სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    ნინო ქეთელაური
    25.11.2017

     "არ არის გამორიცხული, რომ რუსეთი ჩრდილოკავკასიელების მეშვეობით ცდილობს, დაასუსტოს საქართველოს სახელმწიფოებრიობა", - აცხადებს პოლიტოლოგი ნიკა ჩიტაძე "რეზონანსთან" საუბრისას.

    მისი ვარაუდით, დანაშაულებრივი ჯგუფის წევრები რუსეთის ტერიტორიიდან გადმოვიდნენ და იმის გათვალისწინებით, რომ რუსეთ-საქართველოს შორის 44 საცალფესო ბილიკია, არც იარაღის შემოტანა გაუჭირდებოდათ.

    ნიკა ჩიტაძე: პირველ რიგში, მინდა, დავადასტურო ჩემი დიდი პატივისცემა იმ სპეცრაზმელების მიმართ, რომლებიც საკუთარი სიცოცხლის ფასად იცავდნენ საქართველოს მოქალაქეების უსაფრთხოებას და ამავე დროს თანავუგრძნობ დაღუპულის ოჯახს და მთლიანად საქართველოს.

    რაც შეეხება კონკრეტულად სპეცოპერაციას, ალბათ ყველა კითხვას პასუხი უახლოეს მომავალში გაეცემა. მათ შორის მის ხანგრძლივობასთან დაკავშირებით, რაც დამოკიდებულია სპეცოპერაციის სირთულეზე. ასევე, არის გარკვეული კითხვები, მაგალითად, როგორ გადაადგილდებოდნენ ამ ჯგუფუს წევრები, როგორ მიმდინარეობდა მათზე თვალთვალი, როდის და როგორ შემოვიდნენ საქართველოს ტერიტორიაზე, როგორ მოხვდა მათ ხელში იარაღი, სად შეიძინეს, რამდენი ხნის განმავლობაში მიდიოდა ამ სპეცოპერაციისთვის მზადება და ა.შ.

    "რეზონანსი": როგორ ფიქრობთ, ეს ჯგუფი საიდან და როგორ შეიძლება შემოსულიყო საქართველოში?

    ნ.ჩ.: დიდი ალბათობით, ისინი გადმოვიდნენ რუსეთის ტერიტორიიდან, თუმცა თუ მათ საზღვარი გადმოკვეთეს ზემო ლარსიდან, არანაირი იარაღი არ ექნებოდათ, მაგრამ რუსეთ-საქართველოს შორის 44 საცალფეხო ბილიკია და ამ გზით არც იარაღის შემოტანა იქნებოდა გასაკვირი.

    "რ": დასახელდა ორი ძირითადი ვერსია, რომ შესაძლოა, ისინი საქართველოში ამზადებენენ ტერორისტულ აქტს, ან გავლით იყვნენ და სინამდვილეში სხვა ქვეყანაში გადასვლა სურდათ. იმის გათვალისწინებით, რომ ისინი საკმაოდ კარგად შეიარაღებულები იყვნენ, მეორე ვერსია რამდენად დამაჯერებელია?

    ნ.ჩ.: რა თქმა უნდა, ორივე ვერსიას თავისი საფუძველი აქვს. თუ ისინი საქართველოს ტერიტორიაზე გეგმავდნენ ტერორისტულ აქტებს, სავარაუდოდ, სწორედ ამიტომაც შეიძინეს ამ რაოდენობის იარაღი. როგორც ცნობილია, მათ ჰქონდათ ყუმბარმტყორცნები, ასაფეთქებელი ნივთიერებები და ა.შ. ამ შემთხვევაში ჩვენ შეგვიძლია ვივარაუდოთ, რომ ისინი რუსეთის სპეცსამსახურებთან იყვნენ დაკავშირებული. იმიტომ, რომ რუსეთი დაინტერესებულია საქართველოს სახელმწიფოებრიობის დასუსტებით და შესაძლოა, სწორედ ამ მიზნით მოაწყოს ტერორისტული, დივერსიული აქტები. მით უმეტეს, რომ, ყველას კარგად მოგვეხსენება, რუსეთს ამის გამოცდილება აქვს და გარკვეულ ტერორისტულ ორგანიზაციებს მხარს უჭერს.

