თვითმმართველობის არჩევნების საკითხმა ოპოზიციაში უთახმოება გამოიწვია და შესაძლოა ერთიანი ბოიკოტიც არ გამოვიდეს. თანდათან უკვე იკვეთება კონტურები ვინ შეიძლება გავიდეს ადგილობრივ არჩევნებში. ყოფილი პრემიერის გიორგი გახარიას პარტია აცხადებს, რომ ამისთვის პარტია ემზადება, თუმცა, მიაჩნია, რომ "დღეს მზად არ არის გადაწყვეტილებისთვის".
ბარიერგადალახული დანარჩენი ოპოზიცია კვლავ ბოიკოტის რეჟიმშია, ნაწილს კი ნაადრევად მიაჩნია პოზიციის დაფიქსირება. თუმცაღა, "კოალიცია ცვლილებებისთვის" ერთ-ერთი ლიდერი ნიკა მელია აცხადებს, რომ ოპოზიციური პარტიების ნახევარი სერიოზულად ფიქრობს ადგილობრივ არჩევნებზე გასვლას, თუმცა, ის კონკრეტულად არ ასახელებს რომელს სურს.
"ქართული ოცნება" კი აცხადებს, რომ თუკი ოპოზიცია არჩევნებში მონაწილეობას მიიღებს, „საზოგადოების მხრიდან კიდევ ერთხელ იგემებს უდიდეს მარცხს", ხოლო, თუკი არ მიიღებს, ქართული პოლიტიკური სპექტრისთვის უკეთესი იქნება, რადგან „ჯანსაღი ოპოზიციისთვის ადგილი გამოთავისუფლდება".
თვითმმართველობის არჩევნები, ოპოზიცია და "ქართული ოცნება"
ანალიტიკოსი ვახტანგ ძაბირაძე "რეზონანსთან" აცხადებს, რომ ადგილობრივი თვოთმმართველობის არჩევნების თემის წამოწევა "ქართული ოცნების" წისქვილზე ასხამს წყალს, რადგან ახალი არჩევნების საკითხი უკანა პლანზე იწევს, ოპოზიციაში კი უთანხმოება შეაქვს.
"როგორც კი ადგილობრივ თვითმმართველობის მონაწილოება-არმონაწილოების საკითხი დაისვა, ეს თემა "ქართული ოცნებიდან" იყო წამოსული, მას სურდა, რომ ახალ არჩევნებიდან ლაპარაკი თვითმმართველობის არჩევნებზე გადაემისამართებინა. მან ეს მარტივი მიზეზის გამო მოახერხა, რადგან აღმოჩნდნენ პარტიები, რომლოებმაც თქვეს, რომ მათთვის ეს საკითხი კატეგორიულად მიუღებელია და ამ არჩევნებში მონაწილოება არ უნდა მივიღოთო და სხვა პოლიტიკურ ძალებსაც მოსთხოვეს, რომ თავიანთი პოზიცია დაეფიქსირებინათ.
"ამან გარკვეული უხერხულობები გამოიწვია და სიტუაცია უბრალოდ წავიდა ისე, რომ ხელისუფლებამ არა მარტო იმას მიაღწია, რომ დისკუსია ადგილობრივ თვითმმართველობის არჩევნებზე დაიწყო და საპარლამენტო არჩევნებმა სადღაც მეორე პლანზე გადაინაცვლა, არამედ იმასაც, რომ ოპოზიციურ ერთიანობაში გარკვეული დაპირისპირებაა.
"ადრეც ვამბობდი და ახლაც იგივეს ვიმეორებ, რომ სრულიად პოლიტიკური სიბრიყვეა, რომ დღეს ადგილობრივ არჩევნებზე ილაპარაკო მიიღებ თუ არა მონაწილოებას. ეს პოლიტიკური პროცესია და არავინ არ იცის სექტემბერში რა ვითარება იქნება. იქამდე დიდი დროა და პროცესი მიდის, ნელ-ნელა ხდება პოლიტიკური ვითარების ცვლილებაც. თუნდაც ის განცხადება, რაც "ქართულმა ოცნებამ" გააკეთა, რომ თურმე პარტიებს არ აკრძალავს, ნიშნავს იმას, რომ ზეწოლა და სანქციები გრძელდება.
