თამთა ჩაჩანიძე
(13.08.2019)

 „საქართველოში ტელევიზია არ არის დიდად მომგებიანი ბიზნესი. თუ ვინმეს პოლიტიკური ინტერესი არ აქვს, ამას არ გარისკავს", - აცხადებს პოლიტოლოგი რამაზ საყვარელიძე „რუსთავი 2"-ის ახალი მფლობელის ქიბარ ხალვაშის გეგმებზე საუბრისას, რომელმაც ტელეკომპანიის გაყიდვა გადაწყვიტა.

მისივე შეფასებით, 20 სექტემბრისთვის დაანონსებული მთავრობის საწინააღმდეგო ფართომასშტაბიანი აქცია უპერსპექტივოა, რადგან ასეთი აქციებით ხელისუფლებაში შეიძლება ,ხოლოდ „ნაციონალური მოძრაობა" მოვიდეს, ხალხს კი „ნაცმოძრაობის" ხელისუფლებაში დაბრუნება არ უნდა.

„რეზონანსი": როგორ ფიქრობთ, მამუკა ხაზარაძე რამდენად რეიტინგულ პარტიას შექმნის, როგორი პერსპექტივა ექნება და ვის ვიხილავთ მის პარტიაში?

რამახ საყვარელიძე: მე განსაკუთრებული ინფორმაცია ამაზე არ მაქვს. რეიტინგებზე საუბრისას უკვე არაერთხელ აღინიშნა, რომ ისეთ ქვეყანაში, როგორიც ჩვენ ვართ არ მგონია, რომ ბანკირები მოსახლეობისაგან დიდი მხარდაჭერით სარგებლობდნენ და ამიტომ მგონია, რომ ამ მხრივ გაუჭირდებათ ამ ახალი პარტიის ორგანიზატორებს.

ის ერთ-ერთი მაგალითი, როცა ბიზნესმენმა ხალხის დიდი მხარდაჭერა ნახა, ეს 2012 წელს ბიძინა ივანიშვილის მიმართ გამოხატული მხარდაჭერა იყო. მაგრამ ისიც უნდა გავიხსენოთ, რომ ივანიშვილის მიმართ დამოკიდებულება ძირითადად ჩამოყალიბებული იყო იმით, რომ მას ძალიან დიდი ქველმოქმედება ჰქონდა გაწეული და მოსახლეობას მიაჩნდა, ამდენი სიკეთის ჩამდენი ქვეყანას ისეთივე სიკეთეს მოუტანსო.

დღეს უკვე მოსახლეობას ასეთი პოზიცია აღარ აქვს, საკმაოდ მკაცრი და კრიტიკულია ივანიშვილის მიმართაც.

ისეთ პარტიაში კი, სადაც ქველმოქმედების წინაპირობა არ არის, ალბათ უფრო ძნელი იქნება რეიტინგის მოპოვება.

„რ": თქვენი აზრით, რამდენად დამაჯერებელია „რუსთავი 2"-ის ყოფილი გენდირექტორის ნიკა გვარამიას წინააღმდეგ წაყენებული ბრალი? რეალურად რამდენად დამაზიანებელია ხელისუფლებისათვის ეს მოვლენები?

რ.ს.: გვარამიას მოვლენები მიმაჩნია, რომ ხელისუფლებას არ სჭირდება. ეს რეალობად მიმაჩნია იმიტომ, რომ დიდი ხანი, ანუ „რუსთავი 2"-ის რუსთავში ყოფნის დღიდან ჰქონდათ პრობლემები.

მოულოდნელი არ არის გვარამიას მიმართ ამ ტიპის ბრალდებები და არ მაქვს ის განცდა, რომ ბრალდებები ხელოვნურია.

„რ": ქიბარ ხალვაშმა გადაწყვიტა გაყიდოს ტელეკომპანია „რუსთავი 2", თუმცა როგორც ამბობენ, მისი დავალიანება დიდ თანხებთანაა დაკავშირებული. თქვენი აზრით, ვინ იქნება ის მყიდველი, ვინც გარისკავს და ამ ოდენობის ვალით კომპანიას იყიდის?

რ.ს.: არ მგონია, რომ ვინმემ გარისკოს, იმიტომ, რომ როგორც ამბობენ, ვალი მეტისმეტად დიდა, მით უმეტეს, რომ საქართველოში ტელევიზია არ არის დიდად მომგებიანი ბიზნესი. თუ ვინმეს პოლიტიკური ინტერესი არ აქვს, ამას არ გარისკავს.

