რეზონანსი
19.10.2019

  „ძირითადი მიზანი, ამ შემთხვევაში პროკურატურის, როგორც ხელისუფლების დავალებების შემსრულებლის, არის ნიკა გვარამიას დაკავება და ამის მეშვეობით უკვე „მთავარი არხის" განეიტრალება და მისი მაუწყებლობის შეფერხება", - ამის შესახებ ტელეწამყვან გიორგი გაბუნიას ადვოკატმა დიმიტრი საძაგლიშვილმა პროკურატურაში შესვლამდე განაცხადა.

მისი თქმით, გიორგი გაბუნიას გამოკითხვაზე დაბარება „რუსთავი 2"-ის ყოფილი ჟურნალისტების დაკითხვების სერიის ნაწილია.

„ეს არის „რუსთავი 2"-ის ყოფილი ჟურნალისტების დაკითხვების სერიის გაგრძელება, რომლებიც ახლა უკვე საქმიანობენ „მთავარ არხზე" და „ფორმულაზე". რეალურად, გამოძიებას, ალბათ, იგივე შინაარსის კითხვები ექნება, რა კითხვებიც ჰქონდა ნოდარ მელაძესთან, გიორგი ლაფერაშვილთან და ზაალ უდუმაშვილთან. არ ვიცი, შეიძლება, გამოძიებას აინტერესებდეს, როგორ აკეთებდნენ ასეთ წარმატებულ პროდუქტს და რატომ იყო „რუსთავი 2" ასეთი რეიტინგული, როდესაც ეს ადამიანები მუშაობდნენ ამ არხზე. გაუთქმელობას რაც შეეხება, პრინციპში, აქამდე მოწმის სახით გამოკითხული ყველა პირი დაავალდებულეს, რომ არ გაემჟღავნებინათ ინფორმაცია, რაც მათთვის ცნობილი გახდა გამოკითხვისას და სავარაუდოდ, ეს გიორგი გაბუნიასაც შეეხება", - განაცხადა საძაგლიშვილმა.

მისივე თქმით, გამოძიება დაწყებულია ნინო ნიჟარაძის წარმომადგენლის განცხადების საფუძველზე 20 ივლისს და მას შემდეგ მიმდინარეობს. მანვე უპასუხა კითხვას გამოძიების რეალური მიზნების შესახებ.

„პრინციპში, ძირითადი მიზანი, ამ შემთხვევაში პროკურატურის, როგორც ხელისუფლების დავალებების შემსრულებლის, არის ნიკა გვარამიას დაკავება და ამის მეშვეობით უკვე „მთავარი არხის" განეიტრალება და მისი მაუწყებლობის შეფერხება, რაც აქამდე ვერ მოხერხდა და ვერც მომავალში მოხერხდება", - განაცხადა ადვოკატმა.

თავად გიორგი გაბუნიას პროკურატურაში შესვლამდე მედიასთან კომენტარი არ გაუკეთებია.

წყარო: ინტერპრესნიუსი

 

 

 

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე

ლიცენზია
დატოვე კომენტარიკომენტარები (0)
ჩაწერა სახელი

Copyright © 2006-2020 by Resonance ltd. . All rights reserved
×