ამერიკის შეერთებული შტატები ავღანეთში გადამწყვეტ შეტევაზე გადადის, რამაც უნდა გადაწყვიტოს მთელი 9-წლიანი კამპანიის ბედი. სპეციალურად საიმისოდ გამოყოფილია 37 მილიარდი დოლარი, რომელითაც ავღანეთსა და ერაყში სამხედრო ოპერაციები დაფინანსდება.

აშშ-ს პრეზიდენტმა ბარაკ ობამამ უკვე მოაწერა ხელი შესაბამის კანონს. სტრატეგიული გეგმის მიხევით აგვისტოში იწყება დიდი შეტევა სამხრეთ ავღანეთზე, რომელიც თალიბანის მთავარ პლაცდარმად ითვლება.

რუსეთის პრეზიდენტმა დიმიტრი მედვედევმა რუსეთში ხანძართან ბრძოლაში ჩართვა თავდაცვის სამინისტროს უბრძანა. ამის შესახებ რუსული მედია იუწყება . კერძოდ, თავდაცვის სამინისტროს ძალები ცენტრალურ რუსეთში ხანძრების შედეგებთან ბრძოლაში ჩაერთვებიან. მედვედევმა ხანძრების შედეგების ლიკვიდაციის დავალება ასევე მისცა პრემიერ ვლადიმერ პუტინს.

ნიჟეგოროდის ოლქში მყოფ პრემიერთან სატელეფონო საუბარში მედვედევმა განაცხადა, რომ ვითარება მართლაც მძიმეა და ამგვარი პრობლემების სწრაფად მოგვარება შეუძლებელია.

"დიდი სამშენებლო სამუშაოები მოგველის. მნიშვნელოვანია, რომ მთავრობის მიერ გამოყოფილი თანხა დროულად მივიდეს რეგიონებამდე. მნიშვნელოვანია, რომ ხალხი დროებით საცხოვრებელ ადგილებზე განვათავსოთ, რადგან მუდმივ საცხოვრებელს სწრაფად ვერ შევქმნით", - განაცხადა მედვედევმა.

ტყის ხანძარი ცენტრალური რუსეთის 14 რაიონში მძვინვარებს. ხანძრების შედეგად დაღუპულთა რიცხვმა 25-ს მიაღწია.

ტყის ხანძრების გამო რუსეთში 10-მდე ადამიანი დაიღუპა, განადგურებულია 900-ზე მეტი საცხოვრებელი სახლი . "რია ნოვოსტის~ ცნობით, ყველაზე მეტი სახლი ნიჟეგოროდისა და ვორონეჟის ოლქებში დაიწვა.

ნიჟეგოროდის ოქლის სოფელ კავლეიში მხოლოდ დღეს 25 სახლი განადგურდა. შექმნილ ვითარებასთან დაკავშირებით, ნიჟეგოროდის ოლქში რუსეთის პრემიერ-მინისტრი ვლადიმერ პუტინი ჩავიდა. რუსული სააგენტოების ცნობით, პუტინი თათბირს გამართავს, რომელსაც რუსეთის საგანგებო სიტუაციათა, შინაგან საქმეთა სამინისტროებისა და სხვა უწყებათა ხელმძღვანელები დაესწრებიან.

ამასთან, რუსეთის პრეზიდენტმა დიმიტრი მედვედევმა მთავრობას დაავალა, სასწარფო დამატებითი ზომები მიიღონ ხანძრის ჩაქრობისთვის. მან, ასევე, გასცა განკარგულება დაზარალებულებისთვის ფინანსური დახმარების შესახებ. რუსეთის ცენტრალურ ნაწილში, ხანძრის ლოკალიზებას 30 სხვადასხვა ადგილზე ცდილობენ. ხანძარი მძვინვარებს ვორონეჟის, მოსკოვის, რიაზანის ოლქებში. ასევე - ვლადიმირის, ივანოვოს, პენზეს, ტვერის, როსტოვის, უდმურტიის, მორდოვიის ოლქებსა და კომის რესპუბლიკაში. რუსული სააგენტოების ცნობით, ყველაზე სერიოზული ვითარებაა ნიჟეგოროდის და ვორონეჟის ოლქებში. ამასთან, უწყლობის გამო რუსეთის 27 რეგიონში საგანგებო მდგომარეობაა გამოცხადებული.

"თურქეთის გაწევრიანება ევროკავშირში ამ ეტაპზე შეუძლებელია" - ასეთი განცხადება გააკეთა გერმანიის საგარეო საქმეთა მინისტრმა გიდო ვესტერვალემ თავის თურქ კოლეგა ახმედ დავუთოღლუსთან ისთანბულში შეხვედრის შემდეგ.

