გამთენიისას „ლელო ძლიერი საქართველოს" წევრი ალეკო ელისაშვილი დააკავეს, შსს აცხადებს, რომ ელისაშვილმა 29 ნოემბერს, გამთენიისას კანცელარიის შენობის დაწვა სცადა. მომხდარს მმართველ გუნდში ტერორისტული აქტის განხორციელების მცდელობად აფასებენ, ოპოზიციის ნაწილის აზრით კი ელისაშვილის დაკავება მის პოლიტიკურ დევნას ემსახურება, ნაწილი კი ამ გახმაურებულ ამბავს ყურადღების გადატანისთვის გამიზნულს „საკენკს" უწოდებს.

ოპოზიციონერი პოლიტიკოსი დიღმის მთავარ სამმართველოშია გადაყვანილი. შინაგან საქმეთა სამინისტრო ალეკო ელისაშვილის დაკავების თაობაზე განცხადებას ავრცელებს.

„გამოძიებით დგინდება, რომ მიმდინარე წლის 29 ნოემბერს, გამთენიისას, ალექსანდრე ელისაშვილმა, შენიღბულმა, ჩაქუჩის გამოყენებით ჩაამსხვრია თბილისის საქალაქო სასამართლოს კანცელარიის შენობის გარე ფასადის მინა, შეაღწია სასამართლოს კანცელარიის შიდა სივრცეში, სადაც პერიმეტრზე ბენზინი დაასხა, მათ შორის, საკანცელარიო ნივთებზე, ტექნიკაზე, დოკუმენტაციაზე და შენობის დაწვა სცადა. მას შემთხვევის ადგილზევე წაასწრეს სასამართლოს მანდატურის სამსახურის წარმომადგენლებმა, რომლებსაც ელისაშვილმა თან ნაქონი ცეცხლსასროლი იარაღის გამოყენებით წინააღმდეგობა გაუწია და ფიზიკური შეურაცხყოფა მიაყენა. გაწეული წინააღმდეგობის მიუხედავად, ალექსანდრე ელისაშვილი მანდატურებმა ადგილზევე დააკავეს."

გავრცელებულ კადრებში ჩანს, რომ ელისაშვილს ფიზიკური დაზიანებები აღენიშნებოდა, შსს წერს, რომ დაზიანებები ელისაშვილმა დაკავების დროს გაწეული წინააღმდეგობის დროს მიიღო, ხოლო ერთ-ერთი მანდატური საავადმყოფოშია გადაყვანილი.

ნივთმტკიცებად იარაღია ამოღებული, ამ ეტაპზე გამოძიება სისხლის სამართლის კოდექსის 19-187-ე მუხლით მიმდინარეობს.

ელისაშვილის ადვოკატი, გიორგი რეხვიაშვილი, გამორიცხავს, რომ ბრალდებულს მსგავსი დანაშაული ჩაედინა, ამბობს, რომ ეს „ოცნების" სპეცოპერაციის ნაწილია და მხოლოდ პოლიტიკურ დევნას ემსახურება.

„ფაქტია ის, რომ რაც კადრებში ჩანს - ბენზინი, ჩაქუჩი, სანთებელა, რაღაც „ქართული ოცნების" მიერ დაგეგმილი სპეცოპერაციაა. ჩვენ არაერთი საქმე გვინახავს ალეკო ელისაშვილის მიმართ, გვახსოვს ალი ბაბაევის საქმე, რომელიც ერთი წლის წინ იყო ზუსტად, თუმცა მტკიცებულებების არ ქონის გამო დღემდე გრძელდება და ვერ უმტკიცებენ დანაშაულს. ამიტომ ვვარაუდობ, რომ დასჭირდათ ახალი საქმე, ახალი მტკიცებულებების შეგროვება, რომ ეს აქტიური პოლიტიკოსი რაღაც გზით გააჩერონ და ეს არის პოლიტიკური დევნა, ჩემი აზრით და არანაირ დანაშაულს ადგილი არ აქვს."-განაცხადა ადვოკატმა.

