სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    თიკო ოსმანოვა
    28.11.2017

     "ისეთი ადამიანის, რომელიც აუდიტის სამსახურში მუშაობდა და თან მაინცდამაინც მისი პრინციპულობა არავის არ უნახავს, დასახელება სახალხო დამცველის პოსტზე და ამაზე საუბარი, როგორც სამოქალაქო სექტორის და ხელისუფლების თანამშრომლობის მაგალითზე, რბილად რომ ვთქვათ, ტრაგიკომედიაა და მეტი არაფერი", - ამბობს "რეზონანსთან" საუბრისას პოლიტოლოგი გია ხუხაშვილი.

    ბათუმში, სასტუმრო "ლეოგრანდში", დატრიალებულ ტრაგედიასა და სახალხო დამცველის კანდიდატურაზე "რეზონანსი" გია ხუხაშვილს ესაუბრა.

    გია ხუხაშვილი: ეს იმდენად მძიმე შემთხვევაა, რომ არ მინდა რაიმეს თქმა. ამ შემთხვევაში ყველა ტრაგედიის მონაწილეა, მათ შორის მეპატრონეც. ვფიქრობ, გამოძიება აუცილებლად უნდა ჩატარდეს. საერთოდ, ასეთი მაღალი კლასის სასტუმრობეში უსაფრთხოების ნორმები უნდა იყოს დაცული. ადამიანები ფულს იხდიან კომფორტში, რომელიც უსაფრთხოების ნაწილია.

    ასე რომ, ჩვენ დანაშაულზე თუ უნდა ვილაპარაკოთ, აქ, ერთი მხრივ, დამნაშავეა მენეჯმენტი და, მეორე მხრივ, ის ადამიანები, რომლებიც ექსპულატაციაში იბარებენ და მერე აკონტროლებენ. ორი მხარეა დამნაშავე, სხვა ვერავინ იქნება.

    "რეზონანსი": ანუ ხელისუფლებას ეკისრება გარკვეულწილად პასუხისმგებლობა ამ საკითხზე?

    გ.ხ.: ხელისუფლების შესაბამის უწყებას, რომელიც პასუხისმგებელია ნებართვის გაცემაზე და შემდეგ მონიტორინგზე.

    "რ": ეს არ არის პირველი შემთხვევა, როდესაც ასეთი ხანძრები ტრაგედიით მთავრდება. ხომ არ ფიქრობთ, რომ ხარვეზები თავად კანონმდებლობაშიც გვაქვს?

    გ.ხ.: არ მგონია, რომ პრობლემა იყოს თვითონ ნორმებში. პრობლემაა კანონის დაცვაში. შეიძლება რაღაც იყოს შესაცვლელი, მაგრამ არ მგონია, ეს იყოს მთავარი პრობლემა. ერთია, რაც ქაღალდზე წერია და მეორეა, როგორ სრულდება. აღსრულების დონეზე, როგორც ჩანს, ზერელე დამოკიდებულება აქვთ, ან კიდევ კორუფციულ გარიგებასთან გვაქვს საქმე.

    ეს ყველაფერი გამოძიებამ უნდა დაადგინოს. ნებისმიერი ასეთი უსაფრთხოება დამატებით კაპიტალდაბანდებას გულისხმობს და თუ ადამიანს არ უნდა ამ ფულის დახარჯვა, ცდილობს, რბილად მოილაპარაკოს. გრძელვადიან შესაძლო რისკებზე ადამიანები არ ფიქრობენ.

    "რ": რაც შეეხება სახალხო დამცველს, რას ფიქრობთ ნინო ლომჯარიას კანდიდატურაზე?

    გ.ხ.: ლომჯარიასთან პირდაპირი პრეტენზიები არ მაქვს, მაგრამ არ მგონია, რომ ის არის საუკეთესო კანდიდატი. ის, რომ იგი არის სამოქალაქო სექტორის წარმომადგენელი, დღევანდელ სიტუაციაში არადამაჯერებელია. ძალიან მიკვირს არასამთავრობოების, რომლებმაც მისი კანდიდატურა წამოაყენეს. ისეთი ადამიანის, რომელიც აუდიტის სამსახურში მუშაობდა და თან მაინცდამაინც მისი პრინციპულობა არავის არ უნახავს, დასახელება და ამაზე საუბარი, როგორც სამოქალაქო სექტორის და ხელისუფლების თანამშრომლობის მაგალითზე, რბილად რომ ვთქვათ, ტრაგიკომედიაა და მეტი არაფერი.

