რეზონანსი
13.05.2021

თავდაცვის მინისტრმა ჯუანშერ ბურჭულაძემ პარლამენტში, მინისტრის საათის ფარგლებში ეროვნული რეზერვის, სამობილიზაციო სისტემისა და სავალდებულო სამხედრო სამსახურის შესახებ ისაუბრა.

მისი განცხადებით, შემუშავებულია თავდაცვის კოდექსის ახალი პროექტი, რომელიც ითვალისწინებს სამხედრო სავალდებულო სამსახურის გავლას მხოლოდ თავდაცვის სამინისტროს სისტემაში.

"ჩვენი ჯარის მზადყოფნისა და ბრძოლისუნარიანობის ასამაღლებლად განსაკუთრებული მნიშვნელობა აქვს მის ინსტიტუციურ განვითარებას, რომელმაც უნდა შექმნას მყარი და გრძელვადიანი საფუძველი მისი მდგრადი განვითარებისთვის. თავდაცვისუნარიანობის გასაძლიერებლად უმნიშვნელოვანესია ეფექტიანი და ქმედითი ეროვნული რეზერვისა და სამობილიზაციო სისტემის ჩამოყალიბება, რომლის მიზანია ჩვენი ჯარისთვის საბრძოლო მხარდაჭერისა და საბრძოლო უზრუნველყოფის შესაძლებლობების გაძლიერება. თქვენ იცით, რომ 2020 წელს ჩვენ გავაორმაგეთ ტერიტორიული რეზერვი და დამატებით მომზადდა კიდევ ოთხი ასეული. მიმდინარე წელს აქტიურ სარეზერვო სამსახურში მიღებული იქნება დაახლოებით 1000 ადამიანი, რაც კიდევ უფრო მეტად გაზრდის ჩვენს შესაძლებლობებს".- ამბობს ის.

ჯუანშერ ბურჭულაძის თქმით, მნიშვნელოვანად გაუმჯობესდა სავალდებულო სამხედრო სამსახურის პირობებიც, კერძოდ, გაუმჯობესდა წვრთნების ხარისხი და სოციალური პირობები.

"შემუშავებულია თავდაცვის კოდექსის ახალი პროექტი, რომელიც ითვალისწინებს სამსახურის გავლას მხოლოდ თავდაცვის სამინისტროს სისტემაში, სავალდებულო სამხედრო სამსახურის ვადის შემცირებას და სხვა მნიშვნელოვან ცვლილებებს. აღნიშნული რეფორმის მიზანია სავალდებულო სამხედრო სამსახურის მეტი პოპულარიზაცია, ერთიანი სტანდარტით გაწვრთნილი სამხედრო მოსამსახურეებისა და რეზერვის შექმნა. დარწმუნებული ვარ, თქვენთან მჭიდრო კონსულტაციით და თანამშრომლობით შევძლებთ ქვეყნისთვის მნიშვნელოვანი რეფორმის გატარებას".- განაცხადა მინისტრმა.

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე

ლიცენზია

Copyright © 2006-2021 by Resonance ltd. . All rights reserved
×