ოპოზიცია იხმაურებს, მჭახე განცხადებებს გააკეთებს, მაგრამ როცა საზოგადოებას სრული ახსნა-განმარტება მიეწოდება თუ ეს საუბარი რატომ და რისთვის შედგა, ეს ყველაფერი ჭიქაში ქარიშხლის ატეხვის გარდა, სხვა ეფექტს ვერ გამოიღებს - ამის შესახებ „რეზონმანსთან" ანალიტიკოსმა ზაალ ანჯაფარიძემ განაცხადა იმ აუდიოჩანაწერზე საუბრისას, რომლის თანახმად, სპეცწარმომადგენელი რუსეთთან ურთიერთობის საკითხებში ზურაბ აბაშიძე და რუსეთის ფედერაციის საბჭოს საერთაშორისო კომიტეტის თავმჯდომარე გრიგორი კარასინი ახალი მაგისტრალის მშენებლობის შესახებ საუბრობენ. ზურაბ აბაშიძე კარასინს ეუბნება, რომ ზემო ლარსის მიმართულებით პარალელური მაგისტრალის მშენებლობა მიმდინარეობს.
აბაშიძე-კარასინის საუბარი „იუთბზე" „კიბერ კარმას" არხზე გავრცელდა. საუბრის შინაარსს ოპოზიციამ სახელმწიფო ინტერესების ღალატი უწოდა, „დროამ", სტრატეგია აღმნაშენებელმა" და „გირჩი მეტი თავისუფლებამ" სპეციალური ბრიფინგიც კი გამართეს. „ლელომ" კი აბაშიძეს პარლამენტში საგარეო ურთიერთობათა კომიტეტის სხდომაზე დაიბარა.
„არ მგონია, აბაშიძე-კარასინის სატელეფონო საუბრიდან ან ნებისმიერი განცხადებიდან, რომელიც შეიძლება რუსული მხრიდან კეთდებოდეს, ვინმეს საფრთხეებზე საუბრის საფუძველი ჰქონდეს", - ამის შესახებ ჟურნალისტებთან „ქართული ოცნების" დეპუტატმა მიხეილ სარჯველაძემ განაცხადა. ის არ ფიქრობს, რომ „ვინმეს აქვს საბაბი იმისა, ზედმეტად გაზრდილ საფრთხეებზე ისაუბროს".
„ავტომატურად იბადება განცხადებების საფრთხეების შემცველად მონათვლის საფუძველი. არ მგონია, რომ საფუძვლიანია სკეპტიციზმი, რომელსაც კრიტიკული დამოკიდებულება ავლენს - ჩვენი ოპონენტების მხრიდან აჟიოტაჟი ხელოვნურად არის შექმნილი... საქართველოს აქვს ურყევი, მტკიცე პოზიცია, რომელსაც მუდმივად ამბობს და აფიქსირებს - საქართველო იქნება შეურიგებელი ნებისმიერ ხელყოფასთან დაკავშირებით, რითაც საქართველოს სასიცოცხლო ინტერესებს შეიძლება ემუქრებოდეს საფრთხე. არ არსებობს მიზეზი, რის გამოც საქართველომ შეიძლება ამ მტკიცე პოზიციას გადაუხვიოს," - განაცხადა მიხეილ სარჯველაძემ.
თავად ზურაბ აბაშიძე ამბობს, რომ ჩანაწერი ორჯერ მოისმინა, ავთენტურია და „სასკანდალო ამაში არაფერია".
„რაღაცნაირად შეეცდებიან, რომ ეს წარმოაჩინონ, როგორც დიდი სკანდალი და თუ ამას მოისმენ მშვიდად და დააკვირდები, რაზე ვსაუბრობ, ასეთი საუბრები ჩვენ მაშინ გვქონდა. როცა იქმნება ფორსმაჟორული სიტუაცია საზღვარზე სატრანსპორტო თვალსაზრისით, მაშინ ჩვენ ერთმანეთს ყოველთვის ვუკავშირდებით და ეს ჩვეულებრივი მოვლენაა", - აღნიშნა ზურაბ აბაშიძემ საზოგადოებრივ მაუწყებელთან.
ანალიტიკოსი ზაალ ანჯაფარიძე „რეზონანსთან" აღნიშნავს, რომ შექმნილი გეოპოლიტიკური და საქართველო-რუსეთის არსებული ურთიერთობების ფონზე, ყველა თემა, რაც რუსეთს უიკავშირდება სიფრთხილის და განგაშის საფუძველია, და უპრიანი იქნებოდა თუ ჩანაწერის თაობაზე ოფიციალური ახსნა-განმარტებები იქნება, რათა სპეკულაციებისთვის სივრცე არ დარჩეს.
„ჩვენთან ნებისმიერი თემა, რაც რუსეთს უკავშირდება, შექმნილი გეოპოლიტიუკური სიტუაციის ფონზე და იქიდან გამომდინარე თუ ამ ქვეყანასთან რა ურთიერთობებიც გვაქვს, რაღაც სიფრთხილის და განგაშის საფუძველი და საგანი არის, რომ რაღაც ისეთი ხომ არ ხდება, რაც ჩვენს ინტერესებს აზიანებს?!
