სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    წინასაახალწლო აქტიურობა უკვე შესამჩნევია, მაგრამ რა იქნება მომავალში, ამის პროგნოზირება ყველას უჭირს
    თეო გუდავაძე
    24.11.2017

     დედაქალაქში უძრავი ქონების ბაზარზე, ბოლო სამი თვეა, მდგომარეობა მოულოდნელად გამოსწორდა და რეალიზაცია საკმაოდ წარმატებით მიმდინარეობს. ბოლოდროინდელი ტენდენციის მიხედვით, ადამიანები უმეტესად ახალაშენებულ ბინებს ანიჭებენ უპირატესობას. ბაზარზე ძველ ბინებზე მოთხოვნა შემცირდა, რამაც ფასზე გავლენა მოახდინა და მისი ღირებულება შეამცირა.

    როგორც უძრავი ქონების სააგენტო "კიბის" დამფუძნებელი ნელი გოგუაძე "რეზონანსთან" საუბრისას აცხადებს, ბოლო პერიოდში ახალაშენებულ ბინებზე მოთხოვნა საკმაოდ გაიზარდა:

    "განვადების სისტემამ ძალიან დიდი გავლენა მოახდინა ადამიანებზე და მათთვის სხვადასხვა კომპანიის მიერ დაწესებული პირობები საკმაოდ მიმზიდველი აღმოჩნდა. ბოლო სამი თვეა, მიუხედავად ლარის დევალვაციისა, რეალიზაციამ საკმაოდ მოიმატა. ეს შეიძლება გარკვეულწილად მინიმალური თანხისა და გაწერილი გრაფიკით გადახდის დამსახურებაცაა.

    ვერ ვიტყვი, რომ ლარის კურსის ცვალებადობას საერთოდ არ უმოქმედია უძრავი ქონების ბიზნესზე. მთელი წელი შეიმჩნეოდა მერყეობა, მაგრამ, ჩვენდა გასაკვირად, ბოლო პერიოდში საკმაოდ გააქტიურდა ბაზარი. მოთხოვნა უფრო მეტად ახალაშენებულ ბინებზეა, თუმცა აქტუალობას არც ძველი კარგავს", - განუცხადა "რეზონანსს" უძრავი ქონების სააგენტოს დამფუძნებელმა ნელი გოგუაძემ.

    უძრავი ქონების ლარში ფასდადებას, რაც ძალაში პირველი ივლისიდან შევიდა, დადგენილ ფასზე გავლენა საერთოდ არ მოუხდენია. უბრალოდ, ახალმა წესმა უფრო ხელსაყრელი გახადა ბინის შეძენა იმ ადამიანებისთვის, ვისაც დანაზოგი ლარში აქვს.

    "კარგად ვითარდება გარეუბნები. მაგალითად, გლდანში მეტროს მიმდებარე ტერიტორიას ხალხი მიაწყდა. იქ შედარებით დაბალი ფასია - 500 დოლარიდან იწყება 1 კვ/მ-ის ღირებულება და ვისაც დანაზოგი ცოტა აქვს, ურჩევნია, იქ შეიძინოს ბინა.

    შეიძლება ითქვას, რომ მოთხოვნა გაიზარდა მეტროსადგურების მიმდებარე ტერიტორიებზე არსებულ ბინებზე. რაც შეეხება სამომავლო პერსპექტივას, ცენტრალურ უბნებში ბინები ყველა შემთხვევაში გაძვირდება, რადგან ახალი მშენებლობისთვის ადგილი ფიზიკურად აღარ არის, რაც განაპირობებს მოთხოვნასთან ერთად ფასის ზრდას", - აღნიშნა გოგუაძემ.

    მაკლერი ლალი მურდალაშვილი ერთ-ერთი მათგანია, ვინც ამ სფეროში უკვე წლებია, მუშაობს. მისი ინფორმაციით, წლის ამ პერიოდში ყოველთვის შესამჩნევია აქტიურობა, რადგან წინასაახალწლოდ ადამიანები ცდილობენ, მოასწრონ მათთვის სასურველი ფართის შეძენა.

    "რამდენიმე წელია, უძრავი ქონების ბაზარზე ვმუშაობ, ძირითადად ცენტრალურ უბნებზე ვაკეთებ აქცენტს, სადაც მოსახლეობის მსყიდველუნარიანობა შედარებით მაღალია, მაგრამ პრობლემები აქაც არის. საერთოდ, ახალი წლის წინა დღეები ყოველთვის გამოირჩევა კლიენტების აქტიურობით, შესაბამისად, გამიჭირდება კონკრეტულად ამ პერიოდის დადებითად შეფასება.

    ლარის კურსის მერყეობამ პირდაპირ დაარტყა ამ ბიზნესს, რადგან ხალხს ძალიან გაუჭირდა. ის ბინები, რომლებიც დოლარში იყიდება, რთული შესაძენი გახდა მათთვის. მთელი ზამთარი თუ ეს კურსი შენარჩუნდება, ძალიან გაუჭირდებათ უძრავი ქონების სააგენტოებს.

    ძველი ბინების ფასი ახალაშენებულს დაეწია და გაუსწრო კიდეც. ამიტომ ახალ ბინებს უფრო ყიდულობენ, ვიზუალური თვალსაზრისითაც უფრო მეტად მოსწონთ, განსაკუთრებით ახალგაზრდებს", - განუცხადა "რეზონანსს" ლალი მურდალაშვილმა.

    "ხრუშჩოვკებმა" თუ სხვა ძველი ტიპის კორპუსებმა უკვე ამოწურა თავისი თავი, მოსახლეობაც ცდილობს, ახალ გარემოში მოახერხოს საცხოვრებელი ფართის შეძენა. ძველ კორპუსებში სადარბაზოები მოუწესრიგებელია - ლიფტიდან დაწყებული, სახურავითა და კიბეებით დამთავრებული. ამ ყველაფერმა განაპირობა ახალაშენებულ ბინებზე მოთხოვნის ზრდა. რადგანაც ფასი დიდად არ განსხვავდება, ამიტომ ადამიანებს ურჩევნიათ, ფართი მშენებარე კორპუსებში შეიძინონ.

    არაპროგნოზირებადი ეკონომიკური გარემო, დოლარის გაძვირება და ეროვნული ვალუტის დასუსტება დიდ ზიანს აყენებს უძრავი ქონების ბაზარს. მაკლერები ამბობენ, რომ ეს საქმიანობა სტაბილური არასდროს იყო, თუმცა წელს განსაკუთრებით შესამჩნევი გახდა ვალუტის მერყეობა. ამიტომ ზოგჯერ საერთოდ გაჩერებულია გაყიდვის პროცესი.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2017 by Resonance ltd. . All rights reserved
    Site Meter