იგორ კვესელავა მიიჩნევს, რომ ხელისუფლებამ შეიძლება უფრო დიდი საპროტესტო ტალღაც მიიღოს უახლოეს მომავალში
ია აბულაშვილი
(14.06.2018)

 "ბოლო დროს შექმნილი ვითარება საჭიროებს უკიდურეს აუცილებლობას - ხელისუფლების შეცვლას, შეიძლება ამ ეტაპზე არა, მაგრამ უახლოეს მომავალში სამთავრობო ცვლილება უნდა მოხდეს".

"სახელმწიფოს სჭირდება პოლიტიკური მართვა, ეკონომიკური მართვა და მასებთან მუშაობა, ხალხთან ურთიერთობა. ამის ნაკლებობა რომ იყო, იმიტომ გაჩნდა პრობლემები", - აცხადებს პოლიტოლოგი იგორ კვესელავა, რომელსაც "რეზონანსი" მიმდინარე პოლიტიკურ ვითარებაზე ესაუბრა.

"რეზონანსი": საპარლამენტო უმრავლესობისა და პრემიერ- მინისტრის შეხვედრას უმრავლესობის წევრების განსხვავებული განცხადებები მოჰყვა. ზოგი ამბობდა, რომ შეხვედრაზე სამთავრობო ცვლილებაზე მსჯელობა არ ყოფილა, ზოგის თქმით კი, შიგადაშიგ საკადრო ცვლილებაზეც ისაუბრეს და ამის თაობაზე იყო წინადადებებიც და მოსაზრებებიც...

იგორ კვესელავა: ვერ გეტყვით, იყო თუ არა ამ თემაზე მსჯელობა უმრავლესობის შეხვედრაზე, მაგრამ ეს საკითხი რომ აუცილებლად დაისმებოდა, არც ამის გამორიცხვა შეიძლება იმ მოვლენებიდან გამომდინარე, რაც ბოლო პერიოდში განვითარდა.

"რ": თქვენი აზრით, სამთავრობო ცვლილება არის თუ არა ობიექტური აუცილებლობა?

ი.კ: მე ვფიქრობ, რომ ვითარება, რომელიც ბოლო დროს შეიქმნა საქართველოში, საჭიროებს უკიდურეს აუცილებლობას - ხელისუფლების შეცვლას. მხედველობაში არ მაქვს, რომ მაინცდამაინც ამ ეტაპზე გატარდეს უკიდურესი ღონისძიებები, მაგრამ ფაქტია, რომ სახელმწიფოს მართვა სჭირდება და ქვეყანა უნდა მართონ პროფესიონალებმა.

სახელმწიფოს მართვა არ არის იოლი საქმე, სახელმწიფოს სჭირდება პოლიტიკური მართვა, ეკონომიკური მართვა და მასებთან მუშაობა, ხალხთან ურთიერთობა. ამის ნაკლებობა რომ იყო, იმიტომ გაჩნდა პრობლემები.

მინისტრები რომ გახდებიან და მერე სწავლობენ სახელმწიფოს მართვას, რა თქმა უნდა, შეექმნებათ პრობლემები. ამიტომ თავიდანვე პროფესიონალებითა და ამ დარგში გამოცდილი ადამიანებით უნდა დაკომპლექტდეს მთავრობა და არა მეგობარ-ნაცნობებით.

"რ": თქვენი აზრით, მთლიანად უნდა შეიცვალოს ხელისუფლება, თუ რამდენიმე მინისტრის შეცვლა გამოასწორებს მდგომარეობას?

ი.კ: კოსმეტიკური ცვლილება შექმნილ ვითარებას ვერ გამოასწორებს. მე ვფიქრობ, რომ სისტემური ცვლილებაა საჭირო. თუ სიჭირო იქნება, მთავრობა ახალი შემადგენლობით უნდა დაამტკიცოს პარლამენტმა.

ბოლო მოვლენებმა მართლაც ბევრი პრობლემა დაგვანახა და გინდაც 5 პროცენტი ყოფილიყო ის ხალხი, ვინც პროტესტს გამოთქვამდნენ ამ აქციებზე, საკმარისია იმისთვის, რომ რაღაც უნდა შეიცვალოს და ამ ყველაფერს უკვე სხვა, ახალი ხედვა სჭირდება, რომ არა მხოლოდ სიტუაცია დაწყნარდეს, არამედ მდგომარეობა კარდინალურად შეიცვალოს უკეთესობისაკენ.

"რ": როგორც თქვენი კოლეგები ამბობენ, ყველა მთავრობის პრობლემა სწორედ საკადრო პოლიტიკა იყო, ანუ ამ პრობლემას ვერც "ოცნების" მთავრობა გაუმკლავდა?

