მმართველი პარტია და ოპოზიცია ეუთო-ს გენდივნის ხმაურიან განცხადებას აფასებენ, „ოცნებაში" მიაჩნიათ, რომ ფერიდუნ სინირლიოღლუმ 2024 წლის საპარლამენტო არჩევნების „მაღალ დონეზე ჩატარება" აღიარა, ოპოზიციონერები კი გენმდივნის კრიტიკას არ იღებენ.

ფერიდუნ სინირლიოღლუმ პორტუგალიაში ეუთო-ს ყოველწლიურ სესიაზე განაცხადა, რომ „ქართული ოპოზიციისთვის პარლამენტში 40%-ზე მეტის ქონა და ამის არგამოყენება სამართლიანი არ არის ხალხის მიმართ, რომელმაც აირჩია".

აქვე უნდა ითქვას, რომ ანალიტიკოსები არ ელიან იმას, რომ ეუთოს გენმდივნის განცხადება გარე პოზიციაზე გავლენას მოახდენს.

როგორც კონფლიქტოლოგი პაატა ზაქარეიშვილი „რეზონანსთან" აცხადებს, ეუთო-ს გენმდივანს ყურადღება უნდა გაემახვილებინა, რომ არჩევნების ფარულობა დაირღვა. ამასთან, ზაქარეიშვილს მიაჩნია, რომ ოპოზიცია მეტად კონსტრუქციული უნდა იყოს და ბოიკოტის ნაცვლად, ადგილობრივ არჩევნებში ჩაერთოს.

„ეუთო-მ ყურადღება უნდა გაამახვილოს, რომ არჩევნების ჩატარების დროს არ შესრულდა ერთ-ერთი მთავარი პრინციპი - ფარულობა. მასობრივი გაჟონვა სასამართლომ დაადასტურა, ამიტომ უცნაურია, რომ ამაზე ყურადღებას არ ამახვილებს. თუ ამაზე არ გაუმახვილებია ყურადღება, რომ არჩევნების ცენტრალური პრინციპი დაირღვა, მაშინ ეს 40% არაფერს არ ნიშნავს, უფრო მეტი უნდა ყოფილიყო და მაშინ ძალაუფლება აშკარად მიტაცებულია.

„მიუხედავად ყველაფრისა, ოპოზიცია მეტად კონსტრუქციული იყოს, ვფიქრობ, მაინც სჯობდა, რომ დათქმებით შესულიყვნენ, ეთქვათ, რომ ეს არალეგიტიმურია. წარმოიდგინეთ, რომ დღეს წულუკიანის კომისიაში ოპოზიცია ყოფილიყო, ამ კომისიას სულ სხვანაირი ხასიათი ექნებოდა და ყველაფერს თავზე დაახურავდნენ. ანდა ევროსაბჭოში რომ „ოცნების" დელეგაცია დადის, იქ აუცილებლად ოპოზიცია იქნებოდა და სულ სხვანაირი ლაპარაკი წავიდოდა სტრასბურგში, თუ სხვაგან. ასევე, უამრავი კანონი, რომელსაც ახლა ერთ დღეში იღებენ, თვეების განმავლობაში გაიწელებოდა. ნებისმიერ შემთხვევაში, ბრძოლას აზრი აქვს და ეს კუდაბზიკობა, რომ არ ვმონაწილოებ რაღაცაში, რადგან ჩემი მტერი გარეწარია, სწორად არ მიმაჩნია, მტერი ყოველთვის გარეწარია.

„მიუხედავად იმისა, რომ არ ვეთანხმები ეუთო-ს იმაში, რომ არ აფასებს ფარულობის დარღვევას, ოპოზიციამ ყველაზე ეფექტური ფორმა უნდა გამოიყენის სახელმწიფოს სამსახურში, სახელმწიფოს ინტერესებიდან გამომდინარე უნდა იმუშაოს და არა თავისი.

„ლეგიტიმაციის თემას ჩაბღაუჭებული ვართ, ესაა უაზრობა და ძალიან ეფემერული საკითხი, დედამიწის ზურგზე არჩევნების 80%-ის შემთხვევაში არალეგიტიმურია, ჩინეთში, რა, ლეგიტიმური არჩევნებია და ხალხის ნებას გამიხატავს? ანდა ირანში?

