"ეს საკმაოდ მაღალი და მოულოდნელი მარჟაა, თუმცა გამოწვეულია მიგრანტების მხრიდან დიდი მოთხოვნით"
გვანცა წულაია
23.05.2023

ახალაშენებული ფართები 100%-იანი ფასნამატით იყიდება. ასეთია კვლევა, რომელიც ძალიან მაღალი მოგების მარჟას აჩვენებს. გამოდის, რომ სამშენებლო ბიზნესში ღირებულება ისევ მაღალ ნიშნულზეა, მიუხედავად იმისა, რომ მოთხოვნა შემცირებულია.

გასულ წელს, თბილისში დეველოპერების საშუალო სამშენებლო ხარჯი 1 კვადრატულ მეტრზე - 546 დოლარს, ფართის გასაყიდი ფასი კი 1 092 დოლარს შეადგენდა, ანუ ფასნამატი ორჯერ, 100%-ით მეტია.

„უშუალოდ მშენებლობის პროცესთან დაკავშირებით, ჩატარებული ინტერვიუების შედეგად გამოვლინდა, რომ მშენებლობის პროცესის ხანგრძლივობა და დანახარჯები შემდეგ ძირითად ფაქტორებზეა დამოკიდებული: გამოყენებული მასალების ხარისხი, პროექტის არქიტექტურული ფორმები და პროექტის ადგილმდებარეობა.

2022 წელს დეველოპერული პროექტების საშუალო ხარჯი სამშენებლო ფართის 1კვ/მ-ზე თბილისის შემთხვევაში 546 დოლარს გაუტოლდა, ბათუმში კი - 502 დოლარს. შერჩეულ დეველოპერულ პროექტებში საცხოვრებელი ფართის საშუალო გასაყიდმა ფასმა თბილისში კვ/მეტრზე - 1 092 დოლარი, ხოლო ბათუმში 1 159 დოლარი შეადგინა.

მთლიანობაში, დეველოპერული პროექტების მომგებიანობის ანალიზი აჩვენებს, რომ გაწეულ ხარჯსა და წმინდა მოგებას შორის კავშირი სუსტია: დეველოპერული კომპანიების მოგება მეტწილად აიხსნება სხვა ფაქტორებით, რომლებიც პოტენციურად შეიძლება იყოს კომპანიის რეპუტაცია და გამოცდილება, პროექტის ხელსაყრელი მდებარეობა, ეფექტიანი მარკეტინგული კამპანია და მაღალკვალიფიციური გაყიდვების გუნდი,“ - ნათქვამია „თიბისი კაპიტალის“ ანგარიშში.

მიუხედავად იმისა, რომ უძრავი ქონების ბაზარზე ვითარება შედარებით დასტაბილურდა, სამშენებლო სფეროში ამტკიცებენ, რომ მიმდინარე ეტაპზე მოთხოვნა გაზრდილია.

როგორც კომპანია "არსის” ხელმძღვანელი ირაკლი როსტომაშვილი აღნიშნაVს, საქართველოში ჩამოსული რუსები ფართებს ქირაობენ და საკუთარ ბიზნესს აწარმოებენ და თუ ასეთი მოთხოვნა შენარჩუნდა, ღირებულება ისევ მოიმატებს.

"არ ვიცი, საოფისე ფართების გაქირავებისას მოგების მარჟა რამდენია, 100%-ია, თუ 60% ვერ გეტყვით, მაგრამ უძრავ ქონებაზე მოთხოვნა გაზრდილია, რადგან ძალიან ბევრი უცხოელია, ძირითადად რუსი, შემოსული, რომლებიც აქ არეგისტრირებენ ფირმებს და ყიდულობენ და ქირაობენ უძრავ ქონებას.

ძნელია იმის თქმა თუ რა მოხდება. თუ მოთხოვნა გაიზრდება, ფასი ისევ მოიმატებს, თუ მოთხოვნა შემცირდება ღირებულება დაიკლებს. წარმოვიდგინოთ, რომ თბილისში 100 გასაქირავებელი ოფისია და თუ ზუსტად იგივე რაოდენობის ადამიანია, ვისაც ამ საოფისე ფართების დაქირავება სურს, მაშინ ფასი დაბალანსდება და მყარი იქნება, მაგრამ თუ მსურველი 200 ადამიანია, ასეთ შემთხვევაში ფართს მას მიაქირევებენ, ვინც მეტს გადაიხდის. ეს არის ჩვეულებრივი ბაზარი და თუ რუსეთიდან კვირაში 50 რეისი ჩამოვა, მაშინ, სავარაუდოდ, მოთხოვნა გაჩნდება და ფასები ისევ მოიმატებს.

