უძრავი ქონების ბაზარზე სტაბილურობა წელსაც შენარჩუნებულია. მართალია, საცხოვრებელი უძრავი ქონების ფასების ინდექსი მცირედით გაიზარდა, თუმცა ამას საბაზრო დინამიკაზე არსებითი გავლენა არ მოუხდენია. როგორც სამშენებლო კომპანიებში განმარტავენ, 2023 წელი ბოლო წლების განმავლობაში ერთ-ერთი საუკეთესო იყო და დადებითი ტენდენცია წელსაც არ შეცვლილა. ფასები ფაქტობრივად შენარჩუნებულია და მოცემულობა სავარაუდოდ წლის ბოლომდე არ შეიცვლება.

რაც შეეხება ოფიციალურ სტატისტიკას, საქსტატის მონაცემებით, 2024 წლის მეორე კვარტალში, წინა კვარტალთან შედარებით საცხოვრებელი უძრავი ქონების ფასების ინდექსი 4.8 პროცენტით გაიზარდა, ხოლო ინდექსის წლიურმა ზრდამ 14.9 პროცენტი შეადგინა. 2020 წლის საშუალოსთან შედარებით ინდექსი 48.1 პროცენტით არის გაზრდილი.

საცხოვრებელი უძრავი ქონების ფასების ინდექსის დაფარვა შემოიფარგლება ქ. თბილისით და მოიცავს მხოლოდ ახალი საცხოვრებელი უძრავი ქონების ბაზარს, როგორც მრავალსართულიანი სახლების (ბინების), ისე კერძო სახლების სეგმენტებს.

2024 წლის მეორე კვარტალში, წინა კვარტალთან შედარებით, ფასების ზრდა დაფიქსირდა როგორც საცხოვრებელი ბინების სეგმენტში (4.8 პროცენტი), ისე კერძო სახლების სეგმენტში (4.6 პროცენტი). 2023 წლის მეორე კვარტალთან შედარებით ფასების ზრდა დაფიქსირდა ორივე სეგმენტში - ბინებზე 14.4 პროცენტით, ხოლო კერძო სახლებზე 16.8 პროცენტით.

კომპანია „არსის" გენერალურმა დირექტორმა ბესო ორთოიძემ `რეზონანსთან" განაცხადა, 2024 წელს უძრავ ქონებაზე მაღალი მოთხოვნა შენარჩუნდება, თუკი ბაზარზე რაიმე გლობალური პროცესების გავლენას ადგილი არ ექნება.

მისი თქმით, დეველოპერები არ ელოდებიან, რომ მოკლევადიან პერიოდში საქართველოს უძრავი ქონების ბაზარზე მიწოდება მოთხოვნას გადააჭარბებს, მიუხედავად იმისა, რომ 2023 წელს საცხოვრებელ ფართებზე გაცემული ნებართვების რიცხვი, წინა წელთან შედარებით, მკვეთრად გაზრდილი იყო.

„უძრავი ქონების ბაზრისთვის ყველაზე აქტიური პერიოდი ბოლო წლების განმავლობაში 2023 წელი იყო, როცა გაყიდვები 25%-ით გაიზარდა. უძრავი ქონების სექტორს 2019 წლის შემდეგ, ასეთი ლოგიკური და სტაბილური წელი, ჯერ არ ჰქონია. ამით პანდემიური პერიოდის გამოწვევები მნიშვნელოვნად იქნა დაძლეული და ბაზარმა სტაბილური განვითარება განაგრძო. ახლა დადებითი დინამიკაა, მაგრამ მოთხოვნა არ არის მნიშვნელოვნად გაზრდილი, მცირედი ზრდა კი რეალურად ამინდს ვერ ცვლის. 2024 წლის ბოლომდე ცვლილებას არ ველოდებით. წელს ფასები ფაქტობრივად შენარჩუნებულია, წლიურ ჭრილში 5% - იანი ზრდა დიდ სხვაობას ვერ გვაძლევს. მთავარია ფასი გარკვეულწილად შენარჩუნდეს და თუ ბუნებრივი დინამიკა იქნება, უძრავი ქონების ღირებულება ცოტათი მომატებს კიდეც", - აღნიშნა ბესო ორთოიძემ.

მისი თქმით, დღესდღეობით სექტორში არსებული კადრების დეფიციტი უფრო დიდ გამოწვევას წარმოადგენს, ვიდრე რისკი, რომ უახლოეს პერიოდში უძრავი ქონების ბაზარზე მიწოდება მოთხოვნას გადააჭარბებს. „მაგალითისთვის, 2026-2027 წლებში ჩასაბარებელი ბინების ნაწილი უკვე რეალიზებულია რაც მიუთითებს იმაზე, რომ ქვეყანაში უძრავ ქონებაზე ძალიან მყარი და სტაბილური მოთხოვნა გვაქვს. რაც შეეხება კადრებს, მათი სიმცირე ნამდვილად არის პრობლემა, რადგან ამ რესურსით ფიზიკურად შეუძლებელია იმ დიდი რაოდენობის პროექტების განხორციელება, რომელთა მშენებლობებზეც ნებართვებია გაცემული",- განმარტა ბესო ორთოიძემ.

