სამხრეთ უკრაინაში, ქალაქ მიკოლაევში, ოკუპანტების საჰაერო თავდასხმას უკრაინის ერთ-ერთი უმდიდრესი ბიზნესმენი ალექსეი ვადატურსკი და მისი მეუღლე ემსხვერპლნენ, - ამის შესახებ BBC წერს.

74 წლის ვადატურსკი და თავისი მეუღლე რაისა მაშინ დაიღუპნენ, როდესაც რაკეტა მათ სახლს მოხვდა.

ბიზნესმენი ფლობდა კომპანია Nibulon-ს, რომელიც მარცვლეულის ექსპორტითაა დაკავებული. ვადატურსკის უკრაინის გმირის წოდება აქვს მინიჭებული. Forbes-ის 2020 წლის შეფასებით, ალექსეი ვადატურსკი $450 მილიონს ფლობდა.

„ბატონმა ვადატურსკიმ ბევრი რამ გააკეთა მიკოლაევის რეგიონისთვის და ზოგადად უკრაინისთვის. მისი წვლილი სოფლის მეურნეობისა და გემთმშენებლობის ინდუსტრიის, რეგიონის განვითარებაში, ფასდაუდებელია", - ასე გამოეხმაურა ბიზნესმენის დაღუპვას მიკოლაევის ოლქის გუბერნატორი ვიტალი კიმი.

იერიშის დროს, არაერთი საცხოვრებელი სახლი, ასევე, სასტუმრო, სპორტული კომპლექსი, ორი სკოლა და ავტოგასამართი სადგური დაზიანდა.