„ბრალდებული გახლავთ უცხო ქვეყნის მოქალაქე. ვინაიდან და რადგანაც ამოღებული გახლავთ განსაკუთრებით დიდი ოდენობით ნარკოტიკული საშუალება, გამოძიება გრძელდება მასთან დანაშაულებრივ კავშირში მყოფი პირების დადგენის მიმართულებით“, - ამის შესახებ პროკურორმა თამარ ბეჟუაშვილმა განაცხადა.

საქმე ეხება 18 კილოგრამზე მეტი „მეტადონის“ საქმეს, რომელიც უკრაინის მოქალაქის ავტომობილისა და მცხეთის მუნიციპალიტეტში მდებარე მისი საცხოვრებელი სახლის ჩხრეკის შედეგად ამოიღეს.

„ამ საფრთხეების მხედველობაში მიღებით, ბრალდების მხარემ იშუამდგომლა მის მიმართ პატიმრობის გამოყენების თაობაზე“, - აცხადებს პროკურორი თამარ ბეჟუაშვილი.

ნარკოდანაშაულის ფაქტზე დაკავებულ უკრაინის მოქალაქეს, აღკვეთის ღონისძიების სახით, პატიმრობა შეეფარდა. გადაწყვეტილება საქალაქო სასამართლომ გამოაცხადა.

ადვოკატი 50 000-ლარიანი გირაოს ითხოვდა. დაკმაყოფილდა პროკურატურის შუამდგომლობა. დანაშაული 20 წლამდე ან უვადო პატიმრობას ითვალისწინებს.