რეზონანსი
14.04.2021

„ნამახვანჰესის" საკითხზე ვიქნებით მედიატორი, ვმუშაობთ ორივე მხარესთან, რომ არ მოხდეს რადიკალიზაცია და დარჩეს სივრცე დიალოგისთვის, - ამის შესახებ საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ საპატრიარქოს მიერ „ნამახვანჰესთან" დაკავშირებით გავრცელებული განაცხადების კომენტირებისას აღნიშნა.

საპატრიარქოს საზოგადოებასთან ურთიერთობის სამსახურის ხელმძღვანელი აცხადებს, რომ საქართველოს საპატრიარქო პირველად არ ერევა ამ საკითხში.

„ხელშეკრულების პირობები ცხადი არ არის მოსახლეობის უმრავლესობისათვის, ეს იწვევს დაძაბულობას. ჩვენ ბოლო დღეებში ვუყურებთ, რომ ესკალაცია ხდება, პოლარიზებული არის პოზიციები. ამიტომ ჩავთვალეთ საჭიროდ, რომ გაკეთებულიყო განცხადება.

საპატრიარქო პირველად არ ერევა ამ საკითხში, ის დიალოგები, რომლებიც აქამდე შედგა დაპირისპირებულ მხარეებს შორის, ჩვენი ჩარევის შედეგად მოხდა.

ისმის მოსაზრებები იმასთან დაკავშირებით, საპატრიარქო რატომ არ ერევა, სინამდვილეში, ვმუშაობთ ორივე მხარესთან იმისათვის, რომ არ მოხდეს რადიკალიზაცია და დარჩეს სივრცე დიალოგისთვის.

არის გარკვეული კითხვები კონტრაქტის პირობებთან დაკავშირებით, მიზანშეწონილობასთან დაკავშირებით, ეკონომიკურ მხარესთან დაკავშირებით და ყველას უნდა ესმოდეს, რომ საპატრიარქოს არ ყავს გეოლოგების ჯგუფი, არც ეკონომისტების ჯგუფი რომელიც საპატრიარქოში მოამზადებდა დასკვნას.

ჩვენ რისი გაკეთებაც შეგვიძლია, არის ის, რომ მშვიდობისაკენ მოვუწოდოთ, კეთილგონიერება გამოიჩინონ ყველამ და დიალოგის სივრცე შექმნან, სადაც დაინტერესებულ მხარეს საშუალება ექნება, შეკითხვები დასვას, მიიღოს კომპეტენტური პასუხები და ამას ესწრებოდნენ პასუხისმგებელი პირები", - აღნიშნა დეკანოზმა ანდრია ჯაღმაიძემ.

საპატრიარქოს საზოგადოებასთან ურთიერთობის სამსახურის ხელმძღვანელი ამბობს, რომ „ნამახვანჰესის" კონტრაქტის პირობები უფრო დაწვრილებით უნდა იყოს განხილული და საზოგადოებას ობიექტური ინფორმაცია მიწოდოს.

„მიწის გასხვისებასთან დაკავშირებით ინფორმაცია ჩვენ შევიტყვეთ ძალიან გვიან, ამას მოყვა მეუფე სტეფანეს განცხადება, 100 წლით მიწის გადაცემა კომპანიისათვის იწვევს ძალიან ბევრ შეკითხვას. ამიტომ ვფიქრობ, რომ გაცილებით უფრო დიდი მსჯელობა უნდა გამართულიყო, კონტრაქტში ასეთი პირობების ჩადებამდე. მოსახლეობას რომ ეს სცოდნოდა და არ ყოფილიყო სიურპრიზი.

კონტრაქტის პირობები გაცილებით უფრო დაწვრილებით უნდა იყოს განხილული და საზოგადოებისთვის ობიექტური და სწორი ინფორმაცია იყოს მიწოდებული. ამ მიზანს ისახავდა საპატრიარქოს განცხადება, მოხდეს მოლაპარაკებები და კომპეტენტური და პასუხისმგებელი ხალხი, თანამდებობის პირები იყვნენ ჩართული პროცესში.

ჩვენ ვერ ვაფასებთ რეალურად ვერც ეკონომიურ მხარეს, ვერც კონტრაქტის სუსტ და ძლიერ მხარეებს, ამიტომ ვიქნებით, როგორც მედიატორი ამ პროცესში.

ჰესის მშენებლობა ექვსი თვის ან ერთი წლის წინ დაწყებული ამბავია, ეს დიდი ხნის წინ დაწყებული პროცესია, დღეს ყველა შეკითხვაზე რადიკალური პასუხის მიღება ვრცელი ანალიზის გარეშე შეუძლებელია", - განაცხადა დეკანოზმა ანდრია ჯაღმაიძემ.

საპატრიარქომ დღეს გაავრცელა განცხადება, რომელშიც აღნიშნულია, რომ შემაშფოთებელია დაძაბულობა რიონის ხეობაში. „მიგვაჩნია, რომ აუცილებელია შედგეს დიალოგი, სადაც დაინტერესებულ მხარეებს, პასუხისმგებელ პირებსა და სპეციალისტებს მიეცემათ საშუალება მათთვის მნიშვნელოვანი კითხვების დასმისა და პასუხების მოსმენისა. ეს დიალოგი არ უნდა იყოს ფორმალური, არამედ ყველა საშუალება უნდა იქნას გამოყენებული, რათა აღარ დარჩეს გაუგებრობები „ნამახვანჰესის" პროექტთან დაკავშირებით და საზოგადოებასაც ობიექტური ინფორმაცია მიეწოდოს", - აცხადებენ საპატრიარქოში.

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე

ლიცენზია

Copyright © 2006-2021 by Resonance ltd. . All rights reserved
×

sesionArray ( [s_logi] => rezoni_index )
cookieArray ( )