    ამასთან, ისიც ვიცით, რომ რუსეთი აფინანსებდა შამილ ბასაევს, რომელიც აფხაზეთში მოქმედებდა, ხოლო მას შემდეგ, რაც ჩეჩნეში რუსეთის წინააღმდეგ დაიწყო მოქმედებები, იგი ნომერ პირველ ტერორისტად გამოაცხადეს. აქვე გავიხსენებდი პრეზიდენტ შევარდნაძეზე თავდასხმას, როცა ერთ-ერთი მოკლული ტერორისტი ჩეჩენი აღმოჩნდა. რუსეთი შეიარაღებულ ფორმირებებს იყენებდა საქართველოს წინააღმდეგ 2008 წლის ომის დროსაც. ცხინვალის რეგიონში ჩეჩნური ბატალიონები მოქმედებდნენ. რუსეთი, ასევე, იყენებდა სეპარატისტული რეგიონებიდან გარკვეულ დივერსიულ ჯგუფებს და ამის მაგალითია ამერიკის საელჩოსთან და ლეიბორისტების ოფისთან ნაპოვნი ასაფეთქებელი მოწყობილობა.

    შესაბამისად, არ არის გამორიცხული, რომ რუსეთი ჩრდილოკავკასიელების მეშვეობით ცდილობს, დაასუსტოს საქართველოს სახელმწიფოებრიობა. მის გაღიზიანებას იწვევს ის ფაქტი, რომ საქართველო ტურისტებისთვის მიმზიდველი ქვეყანაა და ყოველწლიურად რამდენიმე მილიონი უცხოელი სტუმრობს. გარდა ამისა, იზრდება საქართველოს სატრანზიტო ფუნქცია. ბაქო-თბილისი-ყარსის რკინიგზის ექსპლოატაციაში შესვლა მისთვის არცთუ კარგი ამბავია. ამასთან, რამდენიმე დღეში უნდა გაიმართოს აბერშუმის გზის ფორუმი, რომელსაც სხვადასხვა ქვეყნის დელეგატები დაესწრებიან და რუსეთი, რომელსაც ხელს არ აძლევს საქართველოს სახელმწიფოებრიობის გაძლიერება, ყოველთვის შეეცდება ჩვენთან დესტაბილიზაციას. ის ჩვენ წინააღმდეგ საინფორმაციო ომის მეშვეობითაც იბრძვის და შესაძლოა, ეს ინციდენტიც გამოიყენოს - აი, ხომ ხედავთ, ტერორისტები ბინადრობენ თბილისშიო. ამიტომ ძალიან დიდია ალბათობა, რომ ეს ადამიანები დაკავშირებულნი იყვნენ რუსეთთან.

    არსებობს სხვა ვარიანტიაც. რუსეთის მიზანია, თუ ჩრდილოკავკასიელი ბოევიკების ფიზიკურ ლიკვიდაციას ვერ ახერხებს, განდევნოს ისინი რუსეთის ტერიტორიიდან, მათ შორის საქართველოში. გავიხსენოთ თუნდაც ლაფანყურის ფაქტი. მაშინ, მთავარი ვერსიის მიხედვით, დაღესტანში ტარდებოდა სპეცოპერაცია და ტერორისტული დაჯგუფება აიძულეს, საქართველოს ტერიტორიაზე გადმოსულიყო.

    კიდევ ერთი ვერსიის მიხედვით, აღნიშნული ტერორისტული ჯგუფი, შესაძლოა, შემდგომში გადასულიყო სირიის ან ერაყის ტერიტორიაზე. მაგრამ აქ ისმის კითხვა - თუ ამ ჯგუფის წევრებს ჰქონდათ ასაფეთქებელი ნივთიერებები, საბრძოლო იარაღი და ა.შ., როგორ მოახერხებდნენ საქართველო-თურქეთის საზღვრის გადალახვას? ამიტომ ეს ვერსია ნაკლებად დამაჯერებელია.

