დავით ჭიჭინაძეს მიაჩნია, რომ მთავრობა გამოწვევებს ვერ პასუხობს და მან ამაზე პასუხისმგებლობა უნდა აიღოს
ელზა პაპოშვილი
(14.06.2018)

 მმართველი გუნდის წევრი დავით ჭიჭინაძე "რეზონანსთან" საუბრისას ამბობს, რომ ქვეყანაში საკმაოდ მძიმე მდგომარეობაა და საზოგადოების დაკვეთაა, რომ მთავრობა გადადგეს. მისი თქმით, თანაგუნდელებისგან განსხვავებით, მას ამის აღიარება არ უჭირს და ქვეყანაში შექმნილი პრობლემების გამო პასუხისმგებლობას მთავრობას აკისრებს.

დეპუტატის აზრით, მათმა გუნდმა საზოგადოებას ის დაპირებები ვერ შეუსრულა, რასაც ხელისუფლებაში მოსვლამდე ჰპირდებოდა, ამიტომ სახლში წასვლის დროა. ქვეყანაში სიტუაცია თუ არ გამოსწორდა, მაშინ მანდატების დატოვება თავად პარლამენტარებსაც მოუწევთ და ვადამდელი საპარლამენტო არჩევნების დანიშვნასაც არ გამორიცხავს.

ჭიჭინაძე აცხადებს, რომ საზოგადოება მათ მიერ ჩატარებულ აღარც გამოძიებას იჯერებს და აღარც დაპირებებს, რაც ქვეყანაში კრიზისის შექმნის წინაპირობაა.

"რეზონანსი": უმრავლესობის წევრთა შეხვედრის შემდეგ თქვენ განაცხადეთ, რომ მთავრობა აუცილებლად უნდა გადადგეს. ფიქრობთ, რომ ქვეყანაში არსებული მძიმე მდგომარეობა მთავრობის ბრალია და ის დაკისრებულ მოვალეობას ჯეროვნად ვერ ასრულებს?

დავით ჭიჭინაძე: ვიდრე სხდომა დაიწყებოდა, მე მანამდეც ვთქვი, რომ მთავრობაში ცვლილება აუცილებელია. ამის ხმამაღლა აღიარება, თანაგუნდელებისგან განსხვავებით, არ მიჭირს.

საზოგადოება ჩვენგან ქმედითი ნაბიჯების გადადგმასა და იმ დაპირებების შესრულებას ითხოვს, რაც ხელისუფლებაში მოსვლამდე მივეცით. თუმცა ფაქტია, მთავრობა ამ გამოწვევებს ვერ პასუხობს და მან ამაზე პასუხისმგებლობა უნდა აიღოს.

"რ": რა მოხდა შეხვედრაზე, შეიძლება ითქვას, რომ მთავრობის გადადგომაზე გუნდში ერთსულოვნება არ არის?

დ.ჭ: ყველაზე შეურაცხმყოფელი ის არის, რომ ჩვენმა ხელისუფლებამ სამართლიანობის აღდგენის კუთხით ვერაფერი შეძლო და ამის მოგვარება იმ ხალხს დაავალა, რომლებიც აქამდე გასამართლებულები უნდა იყვნენ. თუ ამ პრობლემებს ვერ ვაგვარებთ და თავს ვერ ვართმევთ, მაშინ წავიდეთ სახლში, ხალხს რაღას ვაღიზიანებთ?

მეორე მთავარ პრობლემად კი იმას მივიჩნევ, რომ ქვეყანაში ბანკები პარპაშობენ და სრული განუკითხაობაა. მათი შემოსავალი იზრდება, ხალხი კი დღითი დღე ღარიბდება. შესაბამისად, თუ ჩვენ ამ პრობლემებს ვერ ვაგვარებთ, მთავრობა უნდა წავიდეს.

ხელისუფლებამ ხალხის მოთხოვნა უნდა გაითვალისწინოს. როცა მათ დაკვეთას ვერ ასრულებ, შენი ხელისუფლებაში ყოფნის მიზანი რა არის?

"რ": თქვენ ფიქრობთ, რომ "ევროპული საქართველოს" საგამოძიებო კომისიაში შეყვანა დაუშვებელი იყო. რატომ გადაწყვიტა "ქართულმა ოცნებამ", რომ ისინი კომისიაში ყოფილიყვნენ?

