2026 წლის ბიუჯეტის პროექტის საბოლოო ვერსიაში გაზრდილია სახელმწიფო ბიუჯეტის როგორც შემოსულობების, ისე ასიგნებების მოცულობა. ინფორმაციას ამის შესახებ ფინანსთა სამინისტრო ავრცელებს.

უწყების ცნობით, საქართველოს 2026 წლის სახელმწიფო ბიუჯეტის შემოსულობების ჯამური მაჩვენებელი, პროექტის წინა ვერსიასთან შედარებით, გაზრდილია 468,6 მლნ ლარით და განისაზღვრება 30 759,4 მლნ ლარის ოდენობით.

„შემოსავლები - 24 996.3 მლნ ლარია (პროექტის წინა ვერსიასთან შედარებით გაზრდილია 397.3 მლნ ლარით); მათ შორის: საგადასახადო შემოსავლების პროგნოზი გაზრდილია 170.0 მლნ ლარით შეადგენს 23.200.0 მლნ ლარს. სხვა წყაროებიდან მისაღები შემოსულობები, ჯამში, გაზრდილია 71.3 მლნ ლარით. სახელმწიფო ბიუჯეტის ასიგნებების მოცულობა პროექტის წინა ვერსიასთან შედარებით გაზრდილია 405.5 მლნ ლარით და შეადგენს 30 881.4 მლნ ლარს“, - ნათქვამია ფინანსთა სამინისტროს მიერ გავრცელებულ ინფორმაციაში.

საქართველოს პარლამენტში განსახილველად შევიდა 2026 წლის ბიუჯეტის პროექტის საბოლოო ვერსია, რომლის მიხედვით, ნაერთი ბიუჯეტის ხარჯვითი ნაწილის ჯამური ოდენობა 36.3 მილიარდი ლარია. ინფორმაციას ამის შესახებ ფინანსთა სამინისტრო ავრცელებს.