„იქიდან გამომდინარე, რომ ამდენი ჩასაფრებული ძალაა, ჩემი აზრით, უპრიანი იქნებოდა ეს საუბარი საჯარო გამხდარიყო, ამის თაობაზე ოფიციალური რელიზი გამოექვეყნებინათ და ახსნათ ზუსტად ის მიზეზები, რაც ბატონმა აბაშიძემ თავის ახსნა-განმარტებაში უკვე მოიყვანა. საზოგადოებისთვის მიეწოდებინათ ინფომაცია თუ რა, რატომ და რისთვის ხდება, რომ სპეკულაციებისთვის სივრცე არ დარჩნილიყო, ან შევიწროვებულიყო.
„ცალკე საკითხია თუ რა მეთოდებით და გზებით მოხდა ამ საუბრის ჩაწერა, რატომ მიაწოდეს მაინცდამაინც „ტვ პირველს"?! ეს დიდი ალბათობით დახურული საუბარი იყო და ამ საუბრის ჩაწერა მხოლოდ რუსეთის შესაბამის სამსახურებს შეეძლოთ. აქვე ერთ-ერთ გამოქვეყნებულ ჩანაწერში გიული ალასანიას ცნობილი გამონათქვამი მახსენდება, თუ ნოდარ მელაძის გადაცემას და „ტვ პირველს" ამ სენსიტიურ და დახურულ ინფორმაციას ვინ აწვდის, მან მინიშნება რუსეთის სპეცსამსახურებზე გააკეთა.
„კარასინის საუბრის ჩაწერა მხოლოდ შესაბამის სამსახურებს შეეძლოთ, რომელსაც ამაზე წვდომა და შესაბამისი აპარატურა გააჩნიათ და ა.შ. მერე ეს ჩანაწერები, რომ ერთ-ერთი ოპოზიციური ტელევიზიაში ხვდება, რომელიც ვნებათაღელვების აგორებას და ქვეყანაში სიტუაციის დაძაბვას ემსახურება, სპეცსამსახურების მიზანიც სწორედ ესაა, რომ ქვეყანაში სიტუაცია დაძაბოს. როგორც ჩანს, მათ მიზნებში ეს შედის.
„როდესაც შენი მოწინააღმდეგის მოქმედების ხელწერა იცი, როდესაც იცი, რომ ჩასაფრებულია და მოსალოდნელია, რომ ნებისმიერ დროს ასეთი ტიპის საუბარი გამოგიქვეყნოს, არ სჯობს, რომ შენ დაასწრო და საჯარო გახადო?! აუცილებელი არ იყო საუბრის მთელი შინაარსის გამოქვეყნება, უბრალოდ, ფაქტი დაფიქსირებულიყო, რომ ისაუბრეს", - განაცხადა ანჯაფარიძემ.
ის მიიჩნევს,რომ ჩანაწერში არაფერი სასკანდალო არაა, რადგან მსგავსი პრეტენზია მაგალითად სომხეთსაც გამოუთქვამს, რომ ლარსის გამშვები პუნქტი მზარდ ნაკადს ვერ აუდის.
„ჩემი აზრით, ამაში არაფერი სასკანდალო არაა, მე რამდენადაც ვიცი და ეს მხოლოდ ჩემი ინფორმაცია არაა, არაერთი პრეტენზიაა გამოთქმული, მათ შოროის ჩვენი მეზობელი სომხეთის მხრიდან, რომ ლარსის გამშვები პუნქტი ტვირთვების და ავტოკოლონების მზარდ რაოდენობას ვერ აუდის, რაც საათობრივ რიგებს, შეფერხებებს იწვევს და რა თქმა უნდა მერე ამას თანმდევი შედეგები აქვს, რომ ტვირთვები დანიშნულებოის ადგილზე დროზე ვერ ჩადის და იქ კიდევ სხვადასხბვა პრობლემები ჩნდება.
„კი ბატონო, აბაშიძე ინტერპოელაციის წესით კომიტეტზე დაიბარონ და იქ გაკეთდეს ახსნა-განმარტება, მაგრამ ეს რომ არ მომხდარიყო და ოპოზიციას ხელში კიდევ ერთი ე.წ. კოზირი არ მისცემოდა, ალბათ უკეთესი იქნებოდა, რომ ასეთი ტიპის ინფორმაციებზე მოკლე მიმოხილვა წინმსწრებად რომ ვრცელდებოდეს.
„ჩემი აზრით, ოპოზიცია იხმაურებს, მჭახე განცხადებებს გააკეთებს, მაგრამ როცა საზოგადოებას სრული ახსნა-განმარტება მიეწოდება თუ ეს საუბარი რატომ და რისთვის შედგა, ეს ყველაფაერი ჭიქაში ქარიშხლის ატეხვის გარდა, სხვა ეფექტს ვერ გამოიღებს", -განაცხადა ზაალ ანჯაფარიძემ „რეზონანსთან".
სტატიების ნახვა შეგიძლიათ ამ ბმულზე
ახალი ამბების ნახვა შეგიძლიათ ამ ბმულზე