"უცხოელი აგენტების” კანონპროექტი ქვეყანაში მორიგი დაპირისპირების მიზეზი გახდა. ოპოზიცია და მისი მხარდამჭერები ამტკიცებენ, რომ კანონის მიღების შემთხვევაში, ქვეყანაში ბიზნესი დაზარალდება და საქართველოში ინვესტიციის ჩადება ინვესტორს აღარ მოუნდება. სინამდვილეში კი აღნიშნული ბიზნეს სექტორს საერთოდ არ ეხება, სადაც გადარიცხვები და ფულადი ტრანზანქიები ისედაც გამჭირვალეა, განსხვავებით იმ სსიპ-ისა და აიპ-გან, რომლებიც უცხოური გრანტებით ფინანსდებიან.
კანონპროექტის დამტკიცების შემთხვევაში არც ბიზნესი და არც საქართველოს ეკონომიკა არ დაზარალდება. ეს სრულიად გამორიცხულია. დეტალებზე "რეზონანსთან" ეკონომისტი გიორგი ცუცქირიძე საუბრობს.
"რეზონანსი”: პირველ რიგში, რატომ ჩათვალა საჭიროდ მმართველი პარტიიდან წასულმა "ხალხის ძალამ” კანონპროექტის ინიცირება?
გიორგი ცუცქირიძე: ძალიან ბევრი მოსაზრება მოვისმინეთ კანონპროექტის ირგვლის, რომ ეს რუსული პროექტია, რომ ხელისუფლება ანტიდასავლურია და ა.შ. კანონის პროექტი ბუნებაშიც კი არ იარსებებდა და არც მისი ინიცირება არ მოხდებოდა, ევროკავშირის მხრიდან საქართველოსადმი ცოტა შეურაცხმყოფელი და ნაკლებ ობიექტური მიდგომა რომ არ ყოფილიყო. ევროპარლამენტი, როდესაც საქართველოს უკრაინის და მოლოდოვას უკან აყენებს და ვაჭრობა მართავს კანდიდატის სტატუსზე და არა, ევროკავშირის წევრობაზე, ეს ცოტა მიუღებელია. საქართველო ყველა პარამეტრით გაცილებით წინაა ზემოთ დასახელებულ ქვეყნებთან შედარებით.
როდესაც ქვეყანას ევროკავშირის კანდიდატის სტატუსს ანიჭებ, ან არ ანიჭებ, შენ ამ ქვეყნის ისტორის რეალობიდან უნდა ამოხვიდე, თუ როგორი იყო მისი წარსული და რაზე იყო ორიენტირებული. საქართველო მთელი მისი ისტორიის მანძილზე ევროპისკენ ისწრაფვოდა. ჩვენს ირგვლივ მუსლიმანური რკალი იყო და საქართველო ამ რკალიდან გამოვიდა, როგორც ქრისტიანული ქვეყანა და გადავრჩით როგორც ერი. როდესაც ასეთი იდენტობის მქონე ქვეყანას რაღაც პირობებს უყენებ, უკრაინაზე და მოლდოვაზე უკან აყენებ, ანუ აჩოჩებ და სტატუსსაც კი არ აღირსებ, პირველ რიგში, სწორედ ესაა მიუღებელი.
"ქართული ოცნება”, არც ამ პარტიიდან გამოსული რომელიმე ჯგუფი, არ მოისურვებდა ამ ტიპის კანონპროექტის ინიცირებას, შესაბამისი საზოგადოებრივი განწყობა, რომ არ ყოფილიყო. საზოგადოებრივი განწყობა კი შექნმა ევროსკეპტიციზმა. მე არ ვამბობ, რომ ეს კარგი კანონია, მაგრამ არაფერი კატასტროფული არ არის და ტყუილია ის თემები, რომ ეს რუსული კანონია და ამით საქართველო სცილდება დასავლეთს.
რატომ ატყდა ასეთი ისტერიკა, ვერ გავიგე? ადამიანმა ხომ უნდა იცოდეს, რომ ეს თუ ის ორგანიზაცია რა ტიპის საქმიანობას აწარმოებს საქართველოში? ასეთ დრო უფრო მეტი მხარდაჭერა არ ექნებათ?
