რუსული ძალები უკრაინის ოკუპირებულ რაიონებში კარდაკარ შემოწმებას ახორციელებენ და სამხედრო სამსახურში გაწვევისთვის შესაბამისი ასაკის მქონე ახალგაზრდებს ეძებენ, - ამის შესახებ უკრაინის ოპერატიული სარდლობა „სამხრეთი" იუწყება.

„დროებით ოკუპირებულ ტერიტორიებზე გრძელდება სამობილიზაციო ღონისძიებები, რომლის ფარგლებშიც საოკუპაციო ძალების წარმომადგენლები კარდაკარ დადიან და სამხედრო მოსამსახურეების სიებს ადგენენ", - ნათქვამია ოპერატიული სარდლობის განცხადებაში.

მათივე ინფორმაციით, რუსულმა ძალებმა ასევე გააძლიერეს საბუთების შემოწმება საგუშაგოებზე, რაც „მაქსიმალურად ართულებს" ოკუპირებული ტერიტორიების დატოვებას.