„ჩვენ ვართ რეალპოლიტიკაში, ანუ ვინც ძლიერია და ვისაც ძალა აქვს, ის იმარჯვებს, ჩვენს მხარეს ხალხის ძალაა, პროტესტი ჩვენს მხარესაა და რაც ხდება, ოპოზიციის დოყლაპიობაა. ის, რომ ოპოზიციის ნაწილი ბოიკოტზე მიდის, ეს კატასტროფაა, მათ მხოლოდ თავიანთი თავი ადარდებთ. რადგან თვლიან, რომ მაინც „ოცნება" გაიმარჯვებს, ამიტომ არ უნდა შევიდნენ ამ არჩევნებში? სამი წელი არჩევნები აღარ იქნება და ვინც განადგურდება, განადგურდება, ოპოზიციურ პარტიებს ფინანსები არ ექნებათ დაიხურებიან და დარჩება მხოლოდ ძლიერი პარტია.

„ბოიკოტში მყოფებთაგან, გარდა „თავისუფლების მოედნისა" დანარჩენი შვიდი ყოფილი ენმ-ია. ანუ მხოლოდ „ნაციონალურმა მოძრაობამ" გამოაცხადა ბოიკოტი, რადგან ძლიერები არიან, ერთი სიით გავლენ და ამიტომ უნდათ, რომ ჩაირეცხონ და გაფარჩაკდნენ „ლელო", გახარია. ისინი კონკურენციას ვერ იტანენ, რომ ახალი პარტიები გამოჩნდნენ, შეიძლება „ოცნების" საყვარელი ოპოზიცია აღარ იყოს და ამიტომ ისინი ებრძვიან არა „ოცნებას", არამედ "ლელოს" და გახარიას.

„ოპოზიციამ ადგილობრივ არჩევნებში მონაწილოება უნდა მიიღოს, თანაც ყველამ. „ოცნებას" თავისი სატელიტი პარტიები ჰყავს, რომლებიც არჩევნებში მაინც ჩაერთვებიან და მაინც მიიღებენ იმ ლეგიტიმაციას, რომლითაც ასე ამუნათებენ და აშინებენ ქართველ ამომრჩეველს, ამიტომ ეს ლეგიტიმაცია მაინც შეძენილი იქნება, ამ ფონზე, საჭიროა არჩევნებში ყველა ჩაერთოს", - განაცხადა პაატა ზაქარეიშვილმა „რეზონანსთან".

ანალიტიკოსი პეტრე მამრაძე ფიქრობს, რომ არჩევნები მართლაც მაღალ დონეზე ჩატარდა, თუმცა არ მიაჩნია, რომ ეუთო-ს გენმდივნის განცხადება გავლენას მოახდენს ევროკავშირისა და აშშ-ის პოზიციაზე.

„არჩევნები რომ მაღალ დონეზე ჩატარდა, ეს ფაქტია. იმ დღეებში მე ნეიტრალურ სპეციალისტებს ველაპარაკე და ეგეთი არ ჩატარებულაო. ისიც, რომ ხალხმა არც არჩევნების დღეს შედეგების გამოცხადების შემდეგ და არც მომდევნო დღეებში არ გააპროტესტა ეს და მხოლოდ ორშაბათს შეძლეს ორგანიზაციის შედეგად, ეს ხომ საუკეთესო ნიშანია. ეუთოს გენდივანი რომ ამბობს, ეს მნიშვნელოვანია.

„2020 წელს, როცა იგივე ბოიკოტი შვიდი თვე გრძელდებოდა და მერე შევიდნენ, მაშინ დიპლომატებმა საბოლოოდ შეკრეს პირი, დარწმუნდნენ, რომ გაყალბებული არ იყო და მოუწოდებდნენ, შედით და იმუშავეთ, თორემ თქვენ ამომრჩეველს ღალატობთო. აქაც ეს ელემენტი გაჩნდა, ჯამურად ოპოზიციას კი უწოდებენ, მაგრამ ანტიეროვნულ ძალებს 40%-ზე მეტი ჰქონდათ, რომ შესულიყვნენ, იქ ერთიანი ფრონტი გაემართათ, ხელისუფლების გაკრიტიკება თუ რამეში შეიძლებოდა, ერთად გაეკრიტიკებინათ, მაშინ რა სურათი იქნებოდა? ოპოზიცია ხელისუფლებას სჭირდება, მაგრამ ამათ ეს დესტრუქციული გზა აირჩიეს, და საბოლოოდ თვითონ პოლიტიკურად დაიღუპნენ, ციხე ამჯობინეს გარეთ ყოფნას", - განაცხადა მამრაძემ.