"ჩვენ ყველანაირად დაინტერესებულნი ვართ, რომ ისეთი სტრატეგიული პარტნიორი, როგორიც თურქეთია, ორიენტირებული იყოს ევროპაზე და მოლაპარაკებები ამ ქვეყანასთან პატიოსნად, საიმედოდ და საქმიანად უნდა მიმდინარეობდეს, მაგრამ ამ ეტაპზე თურქეთის ევროკავშირში გაწევრიანება შეუძლებელია" - თქვა გერმანიის საგარეო საქმეთა მინისტრმა მრავალსაათიანი მოლაპარაკებების შემდეგ.

აზერბაიჯანი რუსეთისაგან საზენიტო-სარაკეტო კომპლექსს "სი 300"-ის ორ კომპლექტაციას შეისყიდის - კონტრაქტი აზერბაიჯანის თავდაცვის სამინისტროსა და რუსულ "როსობორონექსპორტს" შორის ჯერ კიდევ შარშან გაფორმდა და მისი შესრულება უახლოეს 2 წელიწადშია დაგეგმილი.

ექსპერტების აზრით ეს არის ყველაზე ძვირფასი და თანამედროვე იარაღი, რომელიც კი რომელიმე პოსტსაბჭოურ ქვეყანას შეუძენია. აზერბაიჯანმა ამ მრისხანე იარაღში 300 მილიონი დოლარი გადაიხადა.

სომხურმა არმიამ აზერბაიჯანულ პოზიციებს ცეცხლი გაუხსნა - ავტომატური იარაღიდან და ტყვიამფრქვევებიდან ისროდნენ ნოემბერიანსკის რაიონის სოფელ ვოსკეპარიდან, რომელიც სომხეთის ტერიტორიაზე მდებარეობს, სოფელ აშაგი ასკიპარას მიმართულებით, რომელიც გაზაღსკის რაიონში მდებარეობს აზერბაიჯანის ტერიტორიაზე.

აზერბაიჯანულმა არმიამ გახსნა საპასუხო ცეცხლი, რის შედეგადაც ბრძოლა შეწყდა. ამის შესახებ ინფორმაცია აზერბაიჯანის თავდაცვის სამინისტრო ავრცელებს.

აშშ-ში მორიგი რუსი ჯაშუში დააკავეს. ნიუ-იორკის აეროპორტში ახალგაზრდა რუსი გოგონა დააკავეს, რომელსაც ქვეყნიდან სამხედრო მოწყობილობა გაქონდა . The New York Post– ის ცნობით, აშშ-ს მოქალაქე ანა ფერმენოვა რუსეთში ღამის ხედვის მოწყობილობის გატანის მცდელობისთვის დააკავეს.

24 წლის ჯაშუში ნიუ-იორკის ჯონ კენედის სახელობის აეროპორტში 15 ივლისს დაუკავებიათ. მოწყობილობა, რომლის გატანასაც ჯაშუში ამერიკიდან ცდილობდა, აშშ-ს შეიარაღების ნუსხაში შედის. იმისათვის, რომ ასეთი მოწყობილობა ქვეყნიდან გავიდეს საჭიროა სახელმწიფო დეპარტამენტის განსაკუთრებული ნებართვა, რომელიც ფერმენოვას არ ჰქონდა.

 გაზეთის ინფორმაციით, მარტში ფერმენოვა მოსკოვის რეისზე ჩაჯდომისას დააკავეს და შაშხანაზე დასამაგრებელი 15 ათას დოლარიანი ღამის ხედვის სამი მოწყობილობა აღმოუჩინეს, რომელიც, ფერმენოვას მტკიცებით, ინტერნეტით შეიძინა. გაზეთის ინფორმაციით, მაშინ სამივე მოწყობილობა ამოღებულ იქნა, ხოლო განათლებით კოსმეტოლოგი გოგონა, რომელიც ინგლისური ენის მასწავლებლად მუშაობდა, პირობით გაათავისუფლეს.

პირობის თანახმად, ფერმენოვას აშშ-ში შემოსვლის შემთხვევაში დააკავებდნენ. ოთხი თვის შემდეგ ფერმენოვა მაინც დაბრუნდა აშშ-ში, სადაც დაცვის ქვეშ აიყვანეს. ამ დროისთვის რუსი ჯაშუში დალასთან ახლოს შინა პატიმრობაში იმყოფება. მას პასპორტი ჩამოართვეს. თვის ბოლოსთვის კი ნიუ-იორკში ჩაიყვანენ, სადაც სასამართლო პროცესი ელის.

ფერმენოვას ბრალი ედება "აშშ-დან სამხედრო მოწყობილობის შეგნებულ და მიზანმიმართულ გატანაში". გარდა ამისა, ბრადლების დოკუმენტში ნათქვამია, რომ რუსმა გოგონამ აღიარა, რომ სამხედრო მოწყობილობაზე სერიული ნომერი და სხვა ამოსაცნობი ნიშნები წაშალა. დაკავებულის ადვოკატის მტკიცებით, ფერმენოვას ღამის ხედვის მოწყობილობა მეუღლისთვის უნდა ეჩუქებინა, რომელსაც მისი გამოყენება ნადირობის დროს სურდა.