სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    რეზონანსი
    12.09.2019

      მედია-კავშირი „ობიექტივის" მთავარი რედაქტორი ბონდო მძინარაშვილი, საქართველოს ყოფილი ფინანსთა მინისტრის ნოდარ ხადურის გარდაცვალებას ეხმიანება და სოციალურ ქსელში ემოციურ პოსტს აქვეყნებს:

    „ნოდარ ხადური გარდაიცვალა და ხალხი გაკვირვებულია, - გლდანში უცხოვრია, სამოთახიან ბინაშიო...

    ასე იყო თემურ ქორიძის გარდაცვალების დროსაც: ხალხს უკვირდა, - გლდანში, ერთოთახიან ბინაში ცხოვრობდაო...

    გვიკვირს, ძალიან გვიკვირს, როცა გავიგებთ, რომ მაღალი თანამდებობის პირი დედაქალაქის ცენტრში, ფეშენებელურ სახლში ან აპარტამენტში კი არა, გარეუბანში, ჩვეულებრივი კორპუსის ჩვეულებრივ ბინაში მოკრძალებულად ცხოვრობს...

    თემურ ქორიძეს 90-იანი წლების დასაწყისიდან ვიცნობდი და ვიცოდი, როგორი უსაზღვროდ განათლებული და მოკრძალებული ადამიანი იყო. ეს განათლება, ეს წიგნიერება აყენებდა მას ამქვეყნიურ კომფორტზე მაღლა. საკუთარი თავის ფასი იცოდა და სხვათა მიმართ უდიდესი თანაგრძნობით გამოირჩეოდა. მეტსაც გეტყვით: როცა მას საყოფაცხოვრებო პირობების გაუმჯობესება, ანუ კომფორტული ბინა შესთავაზეს ქალაქის ცენტრში, ბატონმა თემურმა მრავალშვილიან ოჯახს გადასცა ის ბინა, - მათ უფრო სჭირდებათო...

    ახლა ნოდარ ხადურიც წავიდა...

    ბატონი ნოდარი ჩემზე ერთი წლით უფროსი იყო, მაგრამ ყოველთვის ბატონობით მივმართავდი. ასე იმსახურებდა, ასეთი ადამიანი იყო: უშუალო, კეთილგანწყობილი, იუმორით სავსე და, ამავდროულად, თავისი ცოდნით, განათლებით და ადამიანურობით პატივისცემით რომ განგაწყობს...

    ბევრი ტალახი ესროლეს, ბევრი ჭორი მოუგონეს, ბევრჯერ სცადეს მისი დამცირება, მაგრამ კეთილად იღიმოდა, რადგან ფიქრობდა, რომ... ჰო, გლდანში ცხოვრობდა, კორპუსში, ჩვეულებრივ სამოთახიან ბინაში... მარტო მან ხომ არა, სხვებმაც იცოდნენ - მეზობლებმა, ნათესავებმა, მეგობრებმა, კოლეგებმა... ეს საკმარისი იყო მისთვის, ნასროლი ტალახი რომ არ მიკარებოდა.

    მაგრამ ეს არ იცოდა საქართველოს მოსახლეობამ, არ იცოდა რომ კაცი, რომელსაც არც უყვარდა და არც ეცალა ღრეობებისთვის და რომლისთვისაც ქართული სუფრა კეთილგანწყობილი ადამიანების თავყრილობა იყო, ციკანს არ მიეძალებოდა...

    ხალხს უყვარს მითები.

    აბა, რა, მინისტრი იყო და მთელს თუ არა, ნახევარ ციკანს ხომ მაინც შეჭამდა?!

    ბევრჯერ ატკინეს გული, მაგრამ მაინც არ იშორებდა კეთილგანწყობილ ღიმილს...

    ჰოდა, გარდაიცვალა, გულით გარდაიცვალა მოულოდნელად და ყველას გაგვახსენდა, მოულოდნელად გაგვახსენდა, რომ ჩვენც ადამიანები ვართ. მივხვდით, რომ შეგვიძლია ადამიანი მოვკლათ სიტყვით, დაუმსახურებელი ლანძღვით... ანდა, - არ მოვკლათ!..

