ხარკივის რეგიონული სამხედრო ადმინისტრაციის ხელმძღვანელის, ოლეგ სინეგუბოვის განცხადებით, რუსულმა ძალებმა ხარკივის ოლქი დაბომბეს, რის შედეგადაც ერთი ადამიანი დაიღუპა, ერთი კი დაშავდა.

"დღეს, დაახლოებით 14:30 საათზე, ზოლოჩივის თემის სოფელ პეტროვკაში 67 წლის ქალი დაბომბვის შედეგად დაიღუპა. დარტყმა მოხდა სამეურნეო შენობებსა და საცხოვრებელ კორპუსებზე.

დღესვე ვოლჩანსკი ოკუპანტების ცეცხლის ქვეშ იყო. ხუთსართულიან კორპუსსა და კერძო სახლში დარტყმა MLRS-დან დაფიქსირდა. დაშავებულია 49 წლის კაცი. ის ჰოსპიტალიზებულია და მისი მდგომარეობა საშუალო სიმძიმისაა", - თქვა ხარკივის რეგიონული სამხედრო ადმინისტრაციის ხელმძღვანელმა.

რუსეთი უკრაინაში 2022 წლის 24 თებერვალს შეიჭრა. რუსულ სამხედრო ძალებს ათასობით მშვიდობიანი მოქალაქის სიცოცხლე ემსხვერპლა. ლტოლვილად და იძულებით გადაადგილებულ პირად 10 მილიონზე მეტი ადამიანი იქცა.