"არ ვიცით რა იქნება სექტებმერ-ოქტომბერში და დღეს ამ გადაწყვეტილების მიღება მიმაჩნია პოლიტიკურად არასწორი. გარდა ამისა, ეს დაპირისპირებაა, ეს ხომ ჩვეულებრივი პოლიტიკური პროცესი არაა, ფაქტიურად სამოქალაქო დაპირისპირების ზღვარზე ვართ.
ასეთ დროს, როგორ შეიძლება დაპირისპირებაში მყოფმა პოლიტიკურმა ძალამ, ექვსი თვით ადრე გამოაცხადო, რას გააკეთებ ექვსი თვის შემდეგ. ეს ხომ პოლიტიკური მოწინააღმდეგისთვის მიცემული კარტია და თუ მან იცის რას გააკეთებ, მოწინააღმდეგე გააკეთებს იმას, რაც თავისთვის უნდა.
"არჩევნებში ვიღაცა მონაწილოებას აუცილებლად მიიღებს და აქ კიდევ სამსჯელო და საფიქრალია რა და როგორ სჯობს, მაგრამ მანამდე ეს თემა ოპოზიციურ სპექტრში საერთოდ არ უნდა განხილულიყო, ეს ხელისუფლებისთვის ყველაზე კარგი პასუხი იქნებოდა, მაგრამ ვიღაცეებს ძალიან ეჩქარებათ ხოლმე პოზიციების დაფიქსირება და ფსევდორადიკალური განცხადებების კეთება.
რადიკალური განცხადებების კეთება კარგია მაშინ, როცა ამას შესაბამისი ძალა და მექანიზმები გაქვს და ისე რამდენიც გინდა ილაპარაკე. რამდენი განცხადებაც არ უნდა გავაკეთო, ეს ერთი კაცის განცხადება მეტი არაფერი.
ამ განცხადებებთანაც ოპოზიცია ფრთხილად უნდა იყოს, თუ უნდა ქვეყანაში არსებული რეალობა შეცვალოს",- განაცხადა ვახტანგ ძაბირაძემ.
ანალიტიკოსი რამაზ საყვარელიძე "რეზონანსთან" აცხადებს, რომ ოპოზიციას გახარიას პოზიციის გამო, უკვე ეტყობა გახლეჩვის ნიშნები თვითმმართველობის არჩევნების ბოიკოტთან დაკავშირებით.
"ოპოზიციას უკვე ეტყობა მაგ პიროვნებასთან (გახარიასთან) დაკავშირებით გახლეჩვის ნიშნები, იქ კომისიაზე მისვლამაც გახლეჩვისმაგვარი პროცესი გააჩინა, ალბათ ადგოლობრივი არჩევნები დამატებითი ფაქტორი გახდება, მაგრამ მეორეს მხრივ როგორც ჩანს, გახარია არ აპირებს ოპოზიციის არც არჩევნების და არც პარლამენტის მუშაობის მიმართ ბოიკოტს აჰყვეს",- განაცხადა ანალიტიკოსმა.
საყვარელიძე ფიქრობს, რომ გახარია პარლამენტშიც შევა და ადგილობრივ არჩევნებშიც მიიღებს მონაწილოებას. კითხვაზე, ვინ შეიძლება გაიზიაროს გახარიას პოზიცია ოპოზიციური ფლანგიდან, საყვარელიძემ გვითხრა:
"თითქმის დარწმუნებული ვარ და უთქვამს კიდეც, რომ შესაძლოა ბარიერგადაულახავმა იაგო ხვიჩიას "გირჩმა" მიიღოს მონაწილეობა (ადგილობრივ არჩევნებში), დანარჩენს რაც შეეხება, თუნდაც "ლელოს" კოალიცია, არ მგონია ჯერ ამ პროცესში ასე ღრმად შევიდნენ, მაგრამ მაინც ვვარაუდობ, რომ ეს დამოკიდებული იქნება უცხოეთიდან სიგნალებზე.
