ცეცხლის წამკიდებლები არიან, ზოგადად, ესენი. რუსთაველის გამზირის რამდენჯერმე გადაწვის მცდელობა ჰქონდათ, პოლიციელებს პიროტექნიკა დაუშინეს, - განაცხადა განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილემ, საპარლამენტო უმრავლესობის წევრმა გიორგი სოსიაშვილმა. იგი ამგვარად გამოეხმაურა ალეკო ელისაშვილის მიერ თბილისის საქალაქო სასამართლოს კანცელარიის შენობის დაწვის მცდელობის ფაქტს. სოსიაშვილმა აღნიშნა, რომ ელისაშვილიც „რადიკალთა ანასხლეტია“.
„ჰქონდათ 1990-იანი წლების სამოქალაქო ომის განმეორების მცდელობა, როდესაც პარლამენტის სასახლეს ესროლეს პიროტექნიკა და ვხედავდით, რას დაამსგავსეს რუსთაველის გამზირი. სახელმწიფო რომ არ ყოფილიყო მოწოდების სიმაღლეზე და მათი ეს გამოხტომა არ აღკვეთილიყო, ბუნებრივია, ჩვენი ქვეყანა დიდ უბედურებაში გაეხვეოდა. არაფერი არ მიკვირს - ელისაშვილიც ამ რადიკალთა ერთ-ერთი ანასხლეტია“, - განაცხადა სოსიაშვილმა.
სასამართლოს კანცელარიის დაწვისა და დაზიანების ფაქტზე დაკავებული ალეკო ელისაშვილი დიღმის იზოლატორშია მოთავსებული. შსს-ს ინფორმაციით, დაკავებულია კოალიცია „ძლიერი საქართველო - ლელოს” ერთ-ერთი ლიდერი, ალექსანდრე ელისაშვილი, რომელმაც დღეს დილით, გამთენიისას, თბილისის საქალაქო სასამართლოს კანცელარიის შენობის დაწვა სცადა.