    იმ ადამიანებში, რომლებიც სამოქალაქო სექტორმა წამოაყენა, ნამდვილ უფლებადამცველად წარმომედგინა ანა ნაცვლიშვილი. მას პირადად არ ვიცნობ, მაგრამ რასაც შორიდან ვუყურებ, ის ძალიან თანმიმდევრული და პრინციპული ახალგაზრდა ქალბატონია. ჩემი მხრიდან იმსახურებდა ნდობას. ვფიქრობ, არ გაერეოდა რაღაც პოლიტიკურ თამაშებში. ლომჯარია კი, ჩემი აზრით, ამ თამაშებში გარეულია მისი ბოლო სამსახურდან გამომდინარე.

    "რ": თუმცა ლომჯარია ხელისუფლებას ხშირად აკრიტიკებდა.

    გ.ხ.: ადრე რომ აკრიტიკებდა - კი, მაგრამ მერე აუდიტის სამსახურში იმუშავა.

    "რ": მაგრამ აუდიტის სამსახურის ხელმძღვანელი იმ პერიოდში ლაშა თორდია იყო, რომელსაც მმართველ გუნდთან არც ისე კომფორტული ურთიერთობა ჰქონდა.

    გ.ხ.: მას შემდეგ, რაც ხელისუფლებაში "ქართული ოცნება" მოვიდა, თორდია "ნაციონალური მოძრაობის მხარდამჭერი პირობითად იყო. ლომჯარია დანიშნა ამ ხელისუფლებამ. მაშინ მიჩნდება კითხვა - ეს ხომ არ იყო კრიტიკაზე უარის თქმის ფასად? ასეთი კომპრომისები ხდება.

    "რ": ანუ, ლომჯარიასთან ხელისუფლება თავს კომფორტულად იგრძნობს?

    გ.ხ.: რა თქმა უნდა. მან ეს კომფორტი ხელისუფლებას ერთხელ უკვე შეუქმნა და ახლაც არ აწყენინებს.

    "რ": რაც შეეხება 22 ნოემბრის სპეცოპერაციას, ხელისუფლებამ, პრაქტიკულად, აღიარა, რომ ერთ-ერთი ლიკვდირებული ახმედ ჩატაევია. რა შეიძლება ამას მოჰყვეს?

    გ.ხ.: ეს იმდენად მძიმე თემაა, რომ დეტალური კომენტირება არ მინდა. ახმედ ჩატაევი არ არის ვიღაც. ის აღიარებულია და ეჭვმიტანილია უმძიმეს ტერორისტულ დანაშაულებში. რა თქმა უნდა, ისმის კითხვები - როგორ აღმოჩნდა იგი საქართველოში მით უმეტეს მას შემდეგ, რაც ცოტა ხნის წინ ჩვენი ხელისუფლების მისამართით მისგან მუქარა ისმოდა. თან ამბობენ, 2 კვირა აკვირდებოდნენ ამ ადამიანებს და მერე ამბობენ - არ ვიცით, ვინ არის და მათი იდენტიფიცირება უნდა მოვახდინოთო. თუმცა შეიძლება იყოს რაღაც, რასაც ხელისუფლება ვერ ამბობს და არც უნდა მოვთხოვოთ, რომ სახელმწიფო საიდუმლოება გათქვას. მაგრამ მრჩება შთაბეჭდილება, რომ ხელისუფლების ზოგიერთ წარმომადგენელს აქვს რაღაც პრობლემა, გამოსავალს ვერ პოულობს და ამით არის განპირობებული ეს გაუგებარი დუმილი დღემდე.

    ასევე მიუღებელია ზოგიერთი სახელისუფლებო პოლიტიკოსის განცხადება, რომ თითქოს კითხვები აქვს მარტო "ნაციონალურ მოძრაობას" და ისინი არ უპასუხებენ მათ. ნუ ხატავენ ამ ქეყანაში ისე სიტუაციას, თითქოს მარტო ისინი და "ნაციონალები" არიან. კითხვები ყველას აქვს.

    "რ": რა ინტერესი შეიძლება ჰქონოდა ჩატაევს?

    გ.ხ.: არ ვიცი. შეიძლება მქონდეს ვერსიები, მაგრამ ეს იმდენად რთული თემაა, რომ ამაზე ჭორაობაში არ შევიდოდი. რაღაც პერიოდი დაველოდოთ ხელისფლებას, იქნებ გაგვცეს რაციონალური პასუხი და თუ არა, მერე ყველაფერზე შეიძლება საუბარი.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2017 by Resonance ltd. . All rights reserved
    Site Meter