რეზონანსი
12.11.2019

  დამოუკიდებელი დეპუტატი ლევან გოგიჩაიშვილი საპარლამენტო უმრავლესობის დეპუტატებს სთავაზობს, კანონპროექტის მომხსენებელმა დასმულ კითხვებს პასუხი არ გასცეს და პირდაპირ კენჭისყრა გაიმართოს. აღნიშნულ შემოთავაზებას არ ეთანხმებიან უმრავლესობის წარმომადგენლები.

„აქ სათამაშოდ არ ვართ. კითხვები დაისვა იმისთვის რომ მივიღოთ პასუხები. ამიტომ კიდევ ერთხელ გთავაზობთ, გთხოვთ, უმრავლესობის ფორმატში განვიხილოთ და შევთანხმდეთ ქვეყნის სწორ განვითარებაზე," - განაცხადა დიმიტრი ხუნდაძემ.

საპარლამენტო უმრავლესობის ლიდერმა კოლეგებს ხვალ დილით უმრავლესობის სხდომის ჩატარება შესთავაზა.

„არ ვართ ისეთ სიტუაციაში, რომ კენჭი ვუყაროთ და ან ერთი აზრი გავიდეს, ან მეორე. გთავაზობთ, ხვალ დილით უმრავლესობის სხდომა შევკრიბოთ და ვილაპარაკოთ. რომ მოხდეს ისე, რომ ის ხალხი მეტი აღმოჩნდეს, ვინც წინააღმდეგია, მერე რა ვქნათ?" - განაცხადა გია ვოლსკიმ.

პარლამენტის თავმჯდომარის არჩილ თალაკვაძის განცხადებით კი, ხვალ პლენარული სხდომა ნებისმიერ შემთხვევაში 12:00 საათზე დაიწყება. მან უმრავლესობის წევრებს სთხოვა, შეხვედრა პარლამენტის პლენარული სხდომის დაწყებამდე უზრუნველყონ.

„მეგობრებო, ხვალ 12 საათზე ჩვენ გვაქვს პლენარული სხდომა. ნუ დაგვავიწყდება, რომ საარჩევნო რეფორმის გარდა, გველოდებიან ჩვენი მოქალაქეები, სახელმწიფო, ქვეყანა. არის 2020 წლის ბიუჯეტის განხილვა და ბიუჯეტი უნდა დამტკიცდეს ვადებში. შესაბამისად, ხვალ სხდომა ნებისმიერ შემთხვევაში 12:00 საათზე განახლდება. თუ უმრავლესობის სხდომის ჩატარებას მიზანშეწონილად მიიჩნევთ, გთხოვთ, რომ ეს უზრუნველყოთ სხდომის დაწყებამდე," - განაცხადა არჩილ თალაკვაძემ.

წყარო: ინტერპრესნიუსი

 

 

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე

ლიცენზია
დატოვე კომენტარიკომენტარები (0)
ჩაწერა სახელი

Copyright © 2006-2020 by Resonance ltd. . All rights reserved
×