"ვვარაუდობ, რომ ჯერჯერობით უცხოეთიდან ითხოვენ, რომ არსებობდეს ხელისუფლების მიმართ უკმაყოფილო დაუმორჩილებელი პარტიების ჯგუფი, იმისთვის, რომ პოლიტიკური კრიტიკა შეეძლოთ ჩვენი ხელისუფლებისა. თუკი დასავლეთს იმ დროისთვის ეს განწყობილება ჩაუქრება და მართლაც პროგნოზი ჯერ ძალიან ადრეა, მაშინ მემგონი პარლამენტშიც შეიძლება შევიდნენ, მიზეზის მოფიქრება რთული არაა",- განაცხადა საყვარელიძემ.
მისი თქმით, ბოიკოტი არასწორია, რადგან თუ ოპოზიციურმა პარტიებმა ადგილობრივ არჩევნებში მონაწილოება არ მიიღეს, ისინი მომავალი საპარლამენტო არჩევნებისთვის ფაქტიურად ჩაქრებიან.
"ბოიკოტი ჯერ ერთი ოპოზიციისთვისაა ცუდი და ასევე ქვეყნისთვის, რადგან ქვეყანას ოპოზიციური პარტიები სჭირდება. მეორე ვარიანტია კიდევ, რაც მათ ჩაქრობას შეუწყობს ხელს, შესაძლოა მათ ადგილზე ახალი ოპოზიციური პარტიები შემოვიდნენ, მაშინ მათი დაბრუნებაც კი არ უშველის და არ დაუბრუნდებათ ძველი რეიტინგი",- განაცხადა რამაზ საყვარელიძემ "რეზონანსთან".
გახარიას პოზიცია
"საქართველოსთვის" თავმჯდომარემ გიორგი გახარიამ განმარტა, რომ ის დღეს მზად არ არის გადაწყვეტილებისთვის, მიიღებს თუ არა მონაწილეობას თვითმმართველობის არჩევნებში, თუმცა მუნიციპალურ არჩევნებისთვის ემზადება, ისევე, როგორც ახალი საპარლამენტო არჩევნებისთვის. ის ოპოზიციურ პარტიებს მოუწოდებს, ყველამ თავის საქმეს მიხედოს.
"ჩვენ ბევრჯერ გვაქვს ნათქვამი, ნებისმიერი პოლიტიკური პარტია ყოველთვის უნდა ემზადებოდეს ნებისმიერი არჩევნებისთვის. ახალს არაფერს ვამბობ. ყველანი ერთად ვცდილობთ დღეს, მივაღწიოთ საპარლამენტო არჩევნებს.
შესაბამისად, ჩვენ - ეს საპარლამენტო არჩევნები ერთად იქნება, მუნიციპალურ არჩევნებამდე იქნება...მუნიციპალურ არჩევნებამდე თუ არ იქნება, თქვენ როგორ ფიქრობთ, მუნიციპალური არჩევნების შემდგომ საპარლამენტო ახალი არჩევნები დღის წესრიგიდან მოიხსნება? - არ მოიხსნება.
შესაბამისად, ადამიანებმა, რომლებსაც თავიანთი პოლიტიკური გადაწყვეტილება თვითონ აქვთ მისაღები და უყურებენ აი, გახარია პირველი როდის იტყვის, მან მიიღოს პირველი პოლიტიკური ზიანი და მერე ჩვენც მივყვებით, ყველამ თავის საქმეს მიხედოს რა. მე ვამბობ ერთ რამეს: ჩვენ ვემზადებით, ნებისმიერი შემდეგი არჩევნებისთვის, რადგან, როდესაც შენ ხარ პოლიტიკური პარტია, მზად უნდა იყო არჩევნებისთვის, ჩვენ ასე ვმოქმედებთ",-განაცხადა გახარიამ "ტვ პირველთან".