    შესაძლოა, "ისლამურ სახელმწიფოსთან" ჰქონდათ კავშირი. "ისლამურმა სახელმწიფომ" ტაქტიკა შეცვალა და თუკი მანამდე 11 პროვინციას აკონტროლებდა, დღეს მისი მიზანია ტერორისტული ფილიალების ჩამოყალიბება სხვადასხვა ქვეყანაში, შესაბამისად, შესაძლოა, ეს ერთ-ერთი ასეთი ჯგუფიც იყო.

    კიდევ ერთი ვერსიის მიხედვით კი, ეს არა ტერორისტული დაჯგუფება, არამედ ორგანიზებული დანაშაულებრივი ჯგუფი იყო, რომლის მთავარი მოტივაციაა ფულადი მოგების მიღება უკანონო გზით. თუმცა ეს ვერსია ნაკლებად სავარაუდოა. მე მაინც მგონია, რომ ისინი რუსეთს უკავშირდებიან.

    "რ": როგორც ითქვა, სამი ლიკვიდირებულიდან ერთ-ერთი ახმედ ჩატაევია, თუმცა სუს-ი მათ იდენტიფიკაციასთან დაკავშირებით არანაირ განმარტებას არ იძლევა. როგორ ფიქრობთ, რა არის ამის მიზეზი?

    ნ.ჩ.: მე მაინც ნაკლებად სავარაუდო მგონია, რომ ახმედ ჩატაევი ამ ოპერაციაში მონაწილეობდა. მაგრამ თუ ასეა, ხელისუფლება მათი ვინაობის გამხელისგან თავს ალბათ იმიტომ იკავებს, რომ იგი 2012 წელს გაათავისუფლეს. მართალია, ეს გადაწყვეტილება საქალაქო სასამართლომ მიიღო, მაგრამ მის გათავისუფლებაზე ხელისუფლებასაც ეკისრება პასუხისმგებლობა.

    "რ": სპეცოპერაციის შემდეგ სოციალური ქსელში მუქარის შემცველი ტექსტები გავრცელდა. რამდენად დიდია ალბათობა, რომ იმავე საფრთხის წინაშე კვლავ აღმოჩნდეს საქართველო, ან ტერორისტული ორგანიზაციების სამიზნე გახდეს?

    ნ.ჩ.: სამწუხაროდ, ეს შესაძლებელია. თუმცა არ არის გამორიცხული, რომ საქართველოს მოსახლეობაში პანიკის დათესვის მიზნით ამას რუსეთის სპეცსამსახურები ავრცელებდნენ. ყოველ შემთხვევაში, სიფრთხილეს თავი არ სტკივა.

    "რ": მინდა, გკითხოთ სახალხო დამცველის კანდიდატურებთან დაკავშირებითაც. როგორ ფიქრობთ, ხელისუფლება რომელი კანდიდატურის გაყვანას შეეცდება?

    ნ.ჩ.: სასურველი იქნებოდა, რომ სამოქალაქო საზოგადოების წარმომადგენელი ყოფილიყო სახალხო დამცველი, თუმცა საკმაოდ ცუდი პრეცედენტი შეიქმნა ომბუდსმენთან მიმართებით. კარგად გვახსოვს, როდესაც უჩა ნანუაშვილმა ხელისუფლება გააკრიტიკა, მმართველი გუნდის მხრიდან ისმოდა განცხადებები, რომ თითქოს მას რაღაც პოლიტიკური გეგმები ჰქონდა და ამიტომ აკრიტიკებდა ხელისუფლებას. ეს ძალიან ცუდი პრეცედენტია, რადგან შესაძლოა, მომავალი სახალხო დამცველი დიდი სიფრთხილით მოეკიდოს ხელისუფლებასთან ურთიერთობას.

    მე მაინც ვფიქრობ, რომ ხელისუფლება შეეცდება, სახალხო დამცველის პოსტზე მისთვის შედარებით მისაღები კანდიდატურა დაამტკიცოს, ვინც მათ მიმართ შედარებით ლოიალურ პოლიტიკას გაატარებს.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2017 by Resonance ltd. . All rights reserved
    Site Meter