„ქართული ოცნების“ გორგასლის ოფისში, საარჩევნო შტაბის ხელმძღვანელმა, პრემიერ-მინისტრმა, ირაკლი კობახიძემ ბრიფინგი გამართა, სადაც არჩევნებში წარსადგენი პარტიის დელეგატები დაასახელა. მისივე თქმით, 26 ოქტომბრის საპარლამენტო არჩევნები ჩატარდება სრულად პროპორციული სისტემით.

„როგორც მოგეხსენებათ, 26 ოქტომბრის საპარლამენტო არჩევნები ჩატარდება სრულად პროპორციული სისტემით. ასევე იცით, რომ მაჟორიტარული სისტემის გაუქმებას აქვს სერიოზული უარყოფითი მხარეები, რაც, პირველ რიგში, ამომრჩეველსა და კანდიდატებს შორის კავშირის შესუსტებით გამოიხატება. ამ ნაკლოვანების გარკვეულწილად აღმოსაფხვრელად, საარჩევნო კანონმდებლობით შემოღებულ იქნა დელეგატის ინსტიტუტი.

შეგახსენებთ, რომ დელეგატები არიან პარტიის პროპორციულ საარჩევნო სიაში წარმოდგენილი კანდიდატები, რომლებიც კონკრეტულ საარჩევნო ოლქებში კამპანიის წარმოებაზე და უკვე არჩევნების შემდეგ, საქართველოს პარლამენტში შესაბამისი ამომრჩევლის ინტერესების დაცვაზე იქნებიან პასუხისმგებელი.

„ქართული ოცნება“ დელეგატებს წარადგენს ოცდაათივე საარჩევნო ოლქში. დღეს წარმოგიდგენთ 22 დელეგატს, რომლებიც ჩვენს საარჩევნო კამპანიას გაუძღვებიან რეგიონებში.

ესენი არიან, დავიწყებ კახეთით:

დავით სონღულაშვილი- გურჯაანი-საგარეჯო-სიღნაღი-დედოფლისწყარო;

ირაკლი ქადაგიშვილი- თელავი-ახმეტა-ყვარელი-ლაგოდეხი; 

რაც შეეხება რუსთავს და გარდაბნის ისტორიულ სოფლებს ირაკლი შატაკიშვილი, ასევე მოქმედი დეპუტატი იქნება წარდგენილი.

მარნეული-გარდაბანი - ზაურ დარგალი

ბოლნისი-დმანისი-თეთრიწყარო-წალკის ოლქს, აქ იქნება ბოლნისის მოქმედი მერი წარდგენილი, დავით შერაზადიშვილი

ახალციხე-ბორჯომი-ასპინძა-ადიგენი - ანტონ ობოლაშვილი, ასევე მოქმედი დეპუტატი.

ახალქალაქი-ნინოწმინდა - მოქმედი დეპუტატი სამველ მანუკიანი.

მცხეთა-მთიანეთში დიმიტრი ხუნდაძე იქნება დელეგატად წარდგენილი პროპორციულ სიაში.

გორი-კასპი - გორის მოქმედი მერი, ლადო ხინჩეგაშვილი იქნება წარდგენილი კანდიდატად.

ხაშური-ქარელი - მოქმედი დეპუტატი ზაზა დუგლაძე

ქუთაისში, ასევე მოქმედი დეპუტატი ზაზა ლომინაძე

წყალტუბო-სამტრედია-ვანი-ხონი - გივი ჭიჭინაძე

საჩხერე-ჭიათურა-ხარაგაული - პაატა კვიჟინაძე.

ზესტაფონი-ბაღდათი-თერჯოლა-ტყიბულის ოლქში წარდგენილი იქნება ზვიად შალამბერიძე, მოქმედი გუბერნატორი.

ზუგდიდში დელეგატი იქნება დათო კოდუა, რომელიც არის გუბერნატორის ყოფილი მოადგილე.

ფოთი-ხობი-სენაკში - მოქმედი დეპუტატი გიორგი ხახუბია.

მარტვილი-აბაშა-წალენჯიხა-ჩხოროწყუ - ილია ინჯია, რომელიც არის წარმატებული ბიზნესმენი.

გურიაში, ოზურგეთი-ლანჩხუთი-ჩოხატაური ვასიკო ჩიგოგიძე იქნება დელეგატი .

რაჭა-ლეჩხუმ-სვანეთში გოჩა ენუქიძე, ასევე მოქმედი დეპუტატი.

ბათუმში - არჩილ ბერიძე, რომელიც არის ჯგუფ „ალილოს“ სოლისტი.

ქობულეთში წარმატებული ბიზნესმენი გია ჭყონია იქნება კანდიდატი.

ხელვაჩაური-ქედა-შუახევი-ხულო - ანზორ ბოლქვაძე, მოქმედი დეპუტატი.

ყველა დელეგატი „ქართული ოცნების“ პროპორციულ სიაში იქნება წარმოდგენილი გამსვლელ ადგილზე. შესაბამისად, ჩვენ უზრუნველვყოფთ იმას, რომ მომდევნო მოწვევის პარლამენტში უკლებლივ ყველა ქალაქს და რეგიონს ეყოლება თავისი წარმომადგენელი და ამით ნაწილობრივ იქნება აღმოფხვრილი ის ნაკლოვანება, რომელიც არის დაკავშირებული მაჟორიტარული სისტემის გაუქმებასთან.

არიან მთელი რიგი დეპუტატები, რომლებიც მანამდე იყვნენ შესაბამისი ოლქების მაჟორიტარები, მათი უმეტესობაც იქნება სიაში წარმოდგენილი, თუმცა არა დელეგატის სტატუსით.

რაც შეეხება თბილისის 8 დელეგატს, მათ დავასახელებთ უახლოეს დღეებში“, - განაცხადა კობახიძემ.