პარლამენტში უცხოური გავლენების შესახებ კანონის ახალი ვერსიის ინიცირება მოხდეს. ამის შესახებ სამშაბათს პლენარულ სხდომაზე „ხალხის ძალის" წარმომადგენელმა დიმირტი ხუნდაძემ განაცხადა. იგივემცდელობამ წლის დასაწყისში ერთხელ უკვე გამოიწვია დასავლეთის მწვავე კრიტიკა და საპროტესტო გამოსვლები თბილისში. ანალიტიკოსები „რეზონანსთან" საუბრისას აცხადებენ, რომ ახლაც, სავარაუდოდ, იგივე მოხდება. თუმცა აცხადებენ, რომ ხუნდაძე არ გამოხატავს მთელი საპარლამენტო უმრავლესობის პოზიციას.
აღსანიშნავია, რომ ბოლო თვეების განმავლობაში „ხალხის ძალა" პერიოდულად აკეთებს განცხადებას ამ ე.წ. აგენტების კანონის მიღების მიზანშეწონილობაზე. ანალიტიკოსთა ნაწილი აცხადებს, რომ მათთვის ასეთი დაჟინება გაუგებარია.
„ხალხის ძალის" წარმომადგენელისა და საპარლამენტო უმრავლესობის წევრის, დიმიტრი ხუნდაძის თქმით, არასამთავრობოების საკონტროლოდ მსგავსი კანონპროექტის მიღება მიზანშეწონილია და ის სულაც არ არის რუსული.
„გაიგეთ, რას ამბობენ ევროპაში? რიგი არასამთავრობოები არაკეთილსინდისიერად იქცევიანო. ინსტიტუტების მოტყუებას ცდილობენო. მათი ფინანსური კონტროლი აუცილებელიაო. იმასაც ამბობენ, საჭიროა რეგისტრაცია და გამჭვირვალობაო. მათ ხალხის ნდობა სჭირდებათ და ხალხს მეტი ინფორმაცია მათზეო. ეს ყვეალფერი ევროპული ან ამერიკული ინგლისურიდან კარგად გესმით, ქართულიდან რატომ ვერ გაიგეთ? ან თუ ვერ გაიგეთ, წაგეკითხათ მაინც. მაგრამ თუ დაუკითხავად დაგიკვეთეს პროტესტი, მაშინ ახალგაზრდებისთვის მაინც გეცდიათ, რომ მათ წაეკითხათ და არც მათ დასჭირდებოდათ პოლიცილების ცოცხლად დაწვა ქალაქის ცენტრში", - სამშაბათს პარლამენტში ხუნდაძემ.
ამას ოპოზიციის მხრიდან მაშნვე მოჰყვა გამოხმაურება.
„აქ შემომესმა ისევ რუსულ კანონზე საუბარი. აბა, გაბედეთ და კიდევ შემოიტანეთ, გაბედეთ, ვნახოთ რა მოხდება", - განაცხადა ხუნდაძის სიტყვების საპასუხოდ „ლელოს" წარმომადგენელმა ანა ნაცვლიშვილმა.
ანალიტიკოსი ზაალ ანჯაფარიძე „რეზონანსთან" ამბობს, რომ თავის დროზე ამ კანონმა დასავლეთის მწვავე კრიტიკა გამოიწვია და სწორედ ამიტომ არ მოხდა მისი მიღება. მისი აზრით, ახლაც მსგავსი საერთაშორისო რეაქცია იქნება, თუმცა ნაკლებად მოსალოდნელია, რომ მსგავსი კანონის ინიციფრება კიდევ მოხდეს, რადგან ხუნდაძის განცხადება არ წარმოადგენს უმრავლესობის აზრს.
„კიდევ ერთხელ მინდა აღვნიშნო, რომ ხელისუფლებას ეს კანონი მწვავე პროტესტის გამო არ გაუწვევია. ხელისუფლებამ ეს კანონპროექტი ევროკავშირის და აშშ-ის მწვავე რეაქციის გამო გაიწვია. მათ მიახვედრეს, რომ თუ ეს კანონი იქნებოდა მიღებული, საქართველო დაემშვიდოდებებოდა კანდიდატის სტატუსს.
„მეორეც, მე არ მგონია, რომ ხელისუფლებამ ისევ შემოიტანოს კანონი მანამდე, ვიდრე ევროკავშირში არ იქნება მიღებული თუნდაც მსგავსი კანონი. ჩემი ვარაუდით, ის დაელოდება ევროკავშირში ამ კანონპროექტთან დაკავშირებული საკითხის ასე თუ ისე გადაწყვეტას და მხოლოდ ამის შემდეგ დაიწყებს ფიქრს, შემოიტანოს თუ არა კანონი.
„დიმიტრი ხუნდაძე არის ერთი კონკრეტული დეპუტატი და შედის საპარლამენტო უმრავლესობაში. ეს რომ საპარლამენტო უმრავლესობის ლიდერს ეთქვა, საპარლამენტო უმრავლესობის სახელით, მაშინ უკვე სხვა დატვირთვა ექნებოდა ამ განცხადებას. ამ შემთხვევაში კი, ჩემი აზრით, ეს არის ბატონი ხუნდაძის კერძო მოსაზრება", - განაცხადა „რეზონანსთან" ზაალ ანჯაფარიძემ.
ანალიტიკოსი რამაზ საყვარელიძე კი „რეზონანსთან" აცხადებს, რომ მისთვის გაუგებარია „ხალხის ძალის" ასეთი დაჟინება ამ ერთ კონკრეტულ კანონთან დაკავშირებით.
„მწვავე პროტესტი უცხოელების მხრიდან იყო მაშინ და დარწმუნებული ვარ, რომ ახლაც იგივეს გამოიწვევს. ამჯერად თუ ისეთი ხმამაღალი არ იქნა, ჩუმი გაღიზიანება მაინც მოჰყვება ამას. ამიტომ სრულიად გაუგებარია ასეთი დაჟინება, მიუხედავად იმისა, რომ დადებითი შედეგები მოჰყვება ამ კანონის მიღებას.
„მოდით, ხალხის თვალითაც შევხედოთ. ხალხის თვალით თუ შევხედავთ, კიდევ ბევრი რამეა ისეთი, რაც რეგულაციას ითხოვს იმისთვის, რომ ხალხის ინტერესები უფრო გათვალისწინებული იყოს. მხოლოდ ამ კანონის ამოჩემება მემგონი არ იქნება პიარის თვალსაზრისით მათთვის მომგებიანი. არჩევნები მოდის და მემგონი ამას უნდა გაუწიონ ანგარიში.
„რატომ წამოწია ეს საკითხი უმრავლესობამ მაშინ, როცა კანდიდატის სტატუსს ველოდებით? არც თავის დროზე იყო ჭკვიანური ეს ნაბიჯი და ახლაც რამე ჭკვიანურს ნუ ელოდებით", -განაცხადა „რეზონანსთან" რამაზ საყვარელიძემ.
სტატიების ნახვა შეგიძლიათ ამ ბმულზე
ახალი ამბების ნახვა შეგიძლიათ ამ ბმულზე