ბოლო რამდენიმე თვეა ბაზარი სრულად ადგილობრივი წარმოების სასურსათო კვერცხით მარაგდება. თურქეთში, რომელიც საქართველოს მთავარი მომწოდებელია, კვერცხის დეფიციტია, ამიტომ იმპორტი შეწყდა, მოთხოვნის 100-ვე პროცენტის დაკმაყოფილება კი ადგილობრივი ფაბრიკებიდან ხორციელდება.

"კოდას” გენერალური დირექტორის ზურაბ ჭუჭულაშვილის თქმით, ამ ეტაპზე კვერცხზე ფასი სტაბილურია და საფასო პოლიტიკის ცვლილება წინასააღდგომოდ არ განიხილება, თუმცა როგორც კომპანიის ხელმძღვანელი ამბობს, ერთ-ერთ მთავარ სამომხმარებლო პროდუქტზე ფასი წლის დასაწყისში გაზარდეს, რაზედაც დიდი გავლენა ფრინველის საკვებზე მზარდმა ხარჯმა იქონია.

"წინასააღდგომოდ არანაირად არ იგეგმება ფასების გადახედვა, არამხოლოდ სააღდგომოდ, თუ რამე რადიკალურად არ შეიცვალა უახლოესი 6 თვის განმავლობაში არ იგეგმება ჩვენს პროდუქციაზე ფასების მატება. ბოლოს ფასებს გადავხედეთ წლის დასაწყისში და ეს იყო დაახლოებით 2%-იანი ზრდა, რაც გამოწვეული იყო იმით, რომ 30%-ით გაგვიძვირდა ძირითადი საკვები კომპონენტები, სიმინდი, ხორბალი. დაახლოებით 60 თეთრი ღირდა სიმინდი დეკემბერში და დღეს ღირს 90-95 თეთრი. საკვების ნაწილში ძალიან დიდი ფასის მატება იყო, დაახლოებით საბოლოო პროდუქტი გაგვიძვირდა 12%-ით და ჩვენ 2-3 %-ით გავაძვირეთ კვერცხი”,- აცხადებს ზურაბ ჭუჭულაშვილი.