ი.კ: საქართველო არასდროს განიცდიდა პროფესიონალი კადრების ნაკლებობას. მთავარია, სად და როგორ შეარჩევ ამ კადრებს. საუკეთესო კადრებია ჩვენს სამეცნიერო წრეებში, უმაღლეს სასწავლებლებში. იქიდან არ შეიძლება პროფესიონალების შერჩევა?

ან კიდევ, თუ ჩვენი თანამემამულენი, ჩვენი ახალგაზრდები სხვა ქვეყნებში აღწევენ წარმატებას, როგორ ფიქრობთ, საკუთარ ქვეყანაში გაუჭირდებათ საქმის კეთება? დააბრუნონ ეს ხალხი, შეუქმნან პირობები, ხომ შეიძლება ამის გაკეთება.

სახელმწიფოს მართვაში ყველა თაობის ადამიანი უნდა იყოს ჩართული, უფროსი თაობა, რომ მისი გამოცდილება იქნეს გაზიარებული, საშუალო თაობა და ახალგაზრდები. ასეა ყველა ქვეყანაში და ეს მოდელი ძალიან კარგად მუშაობს ევროპაში, აშშ-სა და აზიაშიც.

"რ": თქვენ ამბობთ, რომ რაც მალე მოხდება სამთავრობო ცვლილება, მით უკეთესი. თქვენი აზრით, მაინც როდის, საპრეზიდენტო არჩევნებამდე?

ი.კ: საპრეზიდენტო არჩევნები ამას ხელს საერთოდ არ უშლის, პირიქით, არჩევნებზე ხომ უნდა მივიდეს ხალხი და თუ ნდობა არ ექნება ამ ხელისუფლების, როგორ წარმოგიდგენიათ, რამდენი პროცენტი მივა არჩევნებზე.

საპრეზიდენტო კანდიდატიც ისეთი უნდა შეირჩეს, რომელსაც ხალხი ენდობა, მე სულაც არ ვარ წინააღმდეგი პრეზიდენტის კანდიდატურა ოპოზიციიდან შეირჩეს. ან სულაც ისეთი პიროვნება, რომელიც ამჯერად საქართველოში არ ცხოვრობს და წარმატებულად მოღვაწეობს საზღვარგარეთ, მაგალითად, ლადო ჭანტურია, რომელსაც დიდი ნდობა აქვს საზოგადოებაში.

"რ": როგორც ოპოზიციაში, ისე საექსპერტო წრეებში დარწმუნებულნი არიან, რომ კადრების შერჩევაში აქტიურად ჩაერთვება ბიძინა ივანიშვილი, თქვენც ასე ფიქრობთ?

ი.კ: მე ვერ გეტყვით, რამდენად ჩაერთვება ამ პროცესში ბიძინა ივანიშვილი, მაგრამ ფაქტია, რომ რადგან ის დაბრუნდა პოლიტიკაში და როგორც თავად ამბობდა, ეს მხოლოდ უკიდურეს შემთხვევაში მოხდებოდა, ბუნებრივია, რომ ამ გუნდთან ერთად იგი ვეღარ გააგრძელებს იმ რეფორმების გატარებას, რომელსაც აპირებს.

მას ძალიან კარგი პოლიტიკური ალღო აქვს და ალბათ არ გაუჭირდება კარგი კადრების შერჩევა. მინდა, ბიძინა ივანიშვილს ვურჩიო, ხშირად შეხვდეს სამეცნიერო და საექსპერტო წრეებს, ინტელექტუალებს, ახალგაზრდებს. დარწმუნებული ვარ, რომ ნამდვილი პროფესიონალი კადრები სწორედ ამ წრეებშია.

"რ": თქვენი აზრით, საპროტესო ტალღამ გადაიარა, თუ კვლავ უნდა ველოდოთ საპროტესტო აქციებს?

ი.კ: ბოლო მოვლენები მხოლოდ ქვეყანაში შექმნილი ვითარებით არ იყო გამოწვეული, ეს ვითარება ძალიან კარგად გამოიყენეს ზოგიერთებმა საპროტესტო ტალღის ასაგორებლად და ყველამ კარგად იცის, რომელ ქალაქში დაიწერა ეს სცენარი.

არ მეგულება დღეს ისეთი პოლიტიკური ძალა, რომელსაც მოსახლეობის 40% გაჰყვება, მაგრამ თუ ცვლილება არ მოხდა, ასეთი ტალღის აგორება ყოველთვის შეიძლება. ეს პირველი ტალღა ხომ მიიღო ხელისუფლებამ და შეიძლება უფრო დიდი ტალღაც მიიღოს უახლოეს მომავალში.

ჩაწერა სახელი