უკრაინის პრეზიდენტის ოფისის ყოფილმა ხელმძღვანელმა ანდრეი ერმაკმა გადადგომიდან რამდენიმე საათში განაცხადა, რომ ფრონტზე მიდის, - წერს New York Post.

„მე ფრონტზე მივდივარ და ნებისმიერი რეპრესიებისთვის მზად ვარ. მე პატიოსანი და წესიერი ადამიანი ვარ”, - განაცხადა ერმაკმა.

ამასთან, გამოცემის ცნობით, ერმაკმა ბოდიში მოიხადა იმის გამო, თუ ის სატელეფონო ზარებს არ უპასუხებს. მას არ დაუზუსტებია, როდის და როგორ აპირებს ფრონტზე წასვლას და შეუერთდება თუ არა უკრაინის შეიარაღებულ ძალებს.

„მე შემარცხვინეს და ჩემი ღირსება არ დაიცვეს მიუხედავად იმისა, რომ კიევში ვარ 2022 წლის 24 თებერვლიდან. ამიტომ მე არ მინდა ზელენსკისთვის პრობლემების შექმნა - მე ფრონტზე მივდივარ. მე უკრაინას ვემსახურებოდი და კიევში ვიყავი 2022 წლის 24 თებერვლიდან. ალბათ, კიდევ შევხვდებით. დიდება უკრაინას“, - დასძინა ერმაკმა.

უკრაინის პრეზიდენტის ოფისის ხელმძღვანელმა ანდრეი ერმაკმა გადადგომის შესახებ განცხადება გუშინ დაწერა.

მანამდე უკრაინის ეროვნული ანტიკორუფციული ბიუროსა და სპეციალიზებული ანტიკორუფციული პროკურატურის წარმომადგენლებმა ანდრეი ერმაკის სახლში ჩხრეკა ჩაატარეს. ამასთან დაკავშირებით, ერმაკმა დაწერა, რომ ის სამართალდამცველებთან თანამშრომლობს.