სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    "მუზეუმში ყველაფერი უნდა გაკეთდეს საიმისოდ, რომ ადამიანმა ფიროსმანის ეპოქაში იმოგზაუროს"
    სალომე სარიშვილი
    04.12.2015

    კულტურული მემკვიდრეობის დაცვის ეროვნული სააგენტოსა და მუნიციპალური განვითარების ფონდის ინიციატივით, შემოდგომაზე მირზაანში ნიკო ფიროსმანის სახლ-მუზეუმის რეაბილიტაცია იგეგმება.

    როგორც "რეზონანსთან" საუბრისას ძეგლთა დაცვის სააგენტოს დირექტორი ნიკოლოზ ანთიძე ამბობს, მუზეუმის აღდგენას გლობალური დატვირთვა ექნება და გარდა აღდგენისა, ამავე ტერიტორიაზე დამთვალიერებლისთვის კეთილმოწყობილი გარემო შეიქმნება. ამასთან ერთად კი, ეტაპობრივი მუშაობა ფიროსმანის ტილოების რესტავრაციაზეც დაიწყება.

    აღდგენით სამუშაოებზე ტენდერი კულტურული მემკვიდრეობის დაცვის ეროვნულმა სააგენტომ უკვე გამოაცხადა. სატენდერო პირობების მიხდევით, უნდა მოხდეს: სახლ-მუზეუმის საძირკვლის გამაგრება, სახურავისა და იატაკის შეცვლა, აივნის სვეტებისა და რიკულების ახლით შეცვლა, კიბეების მოწესრიგება-შეცვლა, კარ-სარკმლების ახლით შეცვლა, სარდაფში ჩასასვლელი დარაბის აღდგენა, ფასადებზე გვიანდელი ბათქაშის მოხსნა, საწვიმარი მილის გამოცვლა, აგურის იატაკის მოწყობა და სხვა.

    ტენდერში მონაწილეობის მსურველთა წინადადებების მიღება 1-ელ აგვისტოს დასრულდება. გამარჯვებულმა კი მუზეუმის რეაბილიტაცია ხელშეკრულების გაფორმებიდან 70 დღეში უნდა დაასრულოს. მუზეუმის რეაბილიტაციისთვის ბიუჯეტიდან მაქსიმუმ 34 628 ათასი ლარის დახარჯვა იგეგმება.

    საგულისხმოა, რომ ნიკო ფიროსმანის სახლ-მუზეუმი საქართველოში არსებულ მუზეუმებს შორის ერთ-ერთი გამორჩეულია - ფიროსმანი სწორედ იქ დაიბადა, ხოლო მის ნივთებსა და 14-მდე ნახატს მუზეუმი დღემდე ინახავს. ფიროსმანის მუზეუმშია განთავსებული გამოჩენილი ფერმწერის, პიკასოს შედევრიც, რომელიც მან 1872 წელს ნიკო ფიროსმანს მიუძღვნა.

    აღსანიშნავია ისიც, რომ ფიროსმანის სახლ-მუზეუმი დიდი ხნის განმავლობაში სავალალო მდგომარეობაში იყო, უკანასკნელმა მიწისძვრამ კი მუზეუმი მნიშვნელოვნად დააზარალა. კულტურული მემკვიდრეობის დაცვის ეროვნული სააგენტოს მიერ უკვე რესტავრირებულია მხატვრის რამდენიმე ნამუშევარი, მუზეუმის რეაბილიტაციის პროცესში კი დანარჩენების აღდგენაც იგეგმება.

    უნდა აღინიშნოს, რომ ნახატები 100-ზე მეტ წელს ითვლის და მისი აღდგენა გარკვეულ ვადასა და სპეციფიკურ სამუშაოებს მოითხოვს.

    "სამწუხაროდ, მოხდა ისე, რომ ფიროსმანის სახლ-მუზეუმი ჩამოინგრა და ჩვენ მის რეაბილიტაციას ამ დრომდე ვერ ვახერხებდით. ამ საქმეში კი როგორც კულტურული მემკვიდრეობის გულშემატკივარი, მუნიციპალური განვითარების ფონდი დაგვეხმარა და მისი აღდგენის ინიციატივა მთავრობის დონეზე გაიტანა, რის შემდეგაც მთავრობის გადაწყვეტილებით თანხა გამოიყო, ახლა სატენდერო პროცედურები მიმდინარეობს.

