გერმანიის ახალი კანცლერი ფრიდრიხ მერცი პარასკევს ვაშინგტონიდან თავდაჯერებულად დაბრუნდა და განაცხადა, რომ პრეზიდენტი ტრამპი ევროპის უსაფრთხოებისადმი ერთგული რჩება და ღიაა მოკავშირეებთან დისკუსიისთვის. კითხვას, აპირებს თუ არა ამერიკა ნატოდან გასვლას, მერცის მტკიცებით, ტრამპმა ცალსახა „არათი" უპასუხა.

„ამ შეხვედრიდან ჩემი დასკვნა, შესაძლოა, განსხვავდება სხვების ვარაუდებისგან", - განაცხადა მერცმა ბერლინში გამართულ ბიზნეს სამიტზე, თეთრ სახლში მისი ვიზიტის შემდეგ.

„ამერიკის მთავრობა ღიაა დისკუსიისთვის, უსმენს, მზადაა მიიღოს სხვა მოსაზრებები... შეგიძლიათ მათთან საუბარი. მაგრამ არ უნდა მისცეთ მათ თქვენი დაშინების უფლება", - დასძინა მან.

მერცის ვიზიტი ძირითადად სამ მთავარ თემაზე იყო ორიენტირებული: აშშ-ის მხარდაჭერა უკრაინის მიმართ, ნატოს მომავალი და ევროპის სავაჭრო მოლაპარაკებები ვაშინგტონთან.

როდესაც მერცს კონკრეტული შედეგების შესახებ ჰკითხეს, თქვა, რომ „ეჭვი არ ეპარებოდა, ამერიკის მთავრობა ერთგულია ნატოს მიმართ" და რომ თეთრი სახლი და კანცელარი გააძლიერებდნენ ორმხრივ სავაჭრო პარტნიორობას.

„ჩვენ კონსულტაციებს გავუწევთ ორ წარმომადგენელს, რომლებიც ამჟამად ინტენსიურად საუბრობენ ერთმანეთთან ევროპულ ჩარჩოში ჩადებული გერმანულ-ამერიკულ სავაჭრო ურთიერთობების შესახებ", - თქვა მან.

მერცმა განაცხადა, რომ ალბათ პარასკევს ვრცლად მიაწვდის ინფორმაციას ევროკომისიის პრეზიდენტ ურსულა ფონ დერ ლაიენს. ევროკომისია მუშაობს ტრამპთან ფართომასშტაბიანი სავაჭრო შეთანხმების მიღწევის საკითხზე, რომელმაც ამ კვირაში ფოლადსა და ალუმინზე ტარიფები 50 პროცენტამდე გააორმაგა.

„ეს არ იყო პრესკონფერენცია, არამედ კარგი შოუ ოვალურ კაბინეტში", - თქვა მერცმა შეხვედრის შესახებ, როცა ტრამპმა მერცს „ძალიან კარგი ადამიანი უწოდა, ვისთანაც ურთიერთობაა საჭირო" და ოპტიმიზმი გამოთქვა, რომ აშშ საბოლოოდ მიაღწევდა „კარგ სავაჭრო შეთანხმებას" ევროკავშირთან. ტრამპმა ასევე აღნიშნა, რომ მას არ აქვს გეგმა გერმანიაში განლაგებული თითქმის 35 000 ამერიკელი ჯარისკაცის გაყვანის შესახებ.

საქართველოს სტრატეგიული ანალიზის ცენტრის გეოპოლიტიკური კვლევების ხელმძღვანელი ვახტანგ მაისაია აცხადებს, რომ ნატოდან ამერიკის გასვლის საკითხი ვაშინგტონში შიგადაშიგ ხდება-ხოლმე აქტუალური და ვარაუდობს, რომ ამ რიტორიკას ტრამპი ისევ დაუბრუნდება.

„ნატოს ხერხემალი არის აშშ - ფაქტობრივად, ნატოს მთლიანი ბიუჯეტის დაახლოებით 60 პროცენტი აშშ-ზე მოდის. დავიწყოთ იმით, რომ სწორედ აშშ იყო ნატოს შექმნის ინიციატორი. აქედან გამომდინარე, ნატოში მისი როლი გადამწყვეტია. თუ აშშ გავა ალიანსიდან, ნატო უბრალოდ დაიშლება.

„სხვათა შორის, ეს საკითხი - ნატოს დაშლის შესაძლებლობა - პირველად არ დგას. მახსოვს, როცა ნატოში ვმუშაობდი, ჯორჯ ბუშის (უმცროსის) პრეზიდენტობის დროსაც დადგა ეს კითხვა: უნდა დაშლილიყო თუ არა ნატო. ეს მაშინაც აქტუალური თემა იყო. მე იმ პერიოდში შევხვდი ნატოს გენერალურ მდივანს საქართველოს მისიის სახელით, რათა აღნიშნული საკითხი განხილულიყო პარტნიორ სახელმწიფოსთან.

„საბოლოოდ, მაშინ ეს თემა გადაიდო. როგორც ჩანს, პრეზიდენტი ტრამპი მას კვლავ უბრუნდება. ალბათ ნატოს ჰააგის სამიტზე ეს საკითხი კვლავ აქტუალური გახდება, რადგან აშშ წევრი სახელმწიფოებისგან თავდაცვის ხარჯების 5 პროცენტამდე გაზრდას ითხოვს. ეს უკვე სერიოზული გამოწვევაა: აღნიშნულ სტანდარტს ამ ეტაპზე მხოლოდ აშშ, დიდი ბრიტანეთი, პოლონეთი და ეტაპობრივად საფრანგეთი და გერმანია ასრულებენ. სხვა ქვეყნების მზადყოფნა უცნობია, რაც სიტუაციას საკმაოდ დამაფიქრებელს ხდის."

მაისაია ამბობს, რომ თუ აშშ ნატოს დატოვებს, ის დაიშლება. „ეს უკვე აქსიომაა."-დასძინა ვახტანგ მაისაიამ.