კითხვაზე, ახლა რა მოლოდინია ახლა თუნდაც ლეგიტიმაციის მხრივ, მამრაძემ გვითხრა:

„ლეგიტიმაცია ისაა, რომ ქართველმა ხალხმა ხმა მისცა მოცემულ პარტიას. საგარეოს რაც შეეხება, იქ განსხვავებული ხმებია და რომ ვთქვათ, ეუთოს გენდივანი გავლენას მოახდენს ბალტიის ქვეყნების ზოგიერთ ლიდერზე თუ სხვებზე, ვინც ასე გამოდის, ასე არ იქნება. ჰერჩინსკი რომ მაკა ბოჭორიშვილს შეხვდა, ევროკავშირის წვერმა პოლიტიკოსებმა ობსტრუქცია მოუწყვეს, ამ მხრივ ესენი არ გაჩერდებიან. აშშ-შიც ჯერ ვხედავ იმას, რომ საქართველოსთვის ამ ეტაპზე მოიცალონ. ემატება ის, რომ ტრამპის რეიტინგი საოცრად დაცემულია. რესპუბლიკურ პარტიაში ამას ხედავენ, მის გარშემო უკვე ის სიმტკიცე არაა და ეს პროცესები იწვევს იმას, რომ საქართველოს მიმართ რაღაცა ქმედითი გატარდეს, ამის პერსპექტივა ჯერ არაა",- განაცხადა მამრაძემ "რეზონანსთან"

რა თქვა ეუთოს გენმდივანმა

ქართული ოპოზიციისთვის პარლამენტში 40%-ზე მეტის ქონა და ამის არგამოყენება სამართლიანი არ არის იმ ხალხის მიმართ, რომელმაც აირჩია, - განაცხადა გენერალურმა მდივანმა, ფერიდუნ სინირლიოღლუმ პორტუგალიაში ეუთო-ს ყოველწლიურ სესიაზე.

„არ უნდა დაგვავიწყდეს, რომ საქართველო ომში მყოფი ქვეყანაა, ტექნიკურად და იურიდიულად რომ ვისაუბროთ. შესაბამისად, როდესაც საქართველოში არსებულ ვითარებაზე ვსაუბრობთ და ვაანალიზებთ, ეს ყოველთვის უნდა გვახსოვდეს.

„რაც შეეხება არჩევნებს, რომელსაც ოპოზიცია კითხვის ქვეშ აყენებს, ოდირ-მა ანგარიში გამოაქვეყნა, რომელიც ცხადად ამბობს, რომ, ზოგიერთი დარღვევის მიუხედავად, არჩევნების შედეგები ამომრჩევლის გადაწყვეტილებას ასახავს. ეს ასევე ფაქტია.

„საქართველოს პარლამენტში ოპოზიციას 66 წევრი ჰყავს 150-დან, ანუ 40%-ზე მეტს ოპოზიცია წარმოადგენს. მაგრამ ოპოზიცია პარლამენტის ბოიკოტირებას ახდენს. დემოკრატიებში, რა თქმა უნდა, სამოქალაქო სივრცე უნდა გქონდეს საკუთარი წუხილების, ჩივილებისა და სხვა რაღაცების გასაჟღერებლად, მაგრამ ასევე არჩეული ხალხის პალატა - პარლამენტი - უნდა გამოიყენო ეფექტიანად. იმას ვგულისხმობ, რომ 40%-ზე მეტის ქონა და ამის არგამოყენება სამართლიანი არ არის ხალხისთვის, რომელმაც აგირჩია", - განაცხადა სინირლიოღლუმ.

როგორ ეხმიანებიან „ოცნება" და ოპოზიცია

პარლამენტის რეგიონული პოლიტიკისა და თვითმმართველობის კომიტეტის თავმჯდომარე ირაკლი ქადაგიშვილმა განაცხადა, რომ ეუთო-ს სხდომებზე გაჟღერდა ის, რასაც მმართველი პარტიაში მუდმივად ამბობენ.