    49 წლის ასაკში წავიდა დიდი პროფესიონალი, პროფესორი, რომლისთვისაც მინისტრობა ტვირთი იყო და არა კომფორტის შექმნის საშუალება. მაგრამ ამაზე არ ლაპარაკობდა, რადგან სჯეროდა, რომ რაც ოჯახის წევრებმა, მეზობლებმა, ნათესავებმა, მეგობრებმა და კოლეგებმა იცოდნენ, სრულიად საკმარისი იყო და თავი არ უნდა ემართლებინა.

    ჟურნალისტებსაც ამიტომ პასუხობდა ღიმილით და არა აგრესიულად.

    ასე განათლებული და თავდაჯერებული ადამიანები იქცევიან, საკუთარ შესაძლებლობებში დარწმუნებული ადამიანები. და კიდევ, - ადამიანები, რომლებიც თანაგრძნობით ეკიდებიან სხვათა სისუსტეებს. ამიტომაც არ იყო აგრესიული.

    კი, ნოდარ ხადური ჩვეულებრივ, სამოთახიან ბინაში ცხოვრობდა ქალაქის გარეუბანში...

    ახლა ხომ გაიგეთ?!

    ჰოდა, (და)იძინეთ მშვიდად!" - წერს მძინარაშვილი.

    წყარო: პრაიმტაიმი

    დატოვე კომენტარიკომენტარები (1)
    ჩაწერა სახელი
    ლინდა   (12.09.2019)
    ღმერთმა ნათელში ამყოფოს. მკვეთრად გამოირჩეოდა ამ ქოცნაგავისაგან. ნამდვილი ინტელექტუალი იყო. გამორჩეული ადამიანების გული ვერ უძლებს იმ უმსგავსოებას, რაც დღეს საქართველოში ხდება!!! ბ-ო ბონდო, დღევანდელი თქვენი გულის ტკივილი ნამდვილად დასაფასებელია! მაგრამ გთხოვთ დააკვირდეთ თქვენს გამონათქვამებს ტელესივრცეში. ზოგჯერ ისეთი გამწარებული იცავთ ამ ქოცვირთხებს და თქვენს სამარცხვინო ირმას, ქვეყნის გამოკვეთილ მტერს, რომ ნამდვილად მეცოდებით და ხშირად ვფიქრობ: ეს ადამიანი უჭკუო არ ჩანს, განათლებულიცაა, ერკვევა ბევრ საკითხში, ხოდა საწყალი კაცი ასეთი გამეტებით ვის იცავს, იმ არსებებს, რომლებმაც ამ რამდენიმე წელი ფეხებზე დაიკიდეს ქვეყანაც და ადამიანებიც, მარტო ერთი სურვილი ამოძრავებთ, როგორ, რა გზით და რა მაქინაციებით მოიპოვონ ბევრი ფული! ამას უკვე მიაღწიეს, დღეს ათეულობით მილიონერია, გამდიდრებული ჩვენს ხარჯზე, ჩვენ კი წამალიც ვეღარ გვიყიდია> ხოდა ვფიქრობ, ეს კაციც ჩვენი მსგავსია, არა მგონია ფული თავზე ეყაროს, რა დღეშია, თავს იკლავს, არ გადაჰყვეს ამ გავერანებული ადამიანების დაცვას! დაფიქრდით ჩემო კარგო ბონდო, ვის იცავთ, ამ ქვეყნის სამარცხვინო ტიკინებს, რომლებიც ორ გროშად ყიდიან საქართველოს! თუ თქვენს ხულიგან, გულის ამრევ , სუფთა არარაობას ირმასა და მის დამქაშებს, რომლებიც ყოველ კვირას იღებენ მითითებებს როგორ უნდა მოიქცნენ! ამიტომ ადამიანურად გირჩევთ , თქვენს გულს გაუფრთხილდით, ეს გარეწრები თავს არ დაიჩაგრავენ! ეს ტვინდახშული ადამიანები კი დროზე არ მიხვდნენ თუ ვის უჭერენ მხარს! გამოფხიზლდით ხალხო!!!!!!!!!!!!!!!!!!!!


    Copyright © 2006-2019 by Resonance ltd. . All rights reserved
    ×