წამყვანის, ინგა გრიგოლიას კითხვაზე: "ანუ თქვენ ახლა ემზადებით ადგილობრივი თვითმმართველობის არჩევნებისთვის, გახვალთ ამ არჩევნებზე?", გახარიამ უპასუხა: "ჩვენ ახლა ვემზადებით, საპარლამენტო და ადგილობრივი არჩევნებისთვის ერთად, ოქტომბერში".
ამის შემდეგ, მას წამყვანმა კითხვა დაუსვა, "ვთქვათ, ერთად არ დაინიშნა?", რაზეც გახარიამ განაცხადა, რომ "თუ არ დაინიშნა, მერე გადავწყვეტთ, მივიღებთ თუ არა მონაწილეობას".
დამაზუსტებელ კითხვაზე, ამბობს თუ არა კატეგორიულად უარს, გახარიამ აღნიშნა:
"რა თქმა უნდა, არ ვამბობთ, რა თქმა უნდა არ ვამბობ, კატეგორიულად უარს არ ვამბობ, ვერავინ ვერ მათქმევინებს, რადგან ჩვენი და ჩვენი ამომრჩევლების გადასაწყვეტია" .
მისი თქმით, შესაბამისი კატეგორიული გადაწყვეტილებისთვის არჩევნებზე გასვლა-არგასვლის საკითხზე დღეს მზად არ არის.
"შეიძლება მივიღოთ, შეიძლება არ მივიღოთ, მე არ ვარ ამ გადაწყვეტილებისთვის დღეს მზად", - განაცხადა გახარიამ.
კიდევ ერთ რეპლიკაზე, აქვს ეჭვი, რომ ოთხივე ბარიერგადალახული პარტია, მისი ჩათვლით, რომ გავა არჩევნებზე, გახარიამ უპასუხა, „ყველაზე მაქვს ეჭვი" და დასძინა:
"მე გეუბნებით ჩემს თავზე, მარტივი ამბავია, დიახ, ვემზადებით. გიდასტურებთ, რომ ჩვენ მუნიციპალური არჩევნებისთვის ვემზადებით".
მის ამ პასუხს წამყვანის რეპლიკა მოჰყვა, "თუ მანამდე არ ჩატარდება ახალი საპარლამენტო არჩევნები, არის შანსი, რომ არჩევნებზე გახვიდეთ", გახარიამ უპასუხა, რომ "რა თქმა უნდა, არის შანსი".
რას ამბობს ბოიკოტში მყოფი ოპოზიცია
„კოალიცია ცვლილებისთვის" წევრის, ზურაბ გირჩი ჯაფარიძის განცხადებით, თვითმმართველობის არჩევნებში მონაწილეობას, ორი პირობის შესრულების გარეშე აზრი არ აქვს. პოლიტპატიმრების გათავისუფლებისა და ახალი არჩევნების დანიშვნის გარეშე, ეს იქნება არამხოლოდ პროტესტის მუხტის მოკვლა, არამედ რეჟიმის არაღიარების წყალში გადაყრა.
„ჩვენი პოზიცია არის ის, რაც საჯაროდ ბევრჯერ იქნა გაცხადებული, რომ სანამ ყველა პოლიტპატიმარი არ გათავისუფლდება და არ ჩაინიშნება ახალი საპარლამენტო არჩევნები, მათ შორის ახალი პირობებით, რომელზე შეთანხმებულია ყველა მსხვილი პოლიტიკური ჯგუფი, მანამდე არანაირ ადგილობრივ არჩევნებში მონაწილეობის მიღებას არ ვაპირებ პირადად. არანაირი ადგილობრივი არჩევნები არ იქნება და ეს ზღაპრები, რომ ვითომ ოპოზიციამ შეიძლება დედაქალაქი მოიგოს და ა.შ. ეს არის ბოდვა, ტყუილი. ამ არჩევნებზე ადამიანები არ მივლენ. შეუძლებელია ამ არჩევნების მოგება, ისინი დაწერენ იმას, რაც უნდათ. თბილისზე ილუზიები, რომ 26 ოქტომბერს ჯამში ოპოზიციამ მოიგო, ეს არის ილუზიები.