გასათვალისწინებელია ისიც, რომ სარეკლამო ბაზარი იმდენად პატარაა საქართველოში, რომ იგი ვერ უზრუნველყოფს ტელევიზიის დამოუკიდებლად არსებობას, ყოველთვის სჭირდება საქართველოში ტელევიზიას ინვესტიციებით დახმარება.

„რუსთავი 2"-ს ვალი რომც არ ჰქონდეს მეეჭვება, რომ ხალვაშს ასეთი ბიზნესის წარმოების სურვილი ჰქონდეს, რომლის არსებობასაც პოლიტიკური ინტერესის გარეშე პრაქტიკულად აზრი არ აქვს,

„რ": პარლამენტის წინ მიმდინარე აქციის ერთერთმა ორგანიზატორმა 20 სექტემბრიდან ფართომასშტაბიანი აქცია დააანონსა, როგორ ფიქრობთ, რა მოვლენებს უნდა ველოდოთ აქციასთან დაკავშირებით?

რ.ს.: ბოლო ხანებში ვნახეთ როგორ იკლო აქციაზე ხალხის რაოდენობამ. თუ არ მიდიან ადამიანები აქციაზე, ალბათ კონკრეტული მიზეზებიც აქვთ. კერძოდ, გავიხსენოთ, რომ 2012 წლის მერე „ნაციონალურმა მოძრაობამ" ვერ მოახერხა ვერცერთი არჩევნების მოგება, ესე იგი ხალხისთვის მნიშვნელოვანია პასუხი კითხვაზე - ეს ხელისუფლება კი, ბატონო, არ ვარგა, მაგრამ ვის მოვიყვანთ იმ პროტესტით, რომლისთვისაც ქუჩაში დავდგებით?

ცხადია, რომ ქუჩაში დამდგარი პროტესტით ხალხი მოიყვანს „ნაცმოძრაობას", იმიტომ, რომ მას „ქართული ოცნების" შემდეგ ყველაზე მაღალი რეიტინგი აქვს. ამ ხალხს კი არ უნდა „ნაციონალურ მოძრაობის" მოყვანა ხელისუფლებაში და არაფრით არ იჯერებენ ამას ის ადამიანები, რომლებიც ახლა ცდილობენ გააღვიძონ რევოლუციური მუხტი.

რევოლუციური მუხტის გაღვიძებას ოპტიმიზმი სჭირდება - არა მარტო გინება იმისა რაც არის, არამედ ოპტიმიზმი იმისა, რომ როცა ერთად დავდგებით, ამით უკეთესი ქვეყანა შეიქმნება.

ძალიან მეეჭვება, რომ წარმატებით დასრულდეს ამ მიტინგის ორგანიზაცია.

„რ": ოპოზიცია ამბობს, რომ 2020 წლის პროპორციულ საპარლამენტო არჩევნებში მმართველი პარტია შექმნის პატარ-პატარა სატელიტ პარტიებს და ამით ისევ მოვა ხელისუფლებაში, როგორია თქვენი აზრი ამ საკითხთან დაკავშირებით?

რ.ს.: ოპოზიციის ეს შეფასება უფრო რიტორიკულია იმიტომ, რომ პატარ-პატარა პარტიები ხელისუფლებას ჯერჯერობით შექმნილი არ აქვს და თუ ვინმეს აქვს ასეთი პარტიები შექმნილი, შექმნილი აქვს „ნაციონალურ მოძრაობას". მე არც ვიცი რამდენად აქვს „ქართულ ოცნებას" გათვლილი ის, რომ სწორედ „ნაცმოძრაობა" არის მზად ასეთი პატარა პარტიებით შემდეგ პარლამენტში უმრავლესობის შეკოწიწებისთვის, თორემ „ქართული ოცნება" საპარლამენტო ბრძოლისთვის დღევანდელი გადასახედიდან მზად არ არის და როცა ლაპარაკია იმაზე, რომ ოდესმე შექმნისო, გავითვალისწინოთ, რომ ახალი პარტიის შექმნას და საზოგადოებამდე მიყვანას დრო დასჭირდება, ამას კი 2020 მდე მგონი მმართველი პარტია ვერ მოახერხებს.

ასე რომ, მგონი ეს გადაჭარბებული შიშია.

პატარ-პატარა პარტიების შეკვრისთვის ოპოზიცია უფრო არის მზად, ვიდრე ხელისუფლება. გავიხსენოთ, რომ ოპოზიციამ ერთ-ერთ ჯგუფს „გაერთიანებული ოპოზიცია" უწოდა, რომელშიც რეალურად პატარ-პატარა პარტიები არიან. ასე რომ, ოპოზიციას ამ მიმართულებით ერთი ნაბიჯი უკვე აქვს გადადგმული.

ჩაწერა სახელი