ჩინეთი გამორჩეულად საინტერესო, ახალი ტურისტული მიმართულებაა ჩვენი ქვეყნისთვის, დივერსიფიკაციის პოლიტიკისთვის, ჩვენ ძალიან აქტიურად ვმუშაობთ კერძო სექტორთან ერთად ჩინეთში ჩვენი ქვეყნის პოპულარიზაციის კუთხით და განვაგრძობთ დაწყებულ მოლაპარაკებებს იმისთვის, რომ გვქონდეს კიდევ უფრო მეტი პირდაპირი ფრენა ჩინეთთან, - განაცხადა ეკონომიკის მინისტრის მოადგილემ, მარიამ ქვრივიშვილმა რომელიც საქართველოს პირველ ვიცე-პრემიერთან, ლევან დავითაშვილთან ერთად, პეკინში სამუშაო ვიზიტის ფარგლებში ჩინეთის ავიაკომპანიების - Hainan Airlines-ის, Capital Airlines-ის და Sichuan Airlines-ის ხელმძღვანელებს შეხვდა.

როგორც მარიამ ქვრივიშვილმა აღნიშნა, სავიზო რეჟიმის გაუქმების შემდგომ გაზრდილია ტურისტული ნაკადები ჩინეთიდან, ასევე მგზავრთნაკადი ორ ქვეყანას შორის.

„აქედან გამომდინარე, ვხედავთ, რომ ინტერესი საქართველოს, როგორც ტურისტული მიმართულების მიმართ ჩინეთიდან მზარდია. რა თქმა უნდა, ჩვენი მიზანია, რომ გვყავდეს მეტი ახალი ავიაკომპანია ჩინეთიდან, გვქონდეს მეტი პირდაპირი ფრენა ჩინეთის სხვადასხვა პროვინციისა და აეროპორტის მიმართულებით, შესაბამისად, პეკინში ვიზიტის ფარგლებში ვაწარმოვეთ მოლაპარაკებები, რომ დავაინტერესოთ ადგილობრივი ავიაკომპანიები საქართველოში პირდაპირი ფრენების ოპერირებისთვის", - განაცხადა მინისტრის მოადგილემ.

მარიამ ქვრივიშვილის თქმით, აქტიურად გაგრძელდება ქვეყნის პოპულარიზაციისთვის მნიშვნელოვანი მარკეტინგული კამპანიები იმისთვის, რომ ხელშესახებად გაიზარდოს მგზავრთნაკადი, ისევე როგორც ტურისტული ნაკადები ჩინეთიდან, რაც დადებითად აისახება ჩვენი ქვეყნის ეკონომიკასა და ტურიზმის გაძლიერებაზე.