმატუმების წაყენება და ხალხის აქეთ-იქით ტარება, აქციების მუხტს აგდებს. პოლიტიკოსების გამოჩნამდე ხომ მიჰყავდა აქცია რატი ამაღლობელს, ბუღაძეს და ხელოვნების სხვა წარმოამდგენლებს?! იმის წინააღმდეგი კი არ ვარ, პარტიის ლიდერები აქციაზე იყვნენ, პრობლემა ის არის, რომ აქედან პოლიტიკური  ქულების დაწერა ვიღაცეებმა არ უნდა ეცადონ. თანამშრომლობა უნდა ჰქონდეს საორგანიზაციო საკითხებზე, რომ ხალხი ტყუილად არ ატარონ. როგორც კი ხელისუფლება აქციების დისკრიმინაციას მოახდენს, საპროტესტო მუხტი მაშინვე დაეცემა“, - ამბობოს ძაბირაძე.