დ.ჭ: ეგენი არიან "ნაციონალური მოძრაობა" და არა "ევროპული საქართველო", ყველაფერს თავისი სახელი უნდა დავარქვათ. მაგათ ისტორიულ სანაგვეზე ერთი წარსული და ერთი მომავალი აქვთ.

ესენი ის ხალხია, რომლებიც ადამიანებზე ძალადობდნენ, დასცინოდნენ და ახლა ჩვენი გასამართლება მოუნდათ. სირცხვილია და მე პირადად თავს საკმაოდ შეურაცხყოფილად მივიჩნევ. გამოდიან და იცინიან, როგორ შეიძლება, კვლევაზე ესაუბრათო. ხო, აბა, მაგათ დროს კვლევა და ხალხი არავის ადარდებდა. ეს არის დიდი შეცდომა, რომელიც ღიად უნდა ვაღიაროთ.

საზოგადოება ჩვენ მიერ ჩატარებულ არც გამოძიებას და არც აღარაფერს ენდობა. ამიტომაც ვამბობ, რომ მთავრობა სრულიად შესაცვლელია. ახლა მთავარ გამყალბებელ ბოკერიას ახსნა-განმარტებები უნდა ჩავაბაროთ, ამას ხალხი დაიჯერებს? ეს ხომ სასაცილოა.

"რ": დეპუტატმა ზაქარია ქუცნაშვილმა განაცხადა, რომ ბიძინა ივანიშვილი გაბრაზებული იყო. თქვენ ადასტურებთ ამას? მას ჰქონდა კონკრეტული პრეტენზიები მთავრობის მისამართით?

დ.ჭ: ბიძინა ივანიშვილი შეხვედრაზე პირველად ვნახე, აქამდე ახლოს ნანახი არ მყავდა. რა ვიცი, ალბათ ვინც მას კარგად იცნობს, ის მიხვდა, გაბრაზებული იყო თუ არა. მე პირადად ასეთი შთაბეჭდილება არ დამრჩენია. ჩვეულებრივად საუბრობდა, როგორც ტელევიზორში გამოდის ხოლმე. ვიმსჯელეთ კვლევაში ასახულ მონაცემებზე და ამ პრობლემების მოგვარებაზე.

ფაქტი ერთია, რომ ჩვენს მოსახლეობას რასაც დავპირდით, რომ ეკონომიკური პრობლემები უნდა მოგვეგვარებინა და სამართლიან სახელმწიფოში გვეცხოვრა, არ გამოვიდა. ამის აღიარება სირცხვილი არ არის და ეს პასუხისმგებლობა მთავრობამ უნდა აიღოს.

ჩვენ დავუშვით შეცდომები. ბანკების ქმედება სასწრაფოდ ასალაგმია, მათ დაუსჯელობის სინდრომი აქვთ გამძაფრებული. ხალხის გაღატაკების ხარჯზე მათი გამდიდრება დაუშვებელია, ეს ქვეყანას დაღუპავს. აქედან გამომდინარე, მივიღეთ ის, რაც მივიღეთ, ბანკებს განსაკუთრებული რეგულაცია უნდა დაუწესდეს.

"რ": უნდა ელოდოს თუ არა საზოგადოება ახლო მომავალში მთავრობის ცვლილებას?

დ.ჭ: მე მიმაჩნია, რომ ეს ცვლილება აუცილებელია და რადგანაც საზოგადოების დაკვეთაც ეს არის, აუცილებლად მოხდება. თუ სიტუაცია ასე გაგრძელდა, მხოლოდ მთავრობის პასუხისმგებლობა კი არა, შესაძლოა, დეპუტატების მანდატების დატოვებაც კი მოგვიწიოს. ზოგადად, ამაზე პასუხისმგებლობა პარლამენტმაც უნდა აიღოს.

"რ": თქვენც ფიქრობთ, რომ შესაძლოა, ქვეყანაში ვადამდელი საპარლამენტო არჩევნები დაინიშნოს?

დ.ჭ: რა თქმა უნდა, ქვეყანაში პასუხისმგებლობა ყველამ უნდა აიღოს. თუ მდგომარეობა არ გამოსწორდა, არც ვადამდელი საპარლამენტო არჩევნებია გამორიცხული. ესაა დემოკრატიული სახელმწიფო. ვერ ასრულებ მოვალეობას? წადი სახლში.

ჩაწერა სახელი