"რ”: კანონის მიღებას ექნება თუ არა რაიმე გავლენა საქართველოს ეკონომიკაზე?
გ.ც: ამ კანონპროექტში არსად შეზღუდვა, რომელმაც ეკონომიკაზე შესაძლოა, ნეგატიური ზეგავლენა მოახდინოს, არ წერია. სად წერია, რომ რომელიმე ფონდის მუშაობა აიკრძალება? რომ ისინი აღარ იარსებებენ საქართველოში? არსად! არანაირი ჩანაწერი არ არსებობს იმისა, რომ რაღაც ტიპის საქმიანობა აიკრძალება, ამის მსგავსი არაფერი არ არის. საუბარია იმაზე, რომ ყველა მიმართულება, რომელიც საქართველოში გრანტის მომპოვებელია, ანუ გარედან ფინანსდება, იყოს გამჭირვალე. ამიტომ არანაირი ნეგატიური ზეგავლენა არ ექნება ეკონომიკაზე.
"რ”: არც ეკონომიკაზე მოახდენს ნეგატიურ გავლენას და არც ბიზნესგარემო შეიცვლება უარესობისკენ?
გ.ც: არა, ბიზნესგარემო არანაირად არ შეიცვლება. გარემო შეიცვლება მაშინ, როდესაც ქვეყანა მთლიანად შეიცვლის ორიენტაციას. მაშინ, როდესაც ქვეყანა მიიღებს ისეთ კანონს, რომელიც შეზღუდავს უცხოურ ინვესტიციებს, როცა დააკანონებს იმას, რომელიც აქ მოქმედ საერთაშორისო კომპანიებს შეუქმნის პირობებს, რომ ქვეყანა დატოვონ. მაგალითად, სპეციალურად გაზრდის გადასახადებს და ა.შ. სხვანაირად არსებული ვითარება არ იცვლება.
ის, რომ ბიზნესგარემო შეიცვლება, ტყუილია. მიდის სპეკულაციები, სადაც გარდა ქართველი პოლიტიკოსებისა, ჩართული არიან უცხოელებიც. ეს კი დასანანია, რადგან საქართველო არ იმსახურებს ასეთ მიდგომას.
რ”: უცხოური პირდაპირი ინვესტიციები ხომ არ შემცირდება?
გ.ც: ინვესტიციები ისტორიულ მაქსიმუმზეა. ისინი, ძირითადად, ევროკავშირის ქვეყნებისგან შემოდის. ექსპოერტი ყველაზე მეტად სად არის გაზრდილი? დასავლეთში, ევროკავშირში, აშშ-ში და აზიის ქვეყნებში. ექსპორტი ყველაზე მეტად შემცირებულია სწორედ რუსეთში.
"რ”: კანონის მიღების შემდეგ, შეიცვლება თუ არა ნდობა საქართველოს მიმართ?
გ.ც: ის, რომ საქართველო რაღაც კანონს იღებს, რაც დასავლეთში ვიღაცებს არ მოსწონს, ეს ცალკე თემაა. მიზეზი უნდა იყოს არგუმენტირებული. ბოლო-ბოლო ეს კანონპროექტი ჯერ ხომ არ არის მიღებული? ვენეციის კომისიაშია გაიგზავნება და იქიდან მივიღებთ შეფასებას. იგივე ეუთო-ოდირის საინტერესო დასკვნაა, რომ ისინი დაელოდებიან ვენეციის კომისიის პასუხს ამ კანონპროექტთან დაკავშირებით.
თუ აქ რაიმე მიუღებელია, რამაც შეიძლება, რომ დააზიანოს ქვეყნის იმიჯი, გამოჩნდება, მაგრამ აპრიორი ის დასკვნა, რომ ამით ჩვენ რუსეთში შევედით, აბსოლუტური ტყუილი და სისულელეა.
სტატიების ნახვა შეგიძლიათ ამ ბმულზე
ახალი ამბების ნახვა შეგიძლიათ ამ ბმულზე