„მორიგი საკენკი"

მომხდარის გარშემო ოპოზიციაში ბევრი კითხვა დაგროვდა, მაგალითად, როგორ აპირებდა, ელისაშვილი რამდენიმე ბენზინით სავსე ბოთლით შენობის დაწვას, ან რაში დასჭირდებოდა ელისაშვილს ამ ნაბიჯის გაცნობიერებულად გადადგმა ოპოზიციონერების ნაწილი მომხდარს „ოცნებას" უკავშირებენ.

„სამი ბოთლი ბენზინით მივიდა? ორ ცარიელ ბოთლს აჩვენებენ და ერთს ბენზინით სავსეს. 6 ლიტრი ბენზინით ის ძღინკიანი შენობა დაიწვება კი არა გაივსება ბიჭო.

წესით ბენზინის შეძენის კადრიდან უნდა დაიწყონ და დადონ როგორ ხტება ეზოში, როგორ ამტვრევს და როგორ ასხამს საწვავს ელისაშვილი სასამართლოს კანცელარიის შენობაში" - წერს ოპოზიციონერი ალიკა კუპრავა.

ოპოზიციის ნაწილი კი ამბობს, რომ ელისაშვილის გარშემო განვითარებული პროცესი ყურადღების გადასატანად გამზინული მორიგი „საკენკია".

„ხაბეს 4 ოქტომბრის და ალეკოს სასამართლოს დაწვის ამბავი ერთი და იგივე საკენკია. გიყრიან იმიტომ, რომ სერიოზულზე არაფერზე არ დაფიქრდეთ და უფიქრალად იგრძნოთ თუ ვინაა ნამდვილი ოპოზიციონერი. ის ხომ გმირია, რადგან პრეზიდენტის სასახლეში შედიოდა! ის ხომ გმირია, რადგან სასამართლოს კანცელარიას წვავდა! ამასობაში კი ძაღლი ჰყეფს, ქარავანი მიდის, პოლიტიკა კვდება, კლოუნადა ზეიმობს!"-წერს „გირჩის" დამფუძნებელი იაგო ხვიჩია.

ჯერჯერობით, სხვა ოპოზიციონერებს კომენტარი არ გაუკეთებიათ.

„ტერორისტული აქტის განხორციელების მცდელობა"

„ოცნებაში" პასუხისმგებლობას ევროკავშირს აკისრებენ, მომხდარ კი შეუმდგარ ტერორისტულ აქტად მოიხსენიებენ.

„გუშინ ევროკავშირის ზოგიერთი დედაქალაქიდან მოვისმინეთ მოძალადე ჯგუფების მხარდამჭერი განცხადებები. დღეს „ალდეს" წევრი პარტიის ერთ-ერთმა ლიდერმა ტერორისტული აქტის განხორციელება სცადა.

კეთილი იყოს თქვენი მობრძანება ღირებულებებით სავსე ევროკავშირში",-პარლამენტის თავმჯდომარე შალვა პაპუაშვილმა.

მომხდარს ადამიანის უფლებათა დაცვისა და სამოქალაქო ინტეგრაციის საპარლამენტო კომიტეტის თავმჯდომარე რატი იონათამიშვილიც ეხმაურება.

„ყველას აინტერესებს, აიღებს თუ არა ევროკავშირის მოქმედი ბიუროკრატია პასუხისმგებლობას დღევანდელ უნიათოდ განხორციელებულ ტერორისტულ აქტზე!" - წერს სოციალურ ქსელში იონათამიშვილი.

„გუშინ აქციაზე წაიკითხავდნენ თუ არ წაიკითხავდნენ ამ მანიფესტს, მნიშვნელობა არ ჰქონდა, დილით ელისაშვილი სასამართლოში მაინც შევარდებოდა. შეიძლება ეს სასოწარკვეთილების ბრალიც არის. ალბათ ეგონა, რომ გუშინ ის აქცია ხელისუფლებას გადააყენებდა, ჩავარდა სასოწარკვეთილებაში, ნახა სიზმარი და მერე ამისი ასრულება მოინდომა"-განაცხადა „ხალხის ძალის" დეპუტატმა გურამ მაჭარაშვილმა