„მთავარი არხის“ თანამშრომლებმა გენერალური დირექტორისგან, გიორგი გაბუნიასგან შეტყობინება მიიღეს. მან ჟურნალისტებს აუწყა, რომ 1 მაისიდან არხის მაუწყებლობა სრულად შეწყდებოდა.

გენერალური დირექტორისგან მიღებული წერილის შინაარსი რადიო თავისუფლებას „მთავარი ახრის“ ორმა თანამშრომელმა გააცნო, ჟურნალისტების ნაწილი კი ტელევიზიის შესახებ სოციალურ ქსელში წერენ.

„ეს დღეც დადგა... ხუთწლიანი თანაცხოვრება დასრულებულია. იძულებით ვტოვებ სახლს, რომლის წევრიც შექმნის პირველი დღიდან ვიყავი. დღეს ერთი მძიმე ეტაპი დასრულდა“, - დაწერა „ფეისბუკში“ ჟურნალისტმა ირაკლი ბახტაძემ.

მის მსგავსად „ბოლო იმედის“ ჩაქრობის შესახებ საუბრობს თათია წოწონავაც:

„რუსთავი-2 დან“ წამოსვლის შემდეგ თავიდან უნდა დაგვემტკიცებინა ყველაფერი... თამამად შემიძლია ვთქვა,რომ ჩვენ ყველაზე მაგარი არხი შევქმენით! ჩვენ, თითოეულმა თანამშრომელმა, რომელმაც ჯანმრთელობის და სიცოცხლის რისკის ფასად ყველაფერი გავაკეთეთ მთავარისთვის“.

„მთავარი არხი“ მწირი საეთერო ბადით 15 თებერვლის შემდეგ მაუწყებლობდა - ტელეეთერში გადიოდა მხოლოდ სერიალები; გადაცემები კი, რომლებიც პირდაპირ ეთერში გადაიცემოდა, გაჩერდა. მოგვიანებით შეწყდა მაუწყებლობა იმ მაყურებლისთვის, ვინც ე.წ. სახლის ანტენას იყენებდა.