"რა გარემოებების ცვლილებებს ელოდებიან, უნდა ახსნას ყველამ, ვინც მაგას ამბობს. არსებობს ორი პირობა: ახალი საპარლამენტო არჩევნები და ყველა პოლიტპატიმრის გათავისუფლება. ამის გარდა შეიძლება რაღაც პირობები შეიცვალოს ისე, რომ ეს ორი პირობა არ დაკმაყოფილდეს და ამის გამო ღირდეს ადგილობრივ არჩევნებში მონაწილეობა, მაშინ ეს უნდა თქვან.
მაგრამ ესეთ პირობას ვერ ასახელებს ვერავინ. ყველა, ვინც ესეთ განცხადებებს აკეთებს, სინამდვილეში ელოდება იმას, რომ მოკვდეს პროტესტი და მერე თქვან, რომ ქუჩიდან არაფერი გამოგვივიდა და ტრიბუნას მაინც გამოვიყენებ. ნანახი მაქვს ეს 2020 -ის არჩევნების შემდეგ.
"გახარიამ თქვა, რომ ვერსიას იტოვებს, რომ შეიძლება [ადგილობრივ თვითმმართველობის არჩევნებში] მიიღოს მონაწილეობა.
ჩემი აზრით, თუ ეს ორი პირობა არ შესრულდა, ახალი საპარლამენტო არჩევნების ჩანიშვნა და პოლიტპატიმრების გათავისუფლება, მათ შორის ახალი საპარლამენტო არჩევნების ჩანიშვნა კონკრეტული პირობებით, რომელიც შეთანხმებულია ყველა მსხვილ ოპოზიციურ გუნდს შორის, არანაირი მონაწილეობას აზრი არ აქვს. პირიქით, ეს იქნება, პროტესტის მუხტის მოკვლა და ასევე, გარედან ის რაც აქამდე შევინარჩუნეთ, ამ რეჟიმის არაღიარება, სანქციების შემოღება და ა..შ ამ ყველაფრის წყალში გადაყრა",- განაცხადა ჯაფარიძემ.
ნახევარი ოპოზიციური პარტიები ამ წუთის მდგომარეობით სერიოზულად ფიქრობენ ადგილობრივ არჩევნებზე გასვლას, - ამის შესახებ "კოალიცია ცვლილებისთვის" ერთ-ერთმა ლიდერმა ნიკა მელიამ განაცხადა. მელია არ აკონკრეტებს პარტიებს, თუმცა აცხადებს, რომ ყველაფერს აკეთებს მისი გუნდი, მათ შორის თავად, რომ ეს არ მოხდეს.
"ყველაფერს ვაკეთებთ ჩვენ, მათ შორის მეც, რომ ეს არ მოხდეს, იმიტომ, რომ ფასი საპარლამენტო ბოიკოტისა, მე ვფიქრობ, აპრილის თვეში ყველამ ძალიან კარგად ვიგემეთ და ვნახეთ, კარგი გაგებით, რამხელა უპირატესობა აქვს ახლა, ამ უთანასწორო ბრძოლაში ქართველ ხალხს",-განაცხადა მელიამ "ტვ პირველის" ეთერში.
მისივე თქმით, რომ არა საპარლამენტო ბოიკოტი "ერთი ადამიანიც არ იდგებოდა, დღემდე ხომ საერთოდ არავინ იდგებოდა [აქციაზე]" და მაქსიმუმ ერთი კვირით გაეპროტესტებინათ, თუ ოპოზიციური პარტიები არ მიმართავდნენ ბოიკოტს.
მელია იმასაც ამბობს, რომ 2020-2021 წლების გამოცდილება, როგორც "გაკვეთილი, უნდა მივიღოთ".
სტატიების ნახვა შეგიძლიათ ამ ბმულზე
ახალი ამბების ნახვა შეგიძლიათ ამ ბმულზე