მისვე ინფორმაციით, დედაქალაქის მასშტაბით, უძრავი ქონების მყიდველი ძირითადად საქართველოს მოქალაქეები არიან. რაც შეეხება აჭარას, სადაც ასევე დიდი მოთხოვნაა, ბესო ორთოიძე მიმდინარე ტენდენციას ვერ აფასებს და დასძენს, რომ აჭარის რეგიონში „არსს" პროექტები არ აქვს. შესაბამისად, იგი რეგიონში მიმდინარე პროცესებზე საუბრისგან თავს იკავებს. ამასთან, განაცხადა, რომ თბილისში მომხმარებლების 90%-ზე მეტს ქართველები წარმოადგენენ.

აჭარაში, განსაკუთრებით კი ბათუმში, სიტუაცია განსხვავებულია იმ მხრივ, რომ რუსების მიერ შეძენილი უძრავი ქონება უკვე აქტიურად გამოდის ბაზარზე გასაყიდად.

როგორც „საქართველოს უძრავი ქონების ეროვნული ასოციაციის" ხელმძღვანელი ვაჟა მებაღიშვილი აცხადებს, ტენდენცია 2023 წელს დაიწყო და დღესაც გრძელდება.

„რუსეთის მოქალაქეების იმ ნაწილმა, რომელიც ომის შემდეგ საქართველოში შემოვიდა და უძრავი ქონება შეიძინა, იმდენად ადაპტირდა ქართულ გარემოსთან, რომ სექტორში უკვე დომინანტი გახდა.

განსაკუთრებით ეს ეხება აჭარის რეგიონს, სადაც რუსული სააგენტოები მომრავლდნენ. შესაბამისდად, ბინების ყიდვა-გაყიდვის პროცესში აქტიურად არიან ჩართული. ძირითადად იმ ბინების რეალიზაცია ხდება, რომელიც რუსებმა 2021-2022 წლებში შეიძინეს, უკვე ბაზარზე გასაყიდად გამოაქვთ. ერთი შეხედვით, საცხოვრებლად შეიძინეს ბინები, მაგრამ ისე მოხდა, რომ ბიზნესად აქციეს. აქ მხოლოდ უძრავ ქონებაზე არ არის საუბარი, ბევრი ბიზნესი აქვთ უკვე ჩვენს ქვეყანაში და სხვადასხვა ტიპის ფულის შოვნის წყარო გაიჩინეს. ყველაზე სარფიანი ამ მხრივ არის უძრავი ქონების შეძენა, გარემონტება და შემდეგ რეალიზაცია. ეს მიმართულება უკვე კარგად აითვისეს. ჰყიდიან ძირითადად რუსებსა და უცხოელებზე, ყველაზე ნაკლებად - ქართველებზე. განსაკუთრებით შემაშფოთებელია, რომ აჭარის რეგიონში უძრავი ქონების დიდი წილი დაიკავეს", - აღნიშნა ვაჟა მებაღიშვილმა „რეზონანსთან".

მისი თქმით, თუ ქვეყანაში ეკონომიკური სტაბილურობა შენარჩუნდა, უძრავი ქონების ბაზარზეც ვითარება არ შეიცვლება.

„რეგიონში მიმდინარე პროცესების ფონზე საქართველო სტაბილურობას მაინც ინარჩუნებს და საინვესტიციოდ მიმზიდველი ქვეყანაა. შესაბამისად, ქვეყნის მიმართ არის გარკვეული ინტერესი და ვითარდება ინფრასტრუქტურა. ეკონომიკური ვითარება მეტნაკლებად სტაბილურია და ეფექტებიც შესაბამისად დადებითია", - დასძინა მებაღიშვილმა ჩვენთან საუბრისას.

საქსტატის ცნობით, 2024 წლის მე-2 კვარტალში, ახალაშენებული კერძო სახლების სეგმენტში 1 კვადრატული მეტრის მედიანური ღირებულება, თბილისის უბნების მიხედვით ყველაზე მაღალი ფასით გამოირჩევა მთაწმინდა, სადაც უძრავი ქონების ღირებულება 4 423 ლარს შეადგენს; მეორე ადგილზეა დიდუბე - 3 583 ლარით, შემდეგ მოდის ვაკე, სადაც უძრავი ქონების ღირებულება 3 375 ლარია; საბურთალოს შემთხვევაში, ეს მაჩვენებელი 3 118 ლარს შეადგენს, კრწანისში - კრწანისში - 3 045 ლარი; უძრავ ქონებაზე ყველაზე დაბალი ფასი სამგორსა (2 374 ლარი) და გლდანში (2 290 ლარი) ფიქსირდება.

როგორც სტატისტიკის ეროვნული სამსახურის მიერ გამოქვეყნებულ ინფორმაციაშია აღნიშნული, ზემოთაღნიშნული ფასები წარმოადგენს გასაყიდ ე.წ. შეთავაზების ფასს.