„ჩვენ ვიცით, რომ ჩვენს არჩევნებთან დაკავშირებით ეუთო-მ ორი დასკვნა გამოაქვეყნა. ერთი იყო შუალედური, სადაც დადებითი შეფასება ჰქონდა. ერთადერთი შენიშვნა ის იყო, რომ პოლარიზებული არის პოლიტიკური ველი და ეს ყველას მოგვეხსენება. მეორე იყო არჩევნების შემდგომი პრესკონფერენცია და ბოლოს შეფასების დოკუმენტი. ეუთო-მ აღიარა, რომ არჩევნები ჩატარდა კონკურენტუნარიან გარემოში, ხალხს ჰქონდა თავისი არჩევანის თავისუფლად დაფიქსირების საშუალება და ამომრჩევლის ნება იყო ასახული. გამომდინარე აქედან, სწორედ ეუთო-ს დამკვირვებელმაც, შვეიცარიის წარმომადგენელმა, რომელიც უშუალოდ იყო ამ პროცესის მონაწილე, სწორედ ეს განცხადება გააკეთა, რომ არჩევნები იყო ძალიან მაღალ დონეზე ორგანიზებული, ჩატარებული და ამომრჩევლის ნება იყო ასახული. სწორედ ეს გაიმეორა ეუთოს გენერალურმა მდივანმაც, რომელმაც ორი რამ გამოყო. ერთი - მან თქვა, რომ საქართველო ფაქტობრივად, ომის მდგომარეობაში იმყოფება, იმიტომ რომ მისი ტერიტორიების 20% ოკუპირებულია, ამიტომ საქართველოსთან მიმართებით ცოტა უფრო ღრმა ანალიზი და ღრმა ხედვა სჭირდებათ, ვინც ასეთ ბრტყელ განცხადებას აკეთებს-ხოლმე ჩვენ ქვეყანასთან მიმართებაში. მეორე, რომ არჩევნები შედგა და არჩევნებზე ხალხის ნება იყო სრულად ასახული. ოპოზიციამ 150-კაციან პარლამენტში, 61 მანდატი მიიღო, ანუ 40%-ზე მეტი და როდესაც შენ არ იყენებ ხალხის მიერ მონიჭებულ ამ მანდატს შენ უგულებელყოფ შენს ამომრჩეველს. ეს არის სიმართლე, რომელიც გაჟღერდა, თუმცა იქვე იქნა იმ შვეიცარიელი დელეგატის მიერ აღნიშნული ერთი რამ, რაც მაშინვე გახდა ცნობილი, რომ ზოგიერთ ევროპულ სახელმწიფოს არ მოეწონა არჩევნების შეგები. ჩვენ ვიცით, ვისაც არ მოეწონა - ვინც ჩამოდიოდა აქ და წინასაარჩევნო კამპანიას ატარებდა. რაც არ უნდა ზეწოლა მოახდინონ, რაც არ უნდა პროპაგანდისტული მანქანა ჩართონ შიგნით, თუ გარეთ, სიმართლე არ იმალება, იმიტომ რომ ფაქტად დევს ეს ყველაფერი," - განაცხადა ქადაგიშვილმა.

„გახარია საქართველოსთვის" პოლიტიკური საბჭოს წევრმა, გიორგი შარაშიძემ განაცხადა, რომ გენმდივნის კრიტიკას ვერ მიიღებენ.

„კარგად იცით, სწორედ იმის გამო, რომ პატივს ვცემთ ჩვენს 170 000-მდე ამომრჩეველს, ვართ პოლიტიკურ ბოიკოტში და მანდატები სწორედ ამიტომ არ დავიტოვეთ. ჩვენთვის პოლიტიკური ბოიკოტი არის პოლიტიკური ბრძოლის კანონით მონიჭებული ფორმა და საშუალება. ჩვენ ამ ბოიკოტში ვრჩებით. გასაგებია, რასაც ეუთო ამ შემთხვევაში გულისხმობს, მაგრამ ჩვენი გუნდი ამას თავის თავზე ვერ მიიღებს. ჩვენ ვაგრძელებთ ამომრჩევლის ნების პატივისცემას, მიუხედავად იმისა, რომ ლეგიტიმაციას ამ პარლამენტს არ ვანიჭებთ და ამის დასტური გუშინდელი სხდომა იყო, როდესაც „ოცნებამ" პოლიტიკური გადაწყვეტილება მიიღო და, ამ ბოიკოტის მიუხედავად, მანდატები გააუქმა. გააუქმა იმიტომ, რომ ყოველდღე ისეთ საცოდავ მდგომარეობაში არ ჩავარდნილიყო, როგორც გუშინდელ კომისიაზე ჩავარდა", - განაცხადა გიორგი შარაშიძემ.