რუსები საქართველოში ფულით მოდიან, ფართებს ქირაობენ და სილამაზის სალონს ხსნიან, ან პატარა კაფეს და ა.შ. ასე რომ, თუ დიდი ნაკადი ჩამოვა, მოთხოვნა და ფასი გაიზრდება, თუ საქართველოში არ ჩამოვლენ, არც მოთხოვნა მოიმატებს და არც ფასები, ხოლო თუ მათი რაოდენობა იგივე დარჩება, ვითარებაც შესაბამისად ანალოგიური იქნება. აქედან რომელი გარემოება გამოიკვეთება, ასე ზეპირად არავინ იცის”, - განუცხადა "რეზონანსს” როსტომაშვილმა.

სამშენებლო ბიზნესში განსაკუთრებული სიძვირე შარშან დაიწყო. ღირებულების მატება კომერციულ ფართებსაც შეეხო და დგინდება, რომ მოგების მარჟა დღემდე მაღალია, რაც საოფისე ფართის მყიდველი ბიზნესისთვის პრობლემაა, მაგრამ კერძო სექტორს სხვა გამოსავალი არ აქვს, რადგან სიძვირე სამშენებლო სფეროს თანამდევი ნაწილი გახდა.

ახალგაზრდა ფინანსისტთა და ბიზნესმენთა ასოციაციის ხელძღვანლის გიორგი კაპანაძის განცხადებით, ბიზნესისთვის ხარჯების ზრდა მათ მიერ წარმოებულ პროდუქციის ან მომსახურების ფასის ზრდას გამოიწვევს. 

"არ ვფიქრობ, რომ ეს გარემოება ბიზნესს შეაფერხებს. კერძო სექტორმა ყოველთვის იცის, რომ გარკვეული რისკები არსებობს, ამიტომ გათვლილი აქვს წინასწარ, თუ როგორი იქნება მისი ხარჯი, რისთვისაც მზად არის. ბუნებრივია, რომ ამან შესაძლოა, მათ მიერ გამოშვებული პროდუქციის ან მომსახურების გაძვირება გამოიწვიოს, მაგრამ, ვერ გეტყვით, რომ ეს საბოლოო ჯამში შეფერხებას გამოიწვევს. ბუნებრივია, ბიზნესისთვის სასიამოვნო არ იქნება.

ისე კი, 100-პროცენტიანი მოგება, რა თქმა უნდა, საკმაოდ მაღალი და პრინციპში მოულოდნელი მარჟაა. ბოლო პერიოდში ვხედავთ, რომ უძრავი ქონების ფასი იზრდებოდა, მაგრამ 100-პროცენტიან მარჟას ალბათ ბევრი არ ელოდა, თუმცა ეს ყველაფერი გამოწვეულია მაღალი მოთხოვნით, რომელიც წელიწად-ნახევრის წინ დაიწყო.

რასაკვირველია აქ არის მიგრანტების ეფექტი. საქართველოში მათი რაოდენობა საკმაოდ გაიზარდა. შესაბამისად, უძრავ ქონებაზე მოთხოვნამ მკვეთრად მოიმატა, რამაც ფასები წევით ასწია. ბოლო პერიოდში ასეთ მოთხოვნა აღარ არის, მაგრამ, როგორც ჩანს, მარჟები ჯერ კიდევ მაღალი რჩება და სწრაფად გაზრდილი ფასი, ასევე მალე არ იკლებს.

უნდა ითქვას ისიც, რომ უძრავი ქონება საინვესტიციოდ გახდა ძალიან საინტერსო, როგორ ჩვენი მოქალაქეებისთვის, ისე საქართველოდან წასული ემიგრანტებისთვისაც. შესაბამისად, მოთხოვნის ზრდას ამ გარემოებამაც შეუწყო ხელი, მაგრამ როგორც ვახსენე და როგორც არაერთი კვლევა ადასტურებს, შენელებულია მოთხოვნა და უნდა ველოდეოთ, რომ მსგავსი მაღალი ფასებიც ვერ შენარჩუნდება, თუმცა, რა თქმა უნდა, ამას დრო დასჭირდება”, - განუცხადა "რეზონანსს” გიორგი კაპანაძემ.

ვიდეო რეკლამა

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე

ლიცენზია
ვიდეო რეკლამა

Copyright © 2006-2024 by Resonance ltd. . All rights reserved
×