თურქეთში, სტამბულში, სავარაუდოდ, ქმრის მიერ მოკლული 32 წლის თამთა ჯანჯღავას ცხედარი სენაკში საკუთარ საცხოვრებელ სახლში უკვე გადაასვენეს. ოჯახი და ახლობლები მკვლელობაში მის ქმარს ირაკლი შურღაიას ადანაშაულებენ. ოჯახის ინფორმაციით, ცოლ-ქმარს შორის კონფლიქტი ხშირად იყო და გოგონას ასე სატიკად მოკვლისთვის უმღლეს სასჯელს ითხოვენ.
დაუდასტურებული ინფორმაციით კი, როგორც მოკლულის ახლობლები აცხადებენ, მამაკაცმა ცოლის მოკვლიდან რმდენიმე საათში თურქეთ-საქართველოს საზღვარი ყალბი საბუთებით გადმოლახა და ის სამშობლოში იმყოფება. ისინი არ გამორიცხავენ, რომ იგი შურისძიებას გოგონას მეგობრებზე და ახლობლებზეც გეგმავდეს.
თუმცა, შინაგან საქმეთა სამინისტროში აცხადებენ, რომ მსგავს ინფორმაციას არ ფლობენ. თურქეთის პოლიცია კი გაქცეულს უკვე რამდენიმე დღეა ეძებს. უცნობია ჯერჯერობით მათ ჰქონდათ თუ არა საქართველოს პოლიციასთან კომუნიკაცია და რა სახის ინფორმაციები გაცვალეს.
მოკლული ახალგაზრდა ქალი ქმარს სამი წლის წინ გაშორდა, თუმცა, როგორც ახლობლები ყვებიან, გოგონას მასთან შერიგება მამაკაცის ნათესავებმა სთხოვეს. მან ცოლს თურქეთში ჩააკითხა და იქაც სისტემატიურად ძალადობდა მასზე.
ქმარმა, როგორც გოგონას ახლობლები ყვებიან, ცოლის მოკვლა ადრეც სცადა და ის სახის არეში დაჭრა. ცოლმა მას პოლიციაში უჩივლა, თუმცა მან ქვეყნიდან გაქცევა მოასწრო. მიუხედავად ამისა, გარდაცვლილმა, როგორც ახლობლები ამტკიცებენ, შერიგება მხოლოდ შიშის გამო გადაწყვიტა, რადგანაც თავის დებზე ანგარიშწორების ეშინოდა.
ახლობლების ინფორმაციით, სიცოცხლის ბოლო დღეებში შეშინებული თამთა ჯანჯღავა მოსალოდნელი საფრთხის გამო სტამბულში, საკუთარ ოთახშიც კი იყო ჩაკეტილი, თუმცა ამან ვერ გადაარჩინა.
ახალგაზრდა ქალს სასიკვდილო ჭრილობები დანით აქვს მიყენებული. ცხედარს ცემის კვალიც აღენიშნება. ის თურქეთში ქართველ ემიგრანტებს სასტიკად ნაცემი არა ერთხელ უნახავთ.
„სასტიკად სცემდა. ამაზრზენი ადამიანია. ნარკოტიკებსაც მოიხმარდა და ცოლის ხარჯზე ცხოვრობდა. ჩვენს მეგობრების მიმოწერაზეც კი ეუბნებოდა, რომ წამაკითხეო. ყველაზე და ყველაფერზე ეჭვიანობდა. მერე სასტიკად სცემდა. ბოლო დროს ფოტოებიც გვაჩვენა, რომ ნაცემი იყო. ყელზე, ფეხებზე , წელზე, სულ დალურჯებები ჰქონდა.
„ვუთხარით საქართველოში დაბრუნებულიყო. მიპასუხა, რომ ხელფას ელოდებოდა, ბავშვებს სასკოლოდ ტანსაცმელი უნდა ვუყიდო და წამოვალო. ვეღარ მოასწრო“, - ყვება „რეზონანსთან“ გარდაცვლილის მეგობარი.
თამთა ჯანჯღავას ოჯახის წევრები კი ამბობენ, რომ გოგონას სხეულზე მრავლობითი დაზიანებები აქვს მიყენებული. ის ფაქტობრივად დაჩეხილია და ტანზე ადგილი არა აქვს, რომ დანა არ ჰქონდეს დარტყმული. მას ჭრილობები. ზურგზე, ხელზე, სახეზე და გულ-მკერდის არეშის აქვს მიყენებული.