    პროექტი ჩვენი მომზადებულია, თუმცა ეს ძალიან მცირე ნაწილია იმ ყველაფრისა, რაც ზოგადად ფიროსმანის მუზეუმში უნდა ჩატარდეს. ახლა იქ თანამშრომლების გადამზადება და ოპტიმიზაცია მიმდინარეობს, რათა მუზეუმი მისივე მნიშვნელობიდან გამომდინარე, უფრო წარმოჩინებული იყოს, თუმცა ეს არ ნიშნავს იმას, რომ დამსახურებულ თანამშრომლებს სამსახურის დატოვება მოუწევთ.

    "იქ მოხვდებიან ადამიანები, რომლებიც კულტურული მემკვიდრეობის თანამედროვე სტანდარტებით წარმოჩინებას შეუწყობენ ხელს. უნდა აღინიშნოს, რომ მუზეუმში მუშაობენ საკმაოდ დამსახურებული ადამიანები, რომელთა ძალისხმევითაც ის შენარჩუნდა და 90-იან წლებში გაძარცვას გადაურჩა.

    "სამწუხაროა, რომ ფიროსმანის სახლ-მუზეუმში შესაბამისი გარემოს შექმნა აქამდე ვერ მოხერხდა. წელს ჩვენ მოვახერხეთ ის, რომ მუზეუმში გამოფენილი ნახატები და მათ შორის პიკასოს ნახატი, რომელიც მან 1872 წელს ფიროსმანს მიუძღვნა, ქვეყნის ტერიტორიაზე, სხვადასხვა ქალაქში ვამოგზაურეთ", - გვითხრა ძეგლთა დაცვის სააგენტოს დირექტორმა ნიკა ანთიძემ.

    მისივე თქმით, ფიროსმანის მუზეუმს გლობალური რეაბილიტაცია ჩაუტარდება. მომავალი წლის გეგმაში კი ტერიტორიის კეთილმოწყობაც იგეგმება, რათა მუზეუმი არსებობდეს არა მხოლოდ დამთვალიერებლისთვის, არამედ იქ ხელოვანი ადამიანებისთვის შემოქმედებითი გარემო შეიქმნას, მოეწყოს ფესტივალები, გამოფენები და ა.შ.

    "ამ ყველაფერს გლობალური დატვირთვა უნდა მიეცეს, რათა ადამიანს ამ ადგილას ჩასვლა ბევრჯერ მოუნდეს. შეიქმნას სტუდენტებისთვის შესაბამისი გარემო, რათა ისინი ფიროსმანის შემოქმედებას ეზიარონ და აღიქვან, როგორ გარემოში გაიზარდა ნიკო ფიროსმანი. ყველაფერი გაკეთდეს საიმისოდ, რომ ადამიანმა ფიროსმანის ეპოქაში იმოგზაუროს.

    "უნდა აღინიშნოს, რომ ფიროსმანის ნახატების ნაწილობრივ რეაბილიტაცია ეტაპობრივად მიმდინარეობს, მათგან 4 ტილოს უკვე ჩაუტარდა რეაბილიტაცია. აქვე აღვნიშნავ, რომ ეს ერთი და ორდღიანი პროცედურა არ გახლავთ და საკმაოდ დიდ დროს მოითხოვს.

    "რესტავრაციისთვის სააგენტომ შესაბამისი ფინანსური სახსრებიც გამოყო, რათა ნახატებს კვალიფიციური რესტავრაცია ჩატარებოდა. არის კიდევ რამდენიმე ნახატი, რომელიც რესტავრაციას საჭიროებს და ჩვენ ამას ეტაპობრივად გავაკეთებთ. უნდა აღინიშნოს, რომ მუზეუმში გარდა ფიროსმანისა და პიკასოს შედევრებისა, სხვა მხატვრების ნახატებიც ინახება, რომელთა ოპტიმიზაცია უკვე მოვახდინეთ და ვფიქრობთ სათანადო გარემოს შექნას, რათა უკეთ იქნეს დაცული.

    "მომავალი წლის გეგმაში 130 ათასი ლარია გამოყოფილი, თუმცა ამის შემდეგ ვფიქრობთ, რომ დაახლოებით 20 ათასამდე გამოვყოფთ. მუზეუმი 2017 წლის ბოლოს პირველადი გადაუდებელი სამუშაოებითა და ინფრასტრუქტურით უკვე მოწყობილი იქნება", - ამბობს "რეზონანსთან" საუბრისას ნიკოლოზ ანთიძე.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2018 